မတ်မလီု၊ ဂျောန် ၉
အပ္ဍဲကဵုတွဵုရးမန် ကွဳစက်မှာန်လုၚ် ပလံၚ်ဗစိုပ်ညးအာတရဴတံ ညံၚ်ဟွံဂွံဖ္ဍိုက်ဏာကပေါတ်ဗၞိက်သေံတံဂှ် နူကဵုကမ္မတဳထိၚ်ကြာပ် ကမၠောန်ကွဳစက်တွဵုရး သၟဝ်တဲအလဵုအသဳပၞာန်တံ ကဵုလဝ်သတိရောၚ်ဂှ် ညးတၠကမၠောန်လာၚ်ကွဳစက်တံ ဟီုလဴကဵုဌာန်ပရိုၚ်သြၚ်လောန်တိုၚ်မ်ရ။
နူကဵုကွဳစက်လာၚ် ဖ္ဍိုက်ပတိုန်ဏာကပေါတ်ဗၞိက်ဟွံလုပ်သၞောဝ်တံဂှ် ဟိုတ်နူစၟဳစၟတ်ဆဵုညာတ်လဝ်တုဲ နကဵုစၟတ်တ္ၚဲ ဂိတုဂျောန် ၅ အတိုၚ် ပေါဲကောံဓရီုပ္ညဳပ္ညပ်ပရေၚ်ကမၠောန် ဂကောံတၟေၚ်ဗတိုက်ဖအး ပရေၚ်ဗၞိက်ဟွံလုပ်သၞောဝ် တွဵုရးမန် ကဵုကၠုၚ်သတိ မဒှ်ရ။
တုဲပၠန် လ္တူတၠကွဳစက်ကဵု ညးတာလျိုၚ်ကွဳစက်လာၚ် ဖ္ဍိုက်ဏာကပေါတ်ဗၞိက်သေံ ဟွံလုပ်သၞောဝ်တံဂှ်လေဝ် ကေတ်အာအရေဝ် ပိုတ်တ်သ္ကုတ်တ်ကီုတုဲ ထိၚ်ကြာပ်အာ ညံၚ်ဟွံဂွံဖ္ဍိုက်ဏာကပေါတ်ဗၞိက် ဟွံလုပ်သၞောဝ်တံဂှ်ရောၚ် သ္ဂးရ။
ယဝ်ရ ဖ္ဍိုက်ဏာကပေါတ်ဗၞိက်သေံမ္ဂး ကေတ်အာအရေဝ်ပိုတ်တ်သ္ကုတ်တ်ရောၚ် ဟီုကီုလေဝ် ဗီုလဵုကေတ်အာအရေဝ်ရောဂှ် ဟွံဂွံတီလဝ်ဏီပုဟ် ညးတၠကွဳစက်လာၚ်မွဲတၠဂှ် ဟီုလဴကဵု ဌာန်ပရိုၚ် သြၚ်လောန်တိုၚ်မ်ရ။
“ကပေါတ်ဗၞိက် ခုတ်စၟတ်လဝ်ဂှ် ဒှ်ကပေါတ်သေံတံသၟးရ။ ကပေါတ်နူအပ္ဍဲဍုၚ်ဏံ ဟွံပါပုဟ်။ လာၚ်ကွဳစက် ကွဳစက်ဖ္ဍိုက်မံၚ် ကပေါတ်သေံတံဂှ်ရ။ ယဝ်ရဖ္ဍိုက်ဏာတုဲ အခိၚ်စၟဳစၟတ်ဂှ် ဆဵုမ္ဂး ကေတ်အရေဝ် ပိုတ်တ်သ္ကုတ်တ်ဏောၚ်။ နကဵုဗီုပြၚ်လဵု နကဵုၝောံပိုဒ်လဵု ဂွံကေတ်အရေဝ်ဂှ် ပိုဲတံလေဝ် ဟွံဂွံတီလဝ်ဏီပုဟ်” သာ်ဝွံ သ္ဂးရ။
တုဲပၠန် ပြဟ်ဟ်ဏံ ကွဳစက်လာၚ်ဗွဲမဂၠိုၚ် အဓိကဖ္ဍိုက်ပတိုန်ဏာမံၚ်ကပေါတ်ဗၞိက်တံဂှ် ဂၠိုၚ်နူကဵု မၞိဟ်အာတရဴတံဏီတုဲ လၟုဟ်ကၟာတ်ထောံအခေါၚ်ဖ္ဍိုက် ကပေါတ်သေံတံဗီုဏံမ္ဂး ဒှ်အခက်အခုဲရောၚ် ညးဆက်ဟီုရ။
ကပေါတ်ဟွံလုပ်သၞောဝ်ဂးတုဲ ဟိုတ်နူ ဟွံကဵုအခေါၚ်ဖ္ဍိုက် ကပေါတ်သေံတံတုဲ ပ္ဍဲဍုၚ်လ္ဂုၚ်ကဵု ဍုၚ်တၞဟ်ဟ်တံမ္ဂး ၚုဟ်ကပေါတ် သေံတံ ထပ်တိုန်အာသၟးဟွံက ဒးဇီုကပိုက်အာကဵုပရေၚ်ကပေါတ်တံ ပိုတ်အိုတ်အာမာန်ရောၚ်ဂှ် သၟာဗၞိက်တံ သ္ဂးရ။
မွဲလ္ပာ်ဂှ်လေဝ် ဂကောံဌာနနာနာ ရဲသၟဝ်တဲအလဵုအသဳပၞာန်တံဂှ်ပံၚ်ကောံတုဲ ဗက်ရပ်ဒၟံၚ်ကပေါတ်သေံ အပ္ဍဲကဵုရုၚ်ခြိုၚ်ကပေါတ်တံ ဂှ်ကီု ဒၞာဲသၞေဟ်ဂိက်ကွဳစက်၊ ဒၞာဲဂိက်စၟဳစၟတ်လုပ်တိတ်ဍုၚ်တံသၟးဟွံက ပ္ဍဲဂိက်ညံၚ်ခါယှေလေဝ် သုၚ်စောဲစက် X-Ray တုဲ ရပ်ဒၟံၚ်ကီုရောၚ်။
ကပေါတ်ဟွံလုပ်သၞောဝ်ဂးတုဲ ဒၞာဲဗက်ရပ်မံၚ်ကပေါတ်သေံတံဂှ် သီကေတ်ဏာကပေါတ်ကီု၊ သီကေတ်ဏာ သီုကွဳစက် ဖ္ဍိုက်ကပေါတ်တံသၟးဟွံက ညးဖ္ဍိုက်နၚ်ကပေါတ်တံဂှ်လေဝ် ရပ်စပ်ကေတ်အာအရေဝ်ကီုရောၚ် ဗက်ကၠောန်လဝ် မဒှ်ရ။
တွဵုရးမန်ဝွံ ကပေါတ်တိတ်နူကဵုဍုၚ်သေံ မပ္တံ စၞစသဇိုၚ်၊ ကပေါတ်သုၚ်စောဲမၞိဟ်နာနာကီု၊ ဂဥုဲ၊ ကပေါတ်ကျိုၚ်ပယျေဝ်၊ ကပေါတ်သိုၚ်ခၞံတံကီု ကပေါတ်သုၚ်စောဲနာနာသာ်တံဂှ် ပၠုပ်နၚ်နူပယျဵုတုဲ နူဂှ်မွဲကဆံၚ် ပလံၚ်ဏာဒၟံၚ်ဍုၚ်လ္ဂုၚ်ကဵု ဍုၚ်ဇၞော်တၞဟ်တံရောၚ်။
သတၚ် – သြင်လောန်တိုၚ်မ်
Photo – CJ