တနၚ်သဳ၊ ဂိတုဂျောန် ၈
အပ္ဍဲကဵုရးတနၚ်သဳ ဗ္ဒာဲဍုၚ်မဝ်တံၚ် ပယျဵုဗၟာ-သေံဂှ် ဟိုတ်နူ ဒပ်ကဝ်မယှေန်ပၞာန် ထပက်မံၚ်ကရောၚ်ပၞာန်တုဲ ညးဒေသ လၟိဟ်လ္ၚီပြၚ် ထောံသ္ရိဌာန် ဒးဂြိပ်ပါဲမံၚ်ဘဲပၞာန်ရောၚ် ဂွံတီကေတ် နူခရိုၚ်ဗိက်-ထဝါဲ KNU ရ။
စနူဂိတုမေ သတ္တဟလက်ကရဴအိုတ်တေံဂှ် ဒပ်ကဝ်မယှေန်ပၞာန် ကလေၚ်သီဂွံလဝ် ဍုၚ်မဝ်တံၚ်တုဲ နကဵုဇြဟတ်ဗွဲမဂၠိုၚ် ကရောၚ်ပၞာန် ထပက်တိုန်ကၠုၚ် ဇရေၚ်ပွဳဗွိုၚ်ကွာန် ဍုၚ်မဝ်တံၚ်တံ မဒှ်ရ။
ဒပ်ကဝ်မယှေန်ပၞာန် ထပက်ကရောၚ်ပၞာန် လုပ်ကၠုၚ်လဝ် ဂိတုမေ ၂၅ တေံဂှ် စိုပ်ကၠုၚ်အပ္ဍဲကွာန်တကဝ်ဖဝ်လူ ဍုၚ်မဝ်တံၚ်တုဲမှ စံၚ်ပလီုဏာ ဘာဗတောန်လိက်၊ ဘာကျာ်ကဵု သ္ၚိဌာန်ညးဒေသ ၁၃ မတံရ။
ဟိုတ်နူ ဒပ်ကဝ်မယှေန်ပၞာန် ထပက်ကရောၚ်ပၞာန်ဂှ် ညးဒေသကွာန် တကဝ်ဖဝ်လူ လၟိဟ် ၁၀၀၀ ပြၚ်တံ ထောံသ္ၚိဌာန်ဒၞာဲဝါဲတုဲ ဒးဂြိပ်ပါဲ ဒဴမံၚ်ဒၞာဲဗၠးဘဲအန္တရာဲတံရောၚ် ညးတာလျိုၚ်လလောၚ်ပရိုၚ် ခရိုၚ်ဗိက်-ထဝါဲ KNU ဟီုလဴကဵု ဌာန်ပရိုၚ်သြင်လောန်တိုၚ်မ် ရ။
ညးဒေသ ကွာန်တကဝ်ဖဝ်လူတံဂှ် စနူပွဳပွူသၞာံ ၁၉၉၀ တေံ ဟိုတ်နူ ပေါဲဗတိုက်ဒှ်တုဲ ဒးဂြိပ်ပါဲဘဲပၞာန် လပါ်ဍုၚ်သေံတုဲ စိုပ်သၞာံ ၂၀၁၂ ဂှ် အလဵုအသဳ ကဵု KNU တံ ပ္ညဳပ္ညပ်ဂွံတုဲ ပ္ဍဲဒၞာဲတိ ၃၀၀၀ ဨကဂှ် ကလေၚ်ဒက်ပတန်ကွာန်တုဲ ကလေၚ်ဖျေံလဝ်ကဵုဒၞာဲ သွက်ရဲပါဲဘဲပၞာန်တံရောၚ် သ္ဂောံတီကေတ်ရ။
သၞာံတုဲကၠုၚ်တေံ ဂိတုနဝ်ဝေမ်ဗါ ၁၄ ဂှ် နူကဵုဒပ်ပံၚ်တောဲ KNLA တံ ဗတိုက်သီကေတ်လဝ် ဍုၚ်မဝ်တံၚ်တုဲ၊ ကြဴနူဂှ် သွက်ဂွံကလေၚ်ဂွံ မဝ်တံၚ် ဒပ်ပၞာန်ဗၟာ ထပက်ပၞာန်ကီုလေဝ် အကြာပွဳဗွိုၚ် ကွာန်သိၚ်ခေါန်၊ ကဵု ကွာန်ဗတဳဗုတံဂှ် ဒးဒုၚ်မာတ်ဆိုအ်မံၚ် ဂၠိုၚ်ကဵုဂိတု ကီုရောၚ်။
ကြဴနူဂှ် နကဵုဇြဟတ်ဗလးတိကောန်ပၞာန် ၅၀၀ ပြၚ်စကာလဝ်တုဲ ဒပ်ကဝ်မယှေန်ပၞာန် ကြဳဗုမ်ဗတိုက်ကဵုၜၚ်ကျာ အဆက်က်ကၠောန် တုဲမှ ပ္ဍဲဂိတုမေ ၁၉ တုဲကၠုၚ်ဏံ ကလေၚ်သီဂွံ ဍုၚ်မဝ်တံၚ်မာန်ရ။
ပရိုၚ် – သြင်လောန်တိုၚ်မ်
Photo – KNU