ကွာလာလမ်ပူ၊ ဂျောန် ၅
ကပေါတ်ဗၞိက် တိတ်နူဍာ်ၜဳသေံတံ ညံၚ်သ္ဂောံထိၚ်ချုက်အာ ဗတ်တ်မာန် ကြဴနူပလံၚ်မံၚ်ကဵု မဇင္ၚုဲသေံ ၅ ဂကူ ဒးဒုၚ် ဗဒေါအ်လဝ်တုဲ ဗွဲမပြဟ် သွက်သ္ဂောံသဳကၠဳအာ ကုမလေယှာမာန်ဂှ် သ္ကိုပ်ဝန်ဇၞော်သေံ အနုတေန် ချန်ဗဳရာကူလ် ဗ္တိုက်ဖ္အောဝ်လဝ်ရ။
ဂိတုဂျောန် ၂ ဂှ် သ္ကိုပ်ဝန်ဇၞော်အနုတေန် ပတိတ်ကဵုလဝ်စၞောန်ပ္ညုၚ်တုဲ ယဝ်ရတာဒၞာလဝ်လံအာမ္ဂး ရဲလွဳင္ၚုဲတံ ကေုာံ ရဲပလံၚ်င္ၚုဲတအ် ပရေၚ်မံၚ်စံၚ်စသုၚ်ညးတံ ယုတ်ဒေက်အာမာန်တုဲ လၟေၚ်သၠဲဇုက်လၟေၚ်ဆက်လဝ် ပရေၚ်ပလံၚ်ပတိတ်ကပေါတ်ၜဳတအ်လေဝ် ကမၠောန်ယုတ်ဒေက်အာမာန်ရောၚ် ညးအခေါၚ်ဟီုဂးပရိုၚ် အလဵုအသဳသေံ ရာတ်ချဒါ သာဏာဒဳရက် ဟီုရ။
ယဝ်ရပြသၞာဏအ် လံအာမ္ဂး အနှေန်ၚုဟ်င္ၚုဲတအ် ယုတ်ဒေက်အာမာန်တုဲ သၟာလွဳင္ၚုဲအဇာဍောတ်တအ် သြန်လုပ် ယအ်ဒေက်အာမာန်ရောၚ် ပ္ဍဲလလောၚ်တြးဂှ် ချူလဝ်ရ။
ဒးစဵုဒၞာကဵု သွက်သၟာလွဳင္ၚုဲသေံတအ်ကီု ကုညးတာလျိုၚ်မလေယှာတအ်ဂှ် သွက်သ္ဂောံသဳကၠဳအာ ပရေၚ်ကာမံက်တိုန် နွံမံၚ်ပၟိက်ရောၚ် ဝန်ဇၞော်အနုတေန် ဟီုရ။
သွက်သ္ဂောံစဳရေၚ်အာ ပရေၚ်င္ၚုဲပဵုသာန်မံၚ်အပ္ဍဲဍုၚ်၊ သွက်အနှေန်ၚုဟ်ဂွံညိၚ်အာ ကေုာံ သွက်သ္ဂောံဂၠာဲဗွဝ်ဖျာပလံၚ်အာ ဒၞာဲတၞဟ်ဟ်ဂှ်လေဝ် ဂကောံအလဵုအသဳသေံတအ် ပတိုန်ထ္ၜးလဝ်ရ။
ကၠာဟွံပလံၚ်ဏာ ညံၚ်ဂွံချိုတ်ပၠိုတ်လဝ် သွက်သၟာကမၠောန်ကၠောန်ပတိတ်င္ၚုဲတအ် စရိတ်ဂွံရုံဂပ်ကီု ဂွံဂွံပရဲပရၚ်တအ်ကီုဂှ် ၚုဟ်မးပလံၚ်ဗစိုပ်တံကီု နူအလဵုအသဳသေံ စၟတ်ပိုၚ်ခြာကဵုလဝ်တုဲရ။
နူသေံ ပလံၚ်ပတိတ်မံၚ်မလေယှာ ဇၟာပ်သၞာံ င္ၚုဲတာန်လျိုၚ် ၆၀၀၀ စဵုကဵု ၈၀၀၀ နွံတုဲ၊ ဒှ်မံၚ်ပမာဏ ၅% ပရေၚ်ပလံၚ်ဗစိုပ်မံၚ် င္ၚုဲအလုံမွဲဍုၚ်သေံ နွံရ။
ဟိုတ်နူကဵု ပရေၚ်တာဒၞာမလေယှာတုဲ နူသေံမ္ဂး ပ္ဍဲပွိုၚ်မွဲသၞာံ သြန်ဗာတ် ၄ ဗဳလဳယာန် ဒးဆောံလေၚ်အာမာန်ရောၚ် လိက်ပရိုၚ် Bangkok Post ချူလဝ်ရ။
သွက်သၟာကၠောန်ပတိတ်နူကဵုသေံတအ်မ္ဂး ဟွံဒးပလံၚ်စိုပ်ဒေသဗဟဵုတုဲ မလေယှာဂှ် ဒှ်ဒၞာဲဗွဝ်ဖျာ ပြေပြံၚ်မံၚ် သွက်ညးတအ်ရ။
ပရေၚ်ကၟာတ်ဆိုအ်စကၠောန် လမျီုလုပ်လဝ် ဂိတုဂျောန် ၁ ဂှ် နူကဵုဌာနဝန်ဇၞော်ပရေၚ်တဵုလွဳကဵု စၞစဇွောံမ မလေယှာ လလောၚ်တြးလဝ် စနူဂိတုမေ ၁၆ တေံရ။
အတိုၚ်သၞောတ်ဗ္ၜတ်ဍာ်ဒကေဝ် ဌာနဝန်ဇၞော်ပရေၚ်ထတ်ယုက်မလေယှာ စၟတ်ပိုၚ်ခြာလဝ်မ္ဂး တာဒၞာလဝ် မဇင္ၚုဲသေံ ၅ ဂကူ မဒှ်ရ။
Source:Agencies