မတ်မလီု၊ ဂျောန် ၁၀
တၚ်သၟာန်၊ ဂလာန် ဂကောံအလဵုအသဳတွဵုရးမန် ဖန်ဖက်ရေၚ်တၠုၚ်ကဵုမာန်ဂှ် ညးစၞးစၠတ်ထဝ်အမာတ်တံ ကဵုဖျုန်တုဲ သၟာန်ဂလာန်ပတိုန်ထ္ၜးအာညိ သ္ကိုပ်စၠတ်ထဝ်တွဵုရးမန် ဥူတိတ်ထွိုဲ ဟီုလဝ်ရ။
ပ္ဍဲဂိတုဂျောန် ၈ အခိၚ်နူဂယး ဒၞာဲရုၚ်စၠတ်ထဝ်တွဵုရးမန် ဍုၚ်မတ်မလီု ကၠောန်လဝ်ကောံဓရီုပ္ညဳပ္ညပ် စပ်ကဵုပတိုန်ဂလာန် ၊ တင်သၟာန်တံဂှ် ဟီုဂးလဝ်ရ။
ပ္ဍဲကဵုပရေၚ်ပၠုပ်ဂလာန်ကေုာံ တင်သၟာန်တံမ္ဂး ညံၚ်သ္ဂောံကိတ်ညဳကဵု ကာလဒေသတံတုဲ ကမၠောန်အလဵုအသဳတွဵုရး ဖန်ဖက်ရေၚ်တၠုၚ်ကဵုမာန်တံဂှ် ကဵုဖျုန်တုဲ ပတိုန်ဂလာန်ကီု တင်သၟာန်ကီု ပတိုန်ထ္ၜးအာညိ ဥူတိတ်ထွိုဲ ဗ္တိုက်ဖအောဝ်လဝ်ရောၚ်။
တုဲပၠန် အကြာစၠတ်ထဝ်ကဵု ဂကောံအလဵုအသဳတွဵုရးတံ ပရေၚ်ဇီုဟဗိုတ် ညံၚ်ဂွံအောန်အာဂှ် နကဵုဓရ်ဗ္စာရဏာ ညးၜါလ္ပာ်ဒးရေၚ်တၠုၚ်အာတုဲ အရာညးဍုၚ်ကွာန်တံမိက်ဂွံဂွံကဵု ကမၠောန်အလဵုအသဳကၠောန်ကဵုမာန်တံဂှ် ညံၚ်ဂွံဒှ် balance ဂှ် သ္ၚဳဂၠိပ်ပ္တိုန်ထ္ၜး ရေၚ်တၠုၚ်အာအိုတ်ညိဂှ် ဟီုလဝ်ရ။ လတူအလဵုအသဳ နကဵုပရေၚ်ထိၚ်ဒဝ် ညးစၞးအမာတ်စၠတ်ထဝ်တံ ပၠုပ်ဂလာန်ပတိုန်ထ္ၜးတင်သၟာန်တံဂှ် အတိုၚ်ဥက္ကဌစၠတ်ထဝ် ဟီုလဝ်ဏံမ္ဂး သဘဴမိက်ဂွံမာတ်လဒဵုထောံရောၚ် ညးဒေသမန်မွဲတၠ ပါ်ပါဲလဝ်ရ။
ပရေၚ်ဟီုဂးလဝ် အကြာစၠတ်ထဝ်ကဵု အလဵုအသဳတွဵုရး ပရေၚ်ဇီုဟဗိုတ်တံ ညံၚ်ဂွံအောန်စှ်ေဂှ်လေဝ် လတူအလဵုအသဳပၞာန်မ္ဂး ပရေၚ်ထိၚ်ဒဝ်စၠတ်ထဝ်တွဵုရး ဍိုန်လျစှ်ေအာမာန်ရောၚ် သ္ဂးရ။
ပ္ဍဲကဵုပေါဲရုဲမာဲ ဒပ်ပၞာန်သ္ကိုပ်သ္ကပၠတရဴဂှ် နဒဒှ် ညးစၞးစၠတ်ထဝ်တွဵုရး ပွိုၚ်ဍုၚ်မတ်မလီု နူဗော်ပျဳခိုၚ်ဖျိုဝ် ဥူတိတ်ထွိုဲ လုပ်ပြိုၚ်ပကာန်ဂွံဇၞးတုဲ ဒှ်ကၠုၚ်လဝ် ဥက္ကဌစၠတ်ထဝ်တွဵုရးမန်ရောၚ်။
ကောံဓရီုဒုတိယဝါ စၠတ်ထဝ်တွဵုရးမန် အလန်တတိယဂှ် စပ္တံနူဂိတုဂျောန် ၉ ကၠောန်ဗဒှ်အာတုဲ အပ္ဍဲကောံဓရီုဏအ်မ္ဂး တင်သၟာန် ၂၉ တင်၊ ပၠုပ်ဂလာန် ၄ တင်တံဂှ် သွက်ဂွံပတိုန်ထ္ၜးအာ နွံရောၚ်။
သတၚ် – သြင်လောန်တိုၚ်မ်
Photo – Social Media