မုဟ်ဍုၚ်၊ ဂျောန် ၈
အပ္ဍဲတွဵုရးမန် ပွိုၚ်ဍုၚ်မုဟ်ဍုၚ် ကရပ်ဗ္ဒာဲကွာန်နှေဟ်ဗဒဝ် အကြာပ်ဇၞော် ဒပ်ပၞာန်သီအဝဵု ၂ တၠ ဒးဒုၚ်ပန်ကဵုသေနာတ်တုဲ ချိုတ်အာလဝ်ရောၚ် ညးဒေသတံ ဟီုလဴကဵု ဌာန်ပရိုၚ် သြင်လောန်တိုၚ်မ် ရ။
အပ္ဍဲဂိတုဂျောန် ၆ ၜိုတ်အခိၚ်ဒေါဝ်တ္ၚဲ ၁၂ နာဍဳကဝက်ဂှ် အကြာပ်ဇၞော် ၂ တၠ လတက်လဝ်ကယျိုၚ် ယူနဳဖံၚ်ပၞာန်တုဲ ဍိုက်ကွဳလိုန်ဓါတ်မွဲမ ဒဳကၠုၚ်အတိုၚ်ဂၠံၚ်ကွဳစက် မတ်မလီု-ဇြပ်ဗု အဟိန်ဒဳကၠုၚ် နူကွာန်အၜေတ် အာလပါ် ကွာန်နှေဟ်ဗဒဝ်ဂှ် ဒးဒုၚ်ပန်ဂစိုတ်လဝ်ကဵု သေနာတ်ရောၚ်။
အတိုင်ညးကြပ်ကဵုဒပ်ပၞာန်တံ ဟီုလဴလဝ်မ္ဂး အကြာပ်ဇၞော် ၂ တၠဏံဂှ် ဒှ်ကောန်ပၞာန် မၚ်ကၚ်ဒမၠုက် ဗ္ဒာဲကွာန်နှေဟ်ဗဒဝ်တုဲ အခိၚ်ဍေံတံ တိတ်ရာန်ဖျာဂှ် ရဲပၠန်ဂတး ၂ တၠတံ ဍံၚ်ဗက်ကၠုၚ် နကဵုကွဳလိုန်ဓါတ်တုဲ ပန်ဏာလဝ်ရောၚ်။
ဟိုတ်နူဒးဒုၚ်ပန်ကဵုသေနာတ်တုဲ အကြာပ်ဇၞော် ၂ တၠ ချိုတ်အာ အပ္ဍဲဒၞာဲဒှ်ဟိုတ်မွဲလန်ဓဝ်တုဲ၊ ဇွဂှ်တှ်ေ နူဒပ်ပၞာန်ဗၟာ ကၠုၚ်ကပှ်ဏာတုဲ ဗလံၚ်ဏာဇရေၚ်အပ္ဍဲဒပ်ဍေံတံရောၚ် သ္ဂးရ။
အကြာပ်ဇၞော် ၂ တၠ မဒးဒုၚ်ပန်ဂစိုတ်တံဂှ် နူကဵုဒပ်အမၠံက် ၃၁၈ ဖျေံသ္ဇိုၚ် ပ္ဍဲကွာန်အၜေတ် ပွိုၚ်ဍုၚ်မုဟ်ဍုၚ်၊ ဒှ်အကြာပ်ဇၞော်ဒပ်ပါ် သဝ်ဝေန် ကဵု အကြာပ်ဇၞော် အံၚ်အံၚ်တံ မဒှ်ရ။
ကြဴနူအကြာပ်ဇၞော် ၂ တၠ ဒးဒုၚ်ပန်ဂစိုတ်တုဲ၊ ပ္ဍဲသ္ကုတ်ဂၠံၚ် အကြာကွာန်နှေဟ်ဗဒဝ်ကဵု ကွာန်အၜေတ်တံဂှ် နူဒပ်ပၞာန် သုၚ်စောဲဇြဟတ်ဗွဲမဂၠိုၚ် ပတေၚ်လဝ်ပရေၚ်ဂီုကၠီုတုဲ ဗက်မာတ်ဆိုအ်စၟဳစၟတ်မံၚ်ရောၚ် ညးဒေသတံ ဟီုလဴဂှ် ဂွံတီကေတ်ရ။
ကွာန်နှေဟ်ဗဒဝ် အကြာပ်ဇၞော် ၂ တၠ ဒးဒုၚ်ပန်ဂစိုတ်ဏံဂှ် ဒှ်မံၚ်ဒၞာဲ ဒေသဗော်ဍုၚ်မန်တၟိ ဗ္တိုက်သရိုဟ် တၠအဝဵုပၞာန် NMSP AD တံ အဓိကချဳဒရာၚ်မံၚ် ပရေၚ်ပၞာန် မဒှ်ရ။
အပ္ဍဲဂိတုမေ ၂၅ တုဲကၠုၚ်တေံလေဝ် ပ္ဍဲအရာပ်မဟနိ ဍုၚ်ကမာဝက် ပွိုၚ်ဍုၚ်မုဟ်ဍုၚ်ဂှ် က္ဍိုပ်သ္ကိုပ်ဒပ်မၚ်ကွာန် ဥူကျဝ်မျေတ် ဒးဒုၚ် လုပ်ပန်ကဵုသေနာတ် အပ္ဍဲသ္ၚိတုဲ ချိုတ်အာလဝ်နွံမံၚ်ကီုရ။
ပရိုၚ် – သြင်လောန်တိုၚ်မ်
Photo – Social Media