တိုၚ်ချောန်၊ ဂျောန် ၁၀
ပ္ဍဲအရာ ကၠောန်သ္ပခန်လ္ၚတ်ကွတ်ပၞာန်ဇိုၚ်ၜဳ ပ္ဍဲဂိတုဂျောန် ၉ ဂှ် ဗီုပြၚ်ဒပ်ကြုက် ၜက်ၜေတ်ဗတိုက်ပလီုလုပ်ပၠံၚ် ကၠုၚ်တအ်ဂှ် ဒပ်ပၞာန်ထာဲဝါန်တံ ကၠောန်ဗဒှ်လဝ် ခန်လ္ၚတ်ကွတ်ပၞာန်ရ။
အခိၚ်ပလေဝ်စအောန်စှ်ေကၠုၚ်ဂှ် ညံၚ်ရဴဗီုပြၚ်ဗတိုက်ပၞာန် အပ္ဍဲအနာဂတ်တေံ နတဲကွေံကွေံဂှ် ဒပ်ပၞာန်ထာဲဝါန်တံ စကာသုၚ်စောဲ ပန်ပတိတ်လဝ် ကမ်သၠောဝ်ကဵုလွဟ်ဇၞော်တံတုဲ လ္ၚတ်ကွတ်ပၞာန် ဗီုပြၚ်တာဒၞာ ပွမတိုန်ဗတိုက်ကၠုၚ်နူၜဳ မဒှ်ရ။
အလဵုဍုၚ်ထာဲဝါန် အုပ်ဓုပ်မံၚ် နကဵုနဲကဲဒဳမဝ်ကရေဇြဳဂှ် နဒဒှ် တိဍုၚ်အလဵုဍုၚ်ကြုက်ပိုၚ်ပြဳ ညာတ်ကေတ်လဝ်တုဲ၊ သွက်သ္ဂောံစွံအာ သၟဝ်တဲပရေၚ်ထိၚ်ချုက်ဗေကျေန်ဂှ် ယဝ်ရနွံပၟိက်မ္ဂး သုၚ်စောဲဇြဟတ်ရောၚ် ဟီုလဝ်တုဲ၊ ပလံၚ်ဗ္စိုပ်လဝ် ၜၚ်ကျာပၞာန် ကေုာံ ၜၚ်ပၞာန် ပ္ဍဲပွဳဗွိုၚ်တ္ကအ်ထာဲဝါန် ဇၟာပ်ပ်တ္ၚဲရ။
မွဲလပါ်ပ္ၚံက်ၜဳထာဲဝါန် ပ္ဍဲသြၚ်ၜဳလပါ်ပလိုတ်စုက်လုက်မံၚ်ကဵုကြုက် တိုက်ရိုက်ဂှ် ဒှ်ဒၞာဲကၠောန်လဝ်ခန်လ္ၚတ်ကွတ်ပၞာန်တုဲ၊ ဒၞာဲဏအ်ဂှ် ဒှ်ဒၞာဲဒပ်ပၞာန်ကြုက် ၜက်ၜေတ်လုပ်ပၠံၚ် ဗတိုက်ကၠုၚ်မာန်အိုတ်ရောၚ် အကာဲအရာနွံမံၚ်ရ။
အပ္ဍဲဒၞာဲ ၈ ဒၞာဲ မွဲဒမြိပ်သြၚ်ၜဳ ၁၂ တိုၚ်ဇမၠိၚ် ပွဳဗွိုၚ်ဍုၚ်တိုၚ်ချောန် လဒေါဝ်ထာဲဝါန်ဂှ် ကၠောန်ဗဒှ်လဝ် ပရေၚ်လ္ၚတ်ကွတ်ပၞာန်တံ ကြပ်မွဲအခိၚ်ဓဝ် မဒှ်ရ။
နူအလဵုအသဳထာဲဝါန် ဒပ်ပၞာန်ညးတအ် ညံၚ်ဂွံပဂတာပ်ခေတ်ဂှ် ကၠောန်မံၚ်တုဲ ဗပေၚ်စုတ်မံၚ်လွဟ်တၟိတအ်ကီု၊ ကောန်ပၞာန်တအ်လေဝ် ညံၚ်သ္ဂောံလ္ၚတ်အာ ဗီုပြၚ်ပေါဲဗတိုက်မက္တဵုဒှ်မံၚ်နတဲကွေံကွေံဂှ် ကၠောန်ဗဒှ်မံၚ်ရ။
ပရေၚ်လ္ၚတ်ကွတ်ပၞာန်တအ်ဏအ်ဂှ် ဟွံသေၚ်ဗီုပြၚ်ဒစးဒုၚ်လ္ၚတ်တုဲ ဒှ်ကၠုၚ်ဗီုပြၚ်လုပ်ပေါဲဗတိုက် နတဲကွေံကွေံရောၚ် သ္ကိုပ်ဒပ်လွဟ်ဇၞော် အန်ယဳမေန် ဟီုလဴကဵုအစာလိက်ပရိုၚ်တအ်ရ။
ပ္ဍဲအရာလ္ၚတ်ကွတ်ပၞာန်ဂှ် သုၚ်စောဲလဝ် သၞောတ်ကမ်သၠောဝ် Thunderbolt-2000၊ အမၠံက် Paladin ပတိတ်နူအမေရိကာန်၊ ကမ်သၠောဝ်ဗတိုက်ပလီု ကွဳစက်ကာခြပ် တအ် ကေုာံ လွဟ်ဇၞော်မဝ်တာတအ်တုဲ၊ သွက်သ္ဂောံတာဒၞာတိုန်ဗတိုက်နူၜဳဂှ် လ္ၚတ်ကွတ်ပၞာန် ဗီုပြၚ်ဒက်ပတန်ဂအာၚ်ဗလး သွက်ဂွံဂစိုတ် မဒှ်ရ။
ပွမပန်စမ်ၜတ်နတဲ သၞောတ်ကမ်သၠောဝ် Thunderbolt-2000 ဏအ်ဝွံ အပ္ဍဲ ၇ သၞာံဏံဂှ် ဒှ်အလန်ပထမအိုတ်ရောၚ် ဒပ်ပၞာန်ထာဲဝါန် သ္ဂးရ။
သၞောတ်ကမ်သၠောဝ်ဏအ်ဝွံ ဇြဟတ်ဗတိုက် သၠိပ်ပလီုတာဇမ္ၚောဲ ခိုဟ်တုဲ ဒှ်သၞောတ်မဆုဲပြံၚ်ချဳဒရာၚ်မာန် အဆံၚ်သၠုၚ်ၚ် မဒှ်ရ။
နူဗေကျေန် ပိုၚ်ပြဳလဝ်ထာဲဝါန်ရောၚ် ပရေၚ်ဟီုဂးမံၚ်တံဏံ နကဵုအလဵုအသဳထာဲဝါန် တးပါဲ လဝ်တုဲ၊ အနာဂတ်ထာဲဝါန်မ္ဂး ညးဍုၚ်ကွာန်ထာဲဝါန်တအ်ဟေၚ် ဒးဖျေံသ္ဂုတ်သွာတ်ရောၚ် ဟီုလဝ်ရ။
စပ်ကဵုပရေၚ်လ္ၚတ်ကွတ်ပၞာန်ဏအ်တုဲ သွက်သ္ဂောံဟီုကဵု တင်စၟတ်သမ္တီဂှ် ဆက်စၠောံဏာလဝ် ဌာနပရေၚ်ကေၚ်ကာထာဲဝါန် ဍုၚ်ကြုက်ကီုလေဝ် ကလေၚ်ခၠေဝ်သှ်ကဵုလဝ်ဟၟဲပုဟ် ဌာန်ပရိုၚ်ရိုက်တာ သ္ဂးရ။
သွက်သ္ဂောံသဳကၠဳအာကဵု သမ္မတထာဲဝါန် လိုင်ချေန်တဳဂှ် နူဍုၚ်ကြုက် တးပါဲလဝ်တုဲ ညးဏံဂှ် ဒှ်မၞိဟ်မိက်ဂွံပါ်တိတ်ရောၚ် ဟီုလဝ်ရ။
Ref: REUTERS