ဗေကျေန်၊ ဂျောန် ၈
ပ္ဍဲဍုၚ်ဗၟာ သွက်သ္ဂောံသၠုၚ်အသိၚ် လၟေၚ်ကမၠောန်ပရေၚ်ၜိုဟ်လလမ် အပ္ဍဲဍုၚ်ကဵု ပရေၚ်ဖောအ်ဗြဳတံဂှ် ဂစာန်ထမံက်အာရုပ်ရဴမဒှ်တုဲ၊ နူကဵုလပါ်ဍုၚ်ကြုက် သဘဴကဏ္ဍ ရေၚ်တၠုၚ်လပါ်ခိုဟ် ညံၚ်သ္ဂောံ ဆက်ပါလုပ်အာဂှ် စၟဳစလဝ်ရောၚ် ဝန်ဇၞော်ပရေၚ်ဍုၚ်သအာၚ် အလဵုအသဳပၞာန် ဟီုရ။
ကမ္မတဳဗဟဵု ဗော်ကောန်မျူနေတ်ကြုက် ဂကောံဗျူရိုပရေၚ်ကွာန် ဝန်ဇၞော်ပရေၚ်ဍုၚ်သအာၚ် ဝမ်ယိ ကေုာံ ဝန်ဇၞော်ပရေၚ်ဍုၚ်သအာၚ် အလဵုအသဳပၞာန် ဥူတေန်မိုၚ်သွိုယ်တံ ပ္ဍဲဂိတုဂျောန် ၅ ဂှ် ဆဵုဂဗသဳကၠဳလဝ် ပ္ဍဲဍုၚ်ဗေကျေန်တုဲ ဟီုဂးလဝ်ဂှ် နူရုၚ်ကလုတ်ကြုက် အပ္ဍဲဍုၚ်ဗၟာ ပတိတ်လဝ် လိက်လလောၚ်တြး ရောၚ်။
ပ္ဍဲကၞောတ်ဂိတုမေတေံ နူကဵုပရေၚ်ဘိက်ပၟိၚ် သ္ကိုပ်ဝန်ဇၞော်အိန္ဒိယဂှ် သမ္မတသီအဝဵု ဥူမေန်အံၚ်လှိုၚ် အာလုပ်စုက်ဆက်ဆောံလဝ် လုပ်ဗဗွဲသၞောဝ်နွံကၠုၚ်တုဲ လတူပရေၚ်ဏံ နူကဵုအလဵုအသဳ ကြုက်လေဝ် ကော်ဆဵုဂဗ ဝန်ဇၞော်ပရေၚ်ဍုၚ်သအာၚ် အလဵုအသဳပၞာန်ကီု မဒှ်ရ။
အပ္ဍဲအရာဆဵုဂဗလဝ်ဏံမ္ဂး ဍုၚ်ကြုက်ကဵု ဍုၚ်ဗၟာ စပ်ကဵု က္ဍိုပ်သ္ကိုပ်အဆံၚ်သၠုၚ်တံ ပရေၚ်ဆက်ဆောံ ကၠောံက္ဍ ဂတးဂတန်နွံမံၚ်ညးသ္ကံကီု မွဲလပါ်ကဵုမွဲလပါ် သွက်ဂွံသၠုၚ်ပတိုန်အာ ဂလာန်ပတေဟ် ပရေၚ်ဍုၚ်ကွာန်တံကီု ပရေၚ်ပံၚ်တောဲ နနဲ မဟာဗျူဟာ ဗွဲမဇြိုဟ်နက်ကီု ပရေၚ်ဖောအ်ဗြဳတောတက် ဍုၚ်ဗမာ ညံၚ်ဂွံကလေၚ်ယာတိုန်က္ဍိုပ်မာန်ဂှ် မိက်ဂွံသၠုၚ်ပတိုန်ကဵုရဂှ် ဝမ်ယိ ဟီုလဝ်ရောၚ်။
တုဲပၠန် သွက်ပရေၚ်ၜိုဟ်လလမ်အပ္ဍဲဍုၚ် ကေုာံ လၟေၚ်ကမၠောန် ပရေၚ်ညဳသာသၟဟ်သၟန် ဗွဲမက္တိုၚ်ကၟိုဟ် ထမံက်မံၚ်ရုပ်ရဴဂှ် ထံက်ဂလာန်တုဲ၊ သီုကဵုပရေၚ်အဝဵုပိုၚ်ပြဳ၊ ပရေၚ်ဂီုကၠီု ကေုာံ ပရေၚ်ဖောအ်ဗြဳ ဖဵုဂုဏ်ပိုန်ဒြပ်တံဂှ်လေဝ် ထံက်အာဂလာန်ရောၚ် သ္ဂးရ။
နူကဵုအလဵုအသဳတၟိဍုၚ်ဗမာဂှ် ပံၚ်တောဲအာမွဲစွံကဵု ဍုၚ်ကြုက်တုဲ သွက်သ္ဂောံသၠုၚ်ပတိုန်အာ ပရေၚ်ဆက်စၠောံက္ဍိုပ်သ္ကိုပ်တံကီု သွက်သ္ဂောံထပ်ကဵုအာဇြဟတ်ဟရိုဟ် ပရေၚ်သိုၚ်ခၞံ စင်္ကြံ ပရေၚ်ပိုန်ဒြပ် ကြုက်-ဗၟာ ညံၚ်ဂွံအံၚ်ဇၞးဂှ် ဆန္ဒနွံမံၚ်ရောၚ် ဝန်ဇၞော်ပရေၚ်ဍုၚ်သအာၚ် ဥူတေန်မိုၚ်သွိုယ် ဟီုရ။
ကမၠောန်လီသြန် (ကျာဖျ) တံဂှ် နကဵုဍုၚ်ဗၟာ ဆက်ဗတိုက်သရိုဟ် အာတုဲ ပရေၚ်ဂီုကၠီုကောန်ဍုၚ်ကြုက် နွံဍုၚ်ဗမာတံကီု၊ ဂကောံ၊ ကိုန်အစဳဇန်နွံမံၚ် အပ္ဍဲဍုၚ်ဗၟာတံဂှ် ၜိုတ်အစောန်နွံ စဵုဒၞာမင်မွဲကဵုအာ ပေၚ်ၚ်ရောၚ် သ္ဂးရ။
ဣဏအ်ဝွံ ပ္ဍဲအရာကဏ္ဍ ပရေၚ်ကူသာန်ဗၞိက်တံကဵု ဓလိုက်တမ်ရိုဟ် တံဂှ် သွက်သ္ဂောံသၠုၚ်ပတိုန်အာ ဇြဟတ်ပရေၚ်ပံၚ်တောဲကီု ကိုန်အစဳဇန်အဓိကတံ ညံၚ်သ္ဂောံညိၚ်ဝပ်အာကီု ဒေသပယျဵုကြုက်-ဗၟာ ညံၚ်ဂွံၜိုဟ်လလမ်ကီုတုဲ ညံၚ်သ္ဂောံဒုၚ်လျိုၚ်ကဵု ဖဵုဂုဏ် ပရေၚ်ပိုန်ဒြပ်ကြုက်တံ အတိုၚ်ဝမ်ယိ ဟီုလဝ်ဂှ် နူလပါ် အလဵုအသဳပၞာန် ကလေၚ်ဟီုခၠေဝ်ကဵုလဝ်ရောၚ်။
သွက်ပရေၚ်ၜိုဟ်လလမ်ကေုာံ ဖောအ်ဗြဳပိုန်ဒြပ်ပရေၚ်မၞိဟ် နိဂီုဍုၚ်ဗၟာဂှ် နူဍုၚ်ကြုက် ညံၚ်ဂွံဆက်ရီုဗၚ်အာကီု ပ္ဍဲအရာ ပရေၚ်ကေၚ်ကာဒေသကဵု ဂၠးကဝ်တံလေဝ် အကြာဍုၚ်ၜါလပါ် ဂတးဂတန် ထံက်ဂလာန် ဒတူလိုၚ်အာမွဲစွံတုဲ သွက်ဂွံသၠုၚ်တိုန်အာ ပရေၚ်ပံၚ်တောဲတံဂှ် တုပ်လဝ်စိုတ်ရောၚ် နူကဵုအလဵုအသဳပၞာန် လလောၚ်တြးလဝ်ရ။
ပရိုၚ် – သြင်လောန်တိုၚ်မ်
Photo – MOI