ရေဝ်၊ ဂျောန် ၁၀
အပ္ဍဲတွဵုရးမန် ပွိုၚ်ဍုၚ်ရေဝ် ဒၞာဲဂကောံပၠန်ဂတး ချဳဒရာၚ်ဇြဟတ်ခိုဟ် မံၚ်ဂှ် ဒပ်ကဝ်မယှေန်ပၞာန် ထပ်ထပက်မံၚ်ကရောၚ်ပၞာန်ဂှ်ရ ညးဒေသတံဂွိၚ်ဖေက် ပေါဲဗတိုက်ၜါလ္ပာ် ကတဵုဒှ်တိုန်ရ။
ဇြဟတ်ဒပ်ကဝ်မယှေန်ပၞာန် ၁၅၀ ပြၚ်တံ စပ္တံနူဂိတုဂျောန် ၈ အခိၚ်ဂယးဂှ် နူကဵုပွိုၚ်ဍုၚ်ရေဝ် ကွာန်တၟံကၞေၚ် ထပက်ကၠုၚ် ကရောၚ်ပၞာန် ဇရေၚ်ကွာန်နှေဟ်ခြေၚ်၊ ကွာန်တၟိဒဵုကြေၚ်၊ ကွာန်ကအ်ဍောတ်ကဵု ကွာန်ဒဵုကြေၚ်တုဲ လုပ်စိုပ်လဝ်ရောၚ်။
ပါ်ပရးဇြဟတ်တုဲ ဒပ်ကဝ်မယှေန်ပၞာန်လုပ်ကၠုၚ်တံဂှ်တှ်ေ ဒၞာတာစၟဳစၟတ်မံၚ်ညးဒေသလ္ၚဵုတံနွံတုဲ ပြဟ်ဟ်ဏံမ္ဂး ပရေၚ်ရပ်စပ်ဟွံမွဲဏီပုဟ် သ္ဂးရ။
ဆဂး ဟိုတ်နူဒပ်ကဝ်မယှေန်ပၞာန် ထပက်မံၚ်ကရောၚ်ပၞာန်တုဲ ပေါဲဗတိုက်အကြာၜါလ္ပာ် ဖေက်ကတဵုဒှ်ဂှ်ဂွိၚ်တုဲ ညးဒေသလ္ၚဵုတံ ဒစးဒုၚ်ပါဲမံၚ်ရောၚ် ဂွံတီကေတ်ရ။
ပရေၚ်ထပက်ကရောၚ်ပၞာန်ဏအ်ဂှ် ပ္ဍဲအခိၚ်ကသီုဏအ် ပရေၚ်ပသောၚ်တိဍာ်ကဵု ရေၚ်တၠုၚ်ပရေၚ်ဂီုကၠီု ဒပ်ကဝ်မယှေန်ပၞာန် တံ ဒှ်မာန်ရောၚ်သ္ဂးရ။
တုဲကၠုၚ် ဂိတုမေမံက်ဏအ်လေဝ် ပ္ဍဲပွိုၚ်ဍုၚ်ရေဝ် ကွာန်နှေဟ်ခြေၚ် ကဵု ကွာန်ကၠအ်လဳမဴ ဟိုတ်နူဒပ်ကဝ်မယှေန်ပၞာန် ထပက်ကရောၚ်ပၞာန်တုဲ ပေါဲဗတိုက်ၜါလ္ပာ် ကတဵုဒှ်လဝ်နွံရ။
မွဲလ္ပာ်ဂှ်လေဝ် အပ္ဍဲပွိုၚ်ဍုၚ်ရေဝ် ဒပ်ကဝ်မယှေန်ပၞာန်တံ မၚ်ထံၚ်ပရိုၚ်ထံက်ကၚ်ဗလးကျာကဵု ပေါဲဗတိုက်ဒပ်ပၞာန်ကျာတံ ကၠောန်ဗဒှ်လဝ်ဂၠိုၚ်တိုန်ကၠုၚ် မဒှ်ရ။
ပရိုၚ် – သြင်လောန်တိုၚ်မ်
Photo – Social Media