မတ်မလီု၊ ဂျောန် ၉
သွက်ဗော်ညဳသၟဟ်မန် တၠဆန္ဒမာဲ ညးကဵုလဝ်အရီုဗၚ် ထပေၚ်ကဵုလဝ် ဇြဟတ်တံဂှ် သွက်ဂွံရေၚ်တၠုၚ်ကဵု ပရေၚ်ညးဍုၚ်ကွာန်တံမာန် ရန်တၟအ်တုဲ ရုၚ်ဗော်ညဳသၟဟ်မန် ပွိုၚ်ဍုၚ်မတ်မလီု ပံက်လဝ်တုဲယျဂှ် နူကဵုဗော် ကဵုသမ္တီလလောၚ်တြးဏာရ။
ပ္ဍဲကဵုဍုၚ်မတ်မလီု အရာပ်မျာၚ်သာယာ ဂၠံၚ် ၁၉ ဂှ် ဆက်စပ်ကဵုရုၚ်ဗဟဵုဗော်တုဲ ပံက်လဝ်ရုၚ်ဗော်ညဳသၟဟ်မန် ပွိုၚ်ဍုၚ်မတ်မလီု မဒှ်ရ။
အပ္ဍဲဂိတုဂျောန် ၇ ဂှ် စပံက်လဝ်ရုၚ်ပွိုၚ်ဍုၚ်ဗော်တုဲ ကမၠောန်ညးဍုၚ်ကွာန်တံဂှ် ၜိုတ်အစောန်နွံ ညံၚ်ဂွံကၠောန်သ္ပ ရေၚ်တၠုၚ်ဖ္ဍိုက်ဗပေၚ်အာမာန် ပံက်စွံလဝ်ရုၚ်ဏံရောၚ် ပ္ဍဲကဵုလိက်လလောၚ်တြး ဟီုလဴလဝ်ရ။
ဟိုတ်ဂှ်ရ နကဵုမိမညးဍုၚ်ကွာန်တံ ကေတ်အဆက်ကဵု ရုၚ်ဗော်ညဳသၟဟ်မန် (မတ်မလီု) တိုက်ရိုက်တုဲ ပံၚ်တောဲရေၚ်တၠုၚ် ကၠောန်အာမွဲစွံဂွံမာန်ရောၚ် ကဵုသမ္တီ ဗ္တိုက်ဖအောဝ်ဏာရ။
မွဲလ္ပာ်ဂှ်လေဝ် ပ္ဍဲကဵုပေါဲရုဲမာဲတုဲကၠုၚ်ဏံမ္ဂး ဗော်ညဳသၟဟ်မန် ဂွံလဝ်မာဲဇၞးကၠုၚ်လဝ်ပိုတ်တ်သ္ကုတ်တ် ဒၞာဲဗွဲမဂၠိုၚ် အပ္ဍဲပွိုၚ်ဍုၚ်ပံၚ်၊ ၜါသွာၚ်၊ မုဟ်ဍုၚ်၊ ဇြပ်ဗုကဵု ရေဝ်တံဂှ်လေဝ် ပံက်စွံလဝ် ရုၚ်စၠတ်ထဝ်ညးစၞးအမာတ်တံ နွံမံၚ်ကီုရ။
ဟိုတ်နူပရေၚ်တံဏံတုဲ အပ္ဍဲဒေသမန်မ္ဂး အရာပရေၚ်နွံပၟိက် အပ္ဍဲဒေသတံကီု အခက်အခုဲပြသၞာ ဒးဇီုကပိုက်မံၚ်တံဂှ် နကဵုညးဍုၚ်ကွာန်တံ ကၠုၚ်သဳကၠဳပ္တိုန်ထ္ၜးအိုတ်ညိဂှ် ညးစၞးစၠတ်ထဝ် ဗော်ညဳသၟဟ်မန်တံ ကော်ဘိက်လဝ်ရောၚ်။
ဒပ်ပၞာန်ပၠတရဴသ္ကိုပ်သ္က ကၠောန်ကဵုလဝ်ပေါဲရုဲမာဲဗော်နာနာ တုဲကၠုၚ်ဏံ နကဵုဗော်ညဳသၟဟ်မန် ဂွံဇၞးလဝ်မာဲဂှ် ညးစၞးစၠတ်ထဝ်ညးဍုၚ်ကွာန် ၅ ဒၞာဲ၊ ညးစၞးစၠတ်ထဝ်ကောန်ဂကူ ၅ ဒၞာဲ ကေုာံ ညးစၞးစၠတ်ထဝ်တွဵုရး ၇ ဒၞာဲတုဲ ဒှ်မံၚ်ဗော်ဖျေံလဝ်သဇိုၚ် အပ္ဍဲကဵုတွဵုရးမွဲရ။
ပရိုၚ် – သြင်လောန်တိုၚ်မ်
Photo – MUP