ပကောံဇြဟတ်ပၞာန်သၟးဟွံက ပ္ဍဲပရေၚ်ကလုတ်တမာန်လေဝ် SCEF သၠုၚ်ပတိုန်လဝ်အသိၚ်

မတ်မလီု၊ ဂျောန် ၉


ကံၚ်သဳက္ဍိုက်ပ်ထမံက်ပတိုန် ပရေၚ်ကၟိန်ဍုၚ်ပံၚ်ကောံဖေဝ်ဒရယ် ဒဳမဝ်ကရေဇြဳ SCEF ဒက်ပ္တန်လဝ်နကဵု အလဵုအသဳညဳသၟဟ်ဂကူ NUG၊ CRPH ကေုာံ မဟာမိတ်ကောန်ဂကူ K3C တံဂှ် ပ္ဍဲအခိၚ်လၟုဟ် ပကောံမံၚ်ဇြဟတ်ပရေၚ်ပၞာန်သၟးဟွံက အပ္ဍဲပရေၚ်ကလုတ်တမာန်တံလေဝ် သၠုၚ်ပတိုန်ဒၟံၚ်အသိၚ်ရ။

တုဲကၠုၚ်ကၞောတ်ဂိတုမေဏံ စပ်ကဵုအကာဲအရာဍုၚ်ဗမာတုဲ ဂကောံညးစၞး SCEF အာလဝ်တရဴ ဍုၚ်ကနေဒါဂှ် ဆဵုဂဗသဳကၠဳလဝ်ကဵု ညးတာလျိုၚ်အလဵုအသဳ ကေုာံစၠတ်ထဝ်တံရောၚ် လလောၚ်ပ္တိတ်လဝ်ပရိုၚ်ရောၚ်။

တုဲပၠန် ပ္ဍဲဂိတုဂျောန် ၅ ဂှ်လေဝ် စပ်ကဵုပရေၚ်ဍုၚ်ဗမာတုဲ ဆဵုဂဗလဝ်ကဵု ညးစၞး ၂၄ ဍုၚ် ညးစၞးဂကောံဂၠးကဝ် ကလုတ်တမာန် လ္ၚဵုတံဂှ် ကၠောန်လဝ်ပေါဲသောၚ်ကလး စပ်ကဵုကလုတ်တမာန်မွဲရ။ ဆဂး ဍုၚ်လဵုပါလုပ်မံၚ်ရောၚ်ဂှ် ချူထမံက်ထ္ၜးလဝ်ဟွံမွဲပုဟ်။

အပ္ဍဲကဵုပေါဲသောၚ်ကလး စပ်ကဵုအကြေပ်ဂြတ်ပရေၚ်ဍုၚ်ဗမာဝွံ အခက်အခုဲပဋိပက္ခရပ်လွဟ် ဟွံသေၚ်မ္ဂး အကာဲအရာ ပရေၚ်ရီုဗၚ်ကာမံက်တိုန်ပရေၚ်မၞိဟ် နကဵုမွဲသာ် သ္ၚဳဂၠိပ်ကေတ်ဟွံဂွံပုဟ်ဂှ် ညးစၞး SCEF တံ ဟီုလဴလဝ်ရောၚ်။

ပြဟ်ဟ်ဏံ ပရေၚ်ပြံၚ်လှာဲပရေၚ်ဍုၚ်ကွာန် ဗွဲမဇြိုဟ်နက်မွဲဂှ် ဍုၚ်ဗမာတတ်ကၠောံအာမံၚ်တုဲ သွက်ဂွံသောၚ်ကလးအာ ပရေၚ်တင်သၟာန် စပ်ကဵုပရေၚ်အုပ်ဓုပ်၊ ပရေၚ်လုပ်သၞောဝ်၊ ပရေၚ်သ္ပစၞးကေုာံ ပရေၚ်အရာဂွံညိၚ်ဝပ်အာ ဗွဲလအိတ်မာန်တံဂှ် နကဵုနဲကဲဂၠာဲသွဟ် ဒးရေၚ်တၠုၚ်အာထေက်ရောၚ် ထံက်ထ္ၜးလဝ်ရ။

တုဲပၠန် ပရေၚ်စဵုဒၞာမၚ်မွဲ ညးဍုၚ်ကွာန်တံကီု၊ ညံၚ်ဂွံက္ဍစိုပ် ပရေၚ်ရီုဗၚ်ဆာန်ဍူမၞိဟ်၊ အရာကိစ္စဇၞော် အပ္ဍဲပရေၚ်ဍုၚ်ကွာန် သွက်ဂွံဂွံပရေၚ်ၜိုဟ်လလံ တန်ကြန်ဗွဲလအိတ်မာန် သၟဝ်အကာဲအရာလၟုဟ်ဏံမ္ဂး ဗီုတင်ကော်ဆောတံနွံမံၚ်ဂှ်လေဝ် သဳကၠဳလဝ်ကီုရောၚ်။

နကဵုလညာတ်လပါ်ခိုဟ် သွက်ဂွံသၠုၚ်ပတိုန် ပရေၚ်ဆက်ဆောံ အကြာမဟာမိတ်အပ္ဍဲဒေသကေုာံ ဂၠးကဝ်တံတုဲ သွက်အနာဂတ်ဍုၚ်ဗမာ မၞုံကဵုပရေၚ်ၜိုဟ်လလံတန်ကြန်ပါလုပ်မာန်သီုဖအိုတ်တုဲ ပတဝ်အာကဵုလတူဂၠံၚ်တရဴ ဆက်သဳကၠဳအာမာန်တံဂှ် ဒှ်အရာပရေၚ်ဂစာန်ရေၚ်တၠုၚ်မံၚ်တံ မွဲကဏ္ဍဍောတ်ကီုရောၚ် ပေါဲသောၚ်ကလး SCEF သ္ဂးလဝ်ရ။

ပၠန်ဂတးတမ်ကညၚ် ကတာ်သၠဒကေဝ်ဇြဟတ်ပၞာန် သွက်ဂွံပြံၚ်လှာဲအာမာန်မ္ဂး ကုဍုၚ်ဇိုၚ်ဝုတ်ဒိုဟ် ကြုက်၊ အိန္ဒိယတံဂှ် ဗီုလဵုဒှ်ဒှ် နကဵု SCEF ညံၚ်ဂွံဆက်ဆောံအာဂှ် ဂၠံၚ်တရဴမူဝါဒတံဒးပံက်လဝ်ထေက်ရောၚ် က္ဍိုပ်သ္ကိုပ်ကွးဘာတြေံ ကိုမေန်တွိုဲတေတ် သ္ၚဳဂၠိပ်လဝ်ရ။

“အခိၚ်လၟုဟ် SCEF ကီု NUG ကီု သွက်ပရေၚ်အပြံၚ်လှာဲ သၠဒကေဝ်ဇြဟတ်ပၞာန်အဓိက ပၠန်ဂတးတမ်ကညၚ် ဍုၚ်ဗၟာမ္ဂး ဍုၚ်ဒးဆဵုဂဗတံဂှ် နွံၜါဂကူရ။ မွဲဂကူဂှ်မ္ဂး ဒှ်ဍုၚ်အပ္ဍဲဒေသတုဲ မွဲဂကူဂှ်မ္ဂး ဒှ်ဍုၚ်ဂၠးကဝ်တံရ။ ဍုၚ်အပ္ဍဲဒေသမ္ဂး ဒှ်ဍုၚ်လ္ပာ်ပလိုတ်အိုတ် အာယှအဂၞဲဏံ ဒှ်မံၚ်ဍုၚ်ဇြဟတ်ဇၞော်အိုတ် ဆက်စပ်ဒၟံၚ်တိဍာ်ကုဒေသအာယှသၠုၚ်ကျာ ကြုက်၊ အိန္ဒိယတံ ၜါဍုၚ်ဏံမ္ဂး ဟွံဆက်ဆောံဟွံဂွံ ဒးဆက်ဆောံအာတုဲ ညံၚ်ဂွံပံက်လဝ်ပၞော်ဂၠံၚ်တရဴ မူဝါဒထေက်ရောၚ်” သာ်ဝွံ သ္ဂးရ။

ဟိုတ်ဂှ်ရ ဒေသပယျဵုဍုၚ်အိန္ဒိယတံဂှ် ဒှ်မံၚ်ဂၠံၚ်တရဴထံက်ပၚ် သွက်ဂကောံပၠန်ဂတး ရးသကိုၚ် ကေုာံ တွဵုရးချင်တံတုဲ ညံၚ်ဟွံဂွံဒှ်ပြသၞာ ကုဒပ်မၚ်ပယျဵုအလဵုအသဳအိန္ဒိယတံဂှ် နကဵုပရေၚ်ကလုတ်တမာန် ဒးဆက်ဆောံအာရောၚ်။ တုဲပၠန် လတူဂကောံရပ်လွဟ်ကောန်ဂကူ ဒေသသေံဇၞော်သၟဝ်ကျာတံဂှ် သြဇာအလဵုအသဳကြုက် ဓလီုလဝ်သၟးဟွံက ပ္ဍဲပၠန်ဂတးတမ်ကညၚ်ဂှ်လေဝ် လုပ်ပါဒၟံၚ် တိုက်ရိုက်ကီုရောၚ်။

ဟိုတ်ဂှ်ရ သွက်ပယျဵု ကြုက်-ဗၟာ ဂွံညိၚ်ဝပ်အာကီု သွက်ဂွံစဵုဒၞာအာကဵု ပရေၚ်ဂုဏ်ဖဵုပိုန်ဒြပ်ကြုက်တံဂှ် နကဵု SCEF ယဝ်ရ ကဵုပရေၚ်ဒုၚ်လျိုၚ်တုဲ ပံက်လဝ်ဂၠံၚ်တရဴပရေၚ်ဆက်ဆောံမာန်မ္ဂး ကတာ်သၠဒကေဝ်ဇြဟတ်ပၞာန်ဂှ် ပြံၚ်လှာဲထောံ တိုက်ရိုက်မာန်ရောၚ် ကိုမေန်တွိုဲတေတ် ထံက်ထ္ၜးလဝ်ရ။

မွဲလ္ပာ်ဂှ်လေဝ် ကုအလဵုအသဳတံဂှ် ယဝ်ရဆက်ဆောံအာကြပ်ကြပ်မာန်မ္ဂး ပရေၚ်ဝေၚ်ပၞာန်ဂကောံပၠန်ဂတး နူဒေသ ရးတနၚ်သဳ၊ ကရေၚ်၊ သေံသၠုၚ်ကျာ၊ ကရေၚ်ဍာဲတံဂှ် ဒှ်အထံက်အပၚ်မွဲမာန်ရောၚ် ညးကဵုလဝ်ကသပ်ကီုရ။

စပ်ကဵုပရေၚ် ဒက်ပကောံဇြဟတ်ပၞာန်တုဲ နကဵု SCEF သွက်ဂွံဖျေံသ္ဂုတ်သွာတ် စပ်ကဵုပရေၚ်ပၞာန်မ္ဂး ကမ္မတဳပ္ညဳပ္ညပ်ပံၚ်ကောံ ဗျူဟာပၞာန်ဂှ် ဒက်ပ္တန်လဝ်က္ဍိုပ်သ္ကိုပ် ၁၀ တၠရောၚ်။ ပ္ဍဲကမ္မတဳဂှ်မ္ဂး ပါဲနူ CRPH တုဲ နူဌာနဝန်ဇၞော်ပရေၚ်စဵုဒၞာ NUG ကေုာံ မဟာမိတ်ကောန်ဂကူ ၄ ဂကောံ၊ က္ဍိုပ်သ္ကိုပ်ပၞာန် ၜါၜါတၠ ပါလုပ်ဒၟံၚ်ရ။

ကမ္မတဳပ္ညဳပ္ညပ်ပံၚ်ကောံ ဗျူဟာပၞာန်ဂှ် နူကဵုဂကောံက္ဍိုပ်သ္ကိုပ်မူဝါဒ SCEF ကံၚ်သဳက္ဍိုက်ပ်ဖေဝ်ဒရေဝ်ဂှ် တိုက်ရိုက်ကောပ်ကာဲမံၚ်ရောၚ် ညးအခေါၚ်ဟီုဂး ဆလိုင်းထက်နဳ ဟီုလဴလဝ်ကဵု မဳဒဳယျာတံရောၚ်။

အပ္ဍဲဂကောံက္ဍိုပ်သ္ကိုပ်မူဝါဒဂှ်မ္ဂး နူ NUG သမ္မတယာယဳ ဒူဝါလယှဳလ ကေုာံ သ္ကိုပ်ဝန်ဇၞော် မာန်ဝေန်ခိုၚ်တာန်၊ ဥက္ကဋ္ဌ CRPH ဥူအံၚ်ကျဳညောအ်၊ ဥက္ကဋ္ဌ KIO သ္ကိုပ်ပၞာန်ဇၞော် အေန်ဗာန်ဠ ၊ ဥက္ကဋ္ဌ KNU ပဒိုသဝ်ဂွါထူဝေန်၊ ဥက္ကဋ္ဌ KNPP ခူဥူရေဝ်၊ ဥက္ကဋ္ဌ CNF ပူဇြေန်ကျုၚ်တံ ပါလုပ်ဒၟံၚ်ရ။

နူကဵုဂကောံပရေၚ်ပၞာန်ဂှ် ယဝ်ရထမံက်အာရုပ်ရဴ ပရေၚ်ပံၚ်ကောံပ္ညဳပ္ညပ်နတဲ မွဲကဆံၚ်တုဲမွဲကဆံၚ်မာန်မ္ဂး လပါ်ကဏ္ဍပရေၚ်ပၞာန်ဂှ် အစောံဇြဟတ် သာခိုဟ်တိုန်မာန်ရောၚ် နူဂကောံလ္ၚတ်ပရေၚ်ပၞာန်ကဵု ပရေၚ်ဂီုကၠီုဍုၚ်ဗမာ MDSI ညးတာလျိုၚ်သုတေသန ပရေၚ်ပၞာန် ကိုနောင်ယော သ္ၚဳဂၠိပ်လဝ်ရ။

“နူကဵုဂကောံပရေၚ်ပၞာန်တံ ယဝ်ရထမံက်အာရုပ်ရဴ ပရေၚ်ပံၚ်ကောံပ္ညဳပ္ညပ်အာ နတဲနဇိုၚ်ဇေတ်တ် မွဲကဆံၚ်တုဲ မွဲကဆံၚ်မာန်မ္ဂး ပ္ဍဲကဏ္ဍပရေၚ်ပၞာန်ဂှ် အစောံဇြဟတ် သာခိုဟ်တိုန်မာန်ရောၚ်။ ဗွဲတၟေၚ် အပ္ဍဲပရေၚ်ပၞာန်မ္ဂး တၚ်ခိုဟ်ကဵု တၚ်ဍိုန်လျ အပ္ဍဲဇကုတံဂှ် ပံၚ်ပစပ်အာတုဲ အကြာဂကောံဒပ်တံဂှ် နကဵုဗျူဟာပၞာန် မကိတ်ညဳတံ ညံၚ်ဂွံဆက်စပ်မာန် ဒးဖျေံအာဗျူဟာပၞာန်တံရောၚ်။ သာ်ဏံမ္ဂး ဒပ်ပၞာန်သီအဝဵု ပလေဝ်စဒၟံၚ် ပရေၚ်ထပက်ကရောၚ်ပၞာန်တံဂှ် ညံၚ်ဂွံဒးအာဘဲဂိဂိ ကလေၚ်ဗတိုက်အာမာန်ရောၚ်” သာ်ဝွံ သ္ဂးရ။

စပ်ကဵုပရေၚ်ဒက်ပ္တန်လဝ် SCEF တုဲ ပ္ဍဲကဵုလိက်လလောၚ်တြး ကၞောတ်ဂိတုမာတ်ဂှ်မ္ဂး ညံၚ်ဂွံဒှ် သ္ပစၞးပရေၚ်ဍုၚ်ကွာန်မာန်ဂှ် ဆက်တုဲပံၚ်ကောံပ္ညဳပ္ညပ်အာ ကုဂကောံမဟာမိတ်တံရောၚ် ချူထမံက်ထ္ၜးလဝ်ဂှ် ဂွံဆဵုကေတ်ရ။

ပရေၚ်ပကောံ SCEF ဂှ် ဆၜိုတ်နကဵု ၆ ဂကောံဓဝ်ဟွံသေၚ် ကုဇြဟတ်ပၠန်ဂတး နွံဒၟံၚ်မွဲစွံတံဂှ်လေဝ် ညံၚ်ဂွံထပ်သၠဲဒက်ပ္တန်အာမာန်ဂှ် ဆက်ဆဵုဂဗသဳကၠဳမံၚ်ရောၚ် ဝန်ဇၞော်ကၟိန်ဍုၚ် NUG ဒံက်တာ ဇြဝ်ဝေသိုဝ် ကဵုလဝ်သမ္တီရောၚ်။

ပ္ဍဲဂိတုမေ လောန်ကၠုၚ်ဏံ နူကဵုကံၚ်သဳက္ဍိုက်ပ် ထမံက်ပတိုန်ကၟိန်ဍုၚ်ပံၚ်ကောံ ဖေဝ်ဒရေဝ်ဒဳမဝ်ကရေဇြဳ SCEF ဂှ် နကဵုအန်လာၚ်ဆဵုဂဗလဝ်ကဵု အလဵုအသဳယူနိတ်ဖေဒရေဝ် နူသကိုၚ်၊ မကွေ၊ ကံၚ်သဳ ပရေၚ်အုပ်ဓုပ်ကာလအကြာ အပ္ဍဲဒေသမာန္တလေဝ်တံမွဲဂကောံတုဲ မွဲဂကောံရ။

အတိုၚ်ဒက်ပ္တန်လဝ် SCEF နကဵုတိုၚ်ခဳ ၃ တိုၚ်တုဲ သွက်တိုၚ်ခဳ သ္ပစၞးတွဵုရး/ ယူနေတ်ဖေဒရယ်/ ERO ဂှ် နူကဵုယူနေတ်ဒေသတံ ညံၚ်ဂွံပါလုပ်မာန်တုဲ ဆက်စပ်သဳကၠဳလဝ် မဒှ်ရ။

ဆဂး သွက်တိုၚ်ခဳသ္ပစၞးတွဵုရး/ ယူနိတ်ဖေဝ်ဒရေဝ်/ ERO ဂှ် ကုဂကောံပါလုပ်မံၚ် ပရေၚ်ပၠန်ဂတး အကြာ ဂကောံကောန်ဍုၚ်အရေၚ် ERO တၞဟ်ဟ်တံကဵု SCEF ဂှ် ပရေၚ်ဆဵုဂဗသဳကၠဳလဝ်တံပြဟ်ဟ်ဏံ ဟွံဂွံဆဵုလဝ်ဏီပုဟ်။

နကဵု SCEF မ္ဂး ပရေၚ်ပံၚ်ကောံပ္ညဳပ္ညပ်အာ ပရေၚ်ဍုၚ်ကွာန်၊ ပရေၚ်ပါလုပ်မာန်သီုဖအိုတ်တံ၊ လၟေၚ်ကမၠောန် ပရေၚ်ညိၚ်ဝပ် နွံကဵုတင်ဒုၚ်လျိုၚ်ကေုာံ ညံၚ်ဂွံထမံက်ပတိုန် ကၟိန်ဍုၚ်ပံၚ်ကောံဖေဝ်ဒရေဝ် ဒဳမဝ်ကရေဇြဳ မၞုံကဵုတင်ရန်တၟအ် ညးဍုၚ်ကွာန်ကောန်ဍုၚ်ဗၟာတံ ညံၚ်ဂွံမံက်တိုန်အာဂှ် ထပ်သ္ပကဵုလဝ် ကတိကဝတ်နွံရ။

ပရိုၚ် – သြင်လောန်တိုၚ်မ်

Photo – SCEF