ၜင်ကံက်၊ ဂျောန် ၆
စပ်ကဵုပရေၚ် ပရူပရာဟီုမံၚ် အပ္ဍဲသိုဲယှေဝ်မဳဒဳယာ နူ ခမေန် ဗလံၚ်ဏာကွဳစက်ကာခြပ် ၂၀၀ မ၊ လွဟ်လံၚ်ချာတ္ၚိန်ပန် ကေုာံ ကောန်ပၞာန်ဗွဲမဂၠိုၚ် ပ္ဍဲဗ္ဒာဲပယျဵုသေံတံတုဲ ဒုညးလလောၚ်တြးပရိုၚ် ဒပ်ပၞာန်သေံ သ္ကိုပ်ဗိုလ် ရဳချာ သိုက်သူဝါနာမ် သောၚ်ကလးဟီုလဝ် အပ္ဍဲဂိတုဂျောန် ၅ ဂှ်ရ။
အတိုင်တင်စၟဳစၟတ်လဝ် မွဲကရောံကဵုဒပ်ပၞာန်နွံမံၚ်မွဲဒမြိပ်ပယျဵုတံမ္ဂး တင်နၚ်ပရိုၚ် မၞိဟ်တံ ပါ်ပရးမံၚ် လ္တူအန်လာၚ်တံဂှ် အရာကိတ်ညဳမံၚ် ပရေၚ်မွဲသာ်လေဝ် ဟွံဆဵုလဝ်ရောၚ် ရဳချာ သ္ပလဝ်ဒတန်ရောၚ်။
ပရိုၚ် နူဌာန်ပရိုၚ်ဗွဲလုပ်သၞောဝ်တံဂှ်ရ ညးဍုၚ်ကွာန်တံ ပတေဟ်ဒုၚ်တဲထေက်တုဲ၊ ညံၚ်ဟွံဂွံကၠိုဟ်ဗၠေတ်ဗၠေၚ်အာဂှ် ညံၚ်ဟွံဂွံ ဒစးဒုၚ် ဒုၚ်တဲအာ ပရိုၚ်ဆဵုပ္ဍဲအန်လာၚ်တံဂှ် နူဒပ်ပၞာန်သေံ ကဵုလဝ်သတိရ။
ဟိုတ်နူ ပရိုၚ်ကောလဟောလံၚ်တံဂှ် အရာပရေၚ်ဒးဂွိၚ်ဖက်မံၚ် ဟၟဲတုဲ ဟိုတ်နူ ပရိုၚ်ဗၠေတ်ဗီုတံဏံတုဲ ပရေၚ်ဂီုကၠီုကေုာံ ပရေၚ်ညးဍုၚ်ကွာန်တံ မံၚ်စံၚ်စှ်ေမံၚ်ဗီုပြၚ်တုဲတုဲတံဂှ် ယုတ်ဒေက်အာမာန်ရောၚ် ဒပ်ပၞာန်သေံ ဟီုရ။
ဟိုတ်နူ ပရေၚ်ဒှ်ကယျာန်ဓဝါတ် ပယျဵုဒၞက်နိဂီုဍုၚ် လံကၠုၚ်သၞာံ ဗွဲမဂၠိုၚ်တုဲ အကြာသေံကဵု ခမေန်တံ ဂိတုတုဲကၠုၚ်တေံ ဒှ်ကၠုၚ် ပေါဲဗတိုက်တုဲ ပ္ဍဲပယျဵုဂှ် မၞိဟ်လၟိဟ်ကဵု ပြကောတိကိုတ်ပြၚ် ဒးဂြိပ်ပါဲလဝ်ဘဲပၞာန် လံကဵုဂိတုတံရ။
အကြာၜါဍုၚ်ဂှ် နကဵုပရေၚ်ပ္ညဳပ္ညပ် နူမလေယှာ ၜိုန်ရတုပ်လဝ်စိုတ် ပရေၚ်ဒေါအ်ပန်ပှော်ကီုလေဝ် ပရေၚ်ကြံၚ်မ္ၚိုဟ်မံၚ်တံ ဆက်နွံမံၚ်ဏီတုဲ၊ ပ္ဍဲအခိၚ်လၟုဟ် ပရေၚ်ကယျာန်ဓဝါတ်ပယျဵုဒၞက် ဍာ်ၜဳဂှ် နူ ခမေန် ဂစာန်သောၚ်ကလးအာမံၚ် နကဵုဥပဒေကုလသမဂ္ဂ ရ။
ပရေၚ်ဒှ်ကယျာန်ဓဝါတ်မံၚ်ပယျဵုဒၞက်တံဂှ် ထေက်ကဵု ဒးသောၚ်ကလးအာ အကြာၜါဍုၚ်သၟး ကေၚ်ဟီုလဝ်နွံတုဲ၊ ဍုၚ်အကြာမွဲမွဲပါလုပ်ကၠုၚ်မ္ဂး ကဵုအခေါၚ်ဟွံသေၚ်ပုဟ် နူလပါ်သေံ ဟီုလဝ်ရ။
ကြဴနူပေါဲဗတိုက်ဒှ်ကၠုၚ် အကြာပ္ဍဲပယျဵုၜါဍုၚ်တုဲ ထ္ၜးဟိုတ်ကဵု ပရေၚ်ဗတိုက်သရိုဟ် ကျာဖျတုဲ စမြိုၚ်ဒၞာဲကာသဳနိုကဵု ဝိုၚ်ဝေၚ်အန်လာၚ် နွံမံၚ်ပယျဵုခမေန်တံဂှ် နူသေံ ဗတိုက်ပလီုလဝ် နကဵုၜၚ်ကျာတံရ။
ဟိုတ်နူမာၚ်တိတပ်တိ ခမေန် တိုပ်လဝ်ဒၞာဲပယျဵုတံတုဲ ကောန်ပၞာန်သေံ ဂေတ်မၚ်ကၚ်လ္ၚဵုတံ ဒးဝပ်ဘဲနွံတုဲ၊ မာန်တပ်တိ ခမေန် တပ်စွံလဝ်တၟိတၟိ ၂၀၀ မပြၚ်တံဂှ် ညးတာလျိုၚ်သေံတံ ထ္ၜးလဝ်ကဵု ဂတးမုက်မဳဒဳယာတံရ။
ဟိုတ်နူပြသၞာၜါဍုၚ်တုဲ ရဲပြံၚ်သၠာဲမံၚ်စံၚ်ဌာန်ဒၞာဲ ခမေန်တံ ဗွဲမဂၠိုၚ် ဒးကလေၚ်စဴဌာန်တုဲ၊ ပ္ဍဲသေံလေဝ် ပရေၚ်က္ဍုဟ်မၠိ ကောန်ဍုၚ်သအာၚ် ကေုာံ ဝါဒကောန်ဂကူတံ ကလေၚ်ယာက္ဍိုပ် သၠုၚ်တိုန်မံၚ်ရောၚ် ညးလ္ၚတ်တံ ဟီုမံၚ်ရ။
Ref:The Nation