အဗူဂျာ၊ ဂိတုဂျောန် ၉
သွက်ရဲညးဒးဇီုကပိုက်ဒၟံၚ်ကဵု ပရေၚ်စၞစဇွောံမဟွံရုံဂပ်မံၚ် လ္ပာ်သၟဝ်ဒဵုဧသာန် ဍုၚ်နာၚ်ဂျဳရဳယျာတံဂှ် နူကဵုအလဵုအသဳသေံ ကဵုဒါန်သ္ၚု ၁၂ ဒသမ ၄ မက်ထရေတ်တာန် မၞုံၚုဟ်မးသြန်ဒဝ်လာအမေရိကာန် ၂၂၀၀၀ ဂှ် ဇရေၚ်အစဳအဇန်စၞစဇွောံမဂၠးကဝ်ကုလသမဂ္ဂ WFP ရ။
စၞးအလဵုအသဳသေံဂှ် နူကဵုအမာတ်ကလုတ်သေံ မၞုံဍုၚ်နာၚ်ဂျဳရဳယျာ သဳရာပါတ် မန်ကိုနာဗင် အာကဵုလဝ်ဒါန်သ္ၚု အပ္ဍဲရုၚ် WFP ဍုၚ်အဗူဂျာ မဒှ်ရ။
သွက်အပ္ဍဲတွဵုရး မဒးဇီုကပိုက်ဒၟံၚ်ကဵု ပရေၚ်စၞစဟွံရုံဂပ် မပ္တံ ဗဝ်နို၊ အဒါမာဝါ၊ ယိုဗဳ တံဂှ် သွက်ဂွံပါ်ပရးပရအ်အာကဵုသ္ၚ မဒှ်ရ။
ပ္ဍဲပေါဲကဵုဒါန်သ္ၚုဂှ် နူကဵုအလဵုအသဳသေံ ကဵုလဝ်ကတိ သွက်ဂွံရီုဗၚ်ဓဝ်ဆာန်ဍူမၞိဟ်တံရောၚ် အမာတ်ကလုတ်ဇၞော်သေံ ထပ်ဟီုလဴလဝ်ရ။
ဟိုတ်နူပရေၚ်ကဵုလဝ်ဒါန်သာ်ဏအ်တုဲ ညးမဒးဇီုကပိုက်ဒၟံၚ် အကာဲအရာပရေၚ်ဝါတ်ဂါတ်တံမ္ဂး ပြေပြံၚ်အာမာန် စၟဳလဝ်ဒၟံၚ်ရောၚ် အမာတ်ကလုတ်ဇၞော် သ္ဂးရ။
သွက်ပရေၚ်စၞစဍာ်ဇမၠိၚ်ဂွံရုပ်ဂပ်အာ ပ္ဍဲနာၚ်ဂျဳရဳယျာမာန်ကီု သွက်ပရေၚ်ဝါဗ္ၚဂွံဇၞော်မောဝ်မာန်ကီု နူကဵုသေံ မၚ်ပါ်ပရးမံၚ်ကဵု ပရေၚ်တဵုလွဳဆေၚ်စပ်ကဵုဝါဗ္ၚတံရောၚ် ညးဟီုရ။
ကိုပ်ကၠာတေံလေဝ် ဇရေၚ်ဂကောံသြန်ဂအုံဓဝ်ဆာန်ဍူမၞိဟ်နာၚ်ဂျဳရဳယျာ UNOCHA ဂှ် နူကဵုအလဵုအသဳသေံ ထံက်ပၚ်ကဵုလဝ်သြန်ဒါန် ဒဝ်လာအမေရိကာန် ၁၀၀၀၀ မဒှ်ရ။
လတူပရေၚ်ဂိုတ်ဂစာန် ကောန်ကမၠောန် WFP ကေုာံ ကောန်ကမၠောန်ဂကောံဓဝ်ဆာန်ဍူမၞိဟ်တံ ရီုဗၚ်ဒၟံၚ် ဂကောံမၞိဟ်မနွံပၟိက်တံဂှ် နူကဵုသေံ တၚ်ဂုဏ်ဇၞော်ဇၞော်ရောၚ် အမာတ်ကလုတ်ဇၞော် ဟီုရ။
လ္ပာ်ဒေသဧသာန် ဍုၚ်နာၚ်ဂျဳရဳယျာဂှ် ညးမဒးဇီုကပိုက်ဒၟံၚ်ကဵု ပရေၚ်စၞစဟွံရုံဂပ်တံ နွံမံၚ် ၅ ဒသမ ၈ ပြကောတိကိုတ်ရောၚ် ပ္ဍဲစရင်ကုလသမဂ္ဂတံ ချူထမံက်ထ္ၜးလဝ်ရ။
ဟိုတ်နူပရေၚ်ပဋိပက္ခရပ်လွဟ် လုကဴ ၁၆ သၞာံ၊ အကာဲအရာ ရာသဳဥတုသကာတ်မြဟ် ကေုာံ ပရေၚ်သြန်ဖောဝ်တံတုဲ ပ္ဍဲနာၚ်ဂျဳရဳယျာဂှ် ပြသၞာစၞစဇွောံမဟွံရုံဂပ်တံ ဆက်ပရေံကၠုၚ်ဒၟံၚ်ရ။
Ref:Khaosodenglish