ပလဝ်၊ ဂျောန် ၅
သွက်သ္ဂောံကလေၚ်ဂွံ ဗ္ဒိုပ်ကျံက်လုၚ်ဂျဳ ဖျေံသ္ဇိုၚ် ပွိုၚ်ဍုၚ်ပလဝ် ရးတနၚ်သဳဂှ် ဒပ်ပၞာန်ဗၟာတံ နကဵုဇြဟတ်ဗွဲမဂၠိုၚ် ထပက်ကၠုၚ်ပၞာန်ဂှ် ပေါဲဗတိုက်အကြာၜါလပါ် ဒှ်မံၚ်ဇၞော်ကဵုဇြဟတ်ရောၚ် ဂကောံဒပ်ပၠန်ဂတးတံ ဟီုကဵု ဌာန်ပရိုၚ်သြင်လောန်တိုၚ်မ်ရ။
ဗ္ဒိုပ်ဒပ်ပၞာန်ဗမာ ဖျေံသ္ဇိုၚ် ကွာန်ကျံက်လုၚ်ဂျဳဂှ် တုဲကၠုၚ်ဂိတုမေ ၂၉ ဏံ ဒပ်ပၞာန်ဗၠးၜးကောန်ဂကူကရေၚ် KNLA က္ဍိုက်ပ် ဂကောံဒပ်ပၠန်ဂတးတအ် ဗတိုက်သီကေတ်လဝ်ရောၚ်။
ကြဴနူ ဗ္ဒိုပ်ဒးဒုၚ်သီဏာတုဲဂှ် ဒပ်ကဝ်မယှေန်ပၞာန် ပံၚ်တောဲကဵု ဂကောံဗ္ဒိုပ်ကုန်ဗျူဟာတုဲ ကလေၚ်ထပက်ပၞာန် ဇရေၚ်ဗ္ဒိုပ် ကျံက်လုၚ်ဂျဳ ဇၞော်ကဵုဇြဟတ်ကီုတုဲ နူဗလးကျာဂှ်လေဝ် ဇၟာပ်ပ်တ္ၚဲ ကြဳဗုမ် ဗတိုက်မံၚ်ကီုရောၚ်။
ညံၚ်သ္ဂောံကလေၚ်ဂွံ ဗ္ဒိုပ်ကျံက်လုၚ်ဂျဳဂှ် နူလပါ်ဒပ်ပၞာန်ဗမာ ထပက်မံၚ်ပၞာန် ဇၞော်ကဵုဇြဟတ်ကီုလေဝ် စဵုကဵုဂိတုဂျောန် ၃ အခိၚ်သဝ်တ္ၚဲဂှ် ဟွံကလေၚ်ဂွံဏာ ဗ္ဒိုပ်ဏီပုဟ်ဂှ် ညးတာလျိုၚ် လလောၚ်ပရိုၚ် ခရိုၚ်ဗိက်-ထဝါဲ KNU ဟီုရ။
သွက်ဒပ်ပၞာန်ဗမာ ဂွံထိၚ်ချုက် မွဲဒမြိပ် ကြုၚ်တနၚ်သဳမွဲမာန်ဂှ် ဗ္ဒိုပ်ကျံက်လုၚ်ဂျဳဏံ ဒှ်ဒၞာဲပရေၚ်ကိစ္စဇၞော်မွဲဂှ်တုဲ ညံၚ်သ္ဂောံကလေၚ်ဂွံဗ္ဒိုပ်ဂှ် နကဵုအမိၚ်ဗျူဟာ ဂစာန်မံၚ် ဇၞော်ကဵုဇြဟတ်ရောၚ် သ္ဂးရ။
အပ္ဍဲပေါဲဗတိုက်သီဗ္ဒိုပ် ကျံက်လုၚ်ဂျဳဂှ် ကောန်ပၞာန် ဒပ်ကဝ်မယှေန်ပၞာန်တံ ဟိုတ်နူထောံလဝ်ဗ္ဒိုပ် ဂြိပ်ပါဲဒဴအာအိုတ်တုဲ ဂကောံဒပ်ပံၚ်တောဲ မဟာမိတ်ပၠန်ဂတးတံ သီဂွံဏာလွဟ်မကမ်တံ ဗွဲမဂၠိုၚ်ဂၠၚ်နွံရ။
ပရိုၚ် – သြင်လောန်တိုၚ်မ်
Photo – KNU