ဗြဝတဳ၊ ဂျောန် ၉
အပ္ဍဲပယျဵု ဗၟာ-သေံ ဍုၚ်ဗြဝတဳ နူကဵုဒပ်ကဝ်မယှေန်ပၞာန် ဗက်ဂၠိုက်ဂၠာဲရပ်ဒၟံၚ်ကပေါတ်ဗၞိက်သေံ စေအ်စေအ်တုဲ ပ္ဍဲဒဒန် လၟိဟ် ၂ ဂှ်လေဝ် ကပေါတ်ပၠုပ်နၚ်နူဍုၚ်သေံဂှ် ဟွံကဵုအခေါၚ်တတ်ကၠုၚ်ဏီပုဟ် ညးလ္တူဍုၚ်တံ ဟီုလဴကဵု ဌာန်ပရိုၚ်သြၚ်လောန်တိုၚ်မ်ရ။
ကၠာဟွံစိုပ် ကိုန်အစဳအဇန် ပွိုၚ် ၁၀၀ တ္ၚဲဂှ် အပ္ဍဲတွဵုရးကရေၚ် ဍုၚ်ပယျဵုဗြဝတဳ၊ ပွိုၚ်ဍုၚ်ဘာအၚ်၊ ကအ်ကြိက်တံမ္ဂး နူကဵုကဝ်မယှေန်ပၞာန် ရပ်စပ်ကေတ်ကၠုၚ်လဝ်အရေဝ် လတူကပေါတ်သေံ လုပ်ကၠုၚ်နူဒေသပယျဵုတံ နွံကၠုၚ်လဝ်တုဲ ပ္ဍဲကာလကိုန်အစဳအဇန် ပွိုၚ် ၁၀၀ တ္ၚဲဏံပၠန်လေဝ် ပရေၚ်ရပ်စပ် ကပေါတ်သေံတံ ပဵုတုဲဂၠိုၚ်တိုန်ကၠုၚ် နူကၠာတေံဏီရောၚ် ညးဍုၚ်ကွာန်ဗြဝတဳတံ သ္ဂးရ။
အပ္ဍဲအခိၚ်ကိုန်အစဳအဇန် ၁၀၀ တ္ၚဲဏံမ္ဂး နူကဵုကဝ်မယှေန်ပၞာန်တံ ဗက်ဂၠိုက်ဂၠာဲစၟဳစၟတ်ရပ်ကေတ်ဒၟံၚ် ဒၞာဲအရာပ်ခြိုၚ်စွံလဝ်ကပေါတ်သေံ လတူဍုၚ်ဗြဝတီတံတုဲ လပါ်ဂၠံၚ်အာယှ ဗြဝတဳ-ကအ်ကြိက်ဂှ် ယဝ်ရဖ္ဍိုက်ဏာ ကပေါတ်သေံ လတူကွဳစက်အာတရဴတံမ္ဂး ရပ်သီကေတ်ဒၟံၚ်ရောၚ် ဂွံတီကေတ်နူ ရဲဒဳကွဳစက်တံရ။
ကွဳစက်အာတရဴ စှ်ေကၠုၚ်နူဗြဝတံတံဂှ် ကပေါတ်သေံပါ၊ ဟွံပါဂှ် နူကဵုဂကောံကဝ်မယှေန်ပၞာန် ပ္ဍဲကဵုဒၞာဲဇုမ်ဗၞိက်၊ ဂိက်ညဳနံၚ်၊ ဂိက်ဒဒန်ကျဝ်၊ ဂိက်ဒဒန်ၜဳဂြၚ်၊ ဂိက်စၟဳစၟတ်ကၠဍောတ်ကေုာံ ဂိက်စၟဳစၟတ်လုပ်တိတ် ဍုၚ်ဘာအၚ်တံ သီုဖအိုတ်ဂှ် ဂၠိုက်ဂၠာဲစၟဳစၟတ်မံၚ်တုဲ ယဝ်ရဖ္ဍိုက်ဏာကပေါတ်သေံတံမ္ဂး ရပ်သီဏာသၟးဟွံက ဟွံမိက်ဒုၚ်ရပ်မ္ဂး ဒးကဵုဒၟံၚ်သြန်ဗွဲမဂၠိုၚ် ဒှ်မံၚ်ရ။
ဟိုတ်နူကဝ်မယှေန်ပၞာန် ရပ်ဒၟံၚ်ကပေါတ်သေံ ဂၠိုၚ်တိုန်ကၠုၚ်တုဲ ဗွဲမဂၠိုၚ်တံမ္ဂး အာလပါ်ဒေသ ဂကောံရပ်လွဟ်ကရေၚ် ပရေၚ်ၜိုဟ်လလံထိၚ်ချုက်လဝ် ဂၠံၚ်လတူဒဵု ထိုအ်ကဝ်ကိုဝ်၊ ဂၠံၚ်လတူဒဵု ၁၀၁၈ ကေုာံ ဂၠံၚ်တေကတေံ (ဒဵုခၟာဲစၚ်) တံဂှ်ဖ္ဍိုက်ဏာကပေါတ်သေံတံတုဲ ဂေတ်ပါဲအာလဝ် ဂိက်စၟဳစၟတ်ဒပ်ပၞာန်တံဂှ်ကီု ဟွံသေၚ်မ္ဂးဒးကဵုသြန်တုဲ ဒးအာကၠုၚ်ဒၟံၚ်ရောၚ် ညးဒေသတံ သ္ဂးရ။
အပ္ဍဲကဵု တရဴဂၠံၚ်ဍာန်ဗၞိက် အရာကိစ္စဇၞော် ဂၠံၚ်အာယှ ဗြဝတဳ-ကအ်ကြိက် ကေုာံ ဒဒန် သေံ-ဗၟာ လၟိဟ် ၂ တံဂှ် သွက်ဂွံပလံၚ်ဗစိုပ် ကပေါတ်ဗၞိက်ဒေသပယျဵုဂှ် ၜိုန်ရကဝ်မယှေန်ပၞာန် ကလေၚ်ပံက်ကဵုလဝ်ကီုလေဝ် နူကဵုဍုၚ်ဗၟာဂှ် ပလံၚ်မံၚ်ကပေါတ်ပတိတ်လဝ် သွက်ဂွံပလံၚ်ဍုၚ်သေံသၟးနွံတုဲ ကပေါတ်လုပ်ကၠုၚ်နူသေံတံဂှ် ဟိုတ်နူ ဖျေံကဵုလဝ်လာၚ်ဇြေန်ဟၟဲဏီတုဲ ဟွံကဵုအခေါၚ်လုပ်ဍုၚ်ပုဟ် ရဲဍုၚ်ဗြဝတဳမွဲတၠ သ္ဂးရ။
ဒဒန်ကၠောံပယျဵု သေံ-ဗၟာ လၟိဟ် ၂ ပံက်ကဵုလဝ်ဂှ် လံကၠုၚ် ပွိုၚ်မွဲသတ္တဟပြၚ်ကီုလေဝ် ကပေါတ်သေံတံဂှ် နူကဵုကဝ်မယှေန်ပၞာန် ဟွံကဵုအခေါၚ်လုပ်ဏီတုဲ ကပေါတ်ပၠုပ်နၚ်နူဍုၚ်သေံ ဟွံဂွံစိုပ်ဏီဂှ်လေဝ် ကပေါတ်နူဍုၚ်ဗၟာ မွဲစြေက်ဓဝ်ရ ပၠုပ်ပလံၚ်ဏာမံၚ် လပါ်ဍုၚ်သေံတေံနွံတုဲ ပ္ဍဲဇုမ်ဗၞိက်ဍုၚ်ဗြဝတဳမ္ဂး ကွဳစက်ဖ္ဍိုက်ကပေါတ်သၠးသၠး ဗွဲမဂၠိုၚ် ရေၚ်ဆိုအ်မၚ်မံၚ်ကပေါတ်ဗၞိက်တံဂှ် ဂွံဆဵုမံၚ်ရောၚ် ညးဒေသလ္တူဍုၚ်တံ ဟီုရ။
ကဝ်မယှေန်ပၞာန်တံဂှ်မ္ဂး နူပယျဵုဗြဝတဳ သွက်ဂွံပလံၚ်ပ္တိတ်ကပေါတ် ဗၞိက်ဇရေၚ်ဍုၚ်သေံဂှ် ဂွံလဝ်အခေါၚ်တုဲ သတ်ဂန် ၊ ကသိုဏ်ဗ္တာၚ်၊ သတ်ထဝ်ဗါတ်၊ သတ်၊ မိတ်ဟေနက် ကေုာံ ကသိုဏ်တံ ဗွဲမဂၠိုၚ် ပလံၚ်ဏာလဝ်နွံတုဲ နကဵုလာၚ်ဇြေန်ပၠုပ်ကပေါတ် ၚုဟ်မးသြန် ၜါတ်သေံ ၆၂၀ ပြကောတိကိုတ်ဂှ် ဂွံလဝ်အခေါၚ်ရောၚ် ပ္ဍဲဂိတုဂျောန် ၁ ဂှ် တြးဝါဒ လလောၚ်တြးလဝ်ရ။
ပရိုၚ် – သြင်လောန်တိုၚ်မ်
Photo – MOI