မတ်မလီု၊ ဂျောန် ၁၀
ဟိုတ်နူရမျှာၚ်ညာန်ကရေဲ နူကဠာသၠဲရမျှာၚ်တောဲလဝ်တံတုဲ ပရေၚ်ထတ်ယုက်ကောန်ဍုၚ်ကွာန်တံ လ္တူဒးဒုၚ်ဇီုကပိုက်ကၠုၚ် မံၚ်တံဂှ် ညံၚ်ဂွံရပ်စပ်ကေတ်အာအရေဝ် တာဒၞာမာတ်ထောံ ဗွဲမပြဟ်ဂှ် ပၠုပ်ဂလာန်ပတိုန်ထ္ၜးလဝ် အပ္ဍဲကောံဓရီုစၠတ်ထဝ် တွဵုရးမန် ဂိတုဂျောန် ၉ ဂှ်ရ။
ဂလာန်ဏအ်ဂှ် ပ္ဍဲတ္ၚဲပထမ ကောံဓရီုဒုတိယဝါ စၠတ်ထဝ်တွဵုရးမန် အလန်တတိယဂှ် နူကဵုညးစၞးစၠတ်ထဝ်တွဵုရး ပွိုၚ်ဍုၚ်ၜဳကလေၚ် ဒၞာဲဒေသဆန္ဒမာဲ လၟိဟ် (၂) ဥူတေန်ယဳဂှ် ပတိုန်ထ္ၜးလဝ်ရောၚ်။
အတိုၚ် ညးပၠုပ်ဂလာန်ပတိုန်ထ္ၜးဂှ်မ္ဂး ပ္ဍဲကဵုတွဵုရးမန် ပရေၚ်ပံက်စက်ကဠာသၠဲရမျှာၚ်တောဲလဝ်တံ ပရေၚ်စၚ်ခြၚ်ဟၟဲတုဲ ဒှ်အန္တရာဲယဲဘဲကီု ကဵုမၚ်ဒဒိုက်စိုတ်မၞိဟ်ဂမၠိုၚ်တံ နကဵုနဲကဲနာနာသာ်ဂှ် ညံၚ်ဂွံရပ်စပ် ကေတ်အရေဝ် ဆေဝ်ဒဝ်မာတ်ထောံကဵုညိဂှ် ဒးပၠုပ်လဝ်ဂလာန်ဏံရောၚ် သ္ဂးရ။
တုဲပၠန် ဟိုတ်နူရမျှာၚ်ကရေဲ နူကဠာသၠဲရမျှာၚ်တောဲလဝ်တံဏံတုဲ ယဲဘဲကတောဝ်နာနာသာ်၊ ယဲဆီၜေတ်၊ ယဲကောန်တၟအ်၊ ယဲထာၚ်စၞ ကေုာံ ယဲကတဵုဒှ် အပ္ဍဲဗုၚ်အိက်တံဂၠိုၚ်တိုန်ကၠုၚ်မံၚ်ရောၚ် အတိုၚ်တင်နၚ် ပရေၚ်သုတေသနတံဂှ် ဂွံတီကေတ်လဝ်ရောၚ် သ္ဂးရ။
မွဲလ္ပာ်ဂှ်လေဝ် ပရေၚ်ပံက်စက်သၠဲရမျှာၚ်ကဵု ကွိၚ်ကွိုက်ဟွံကိတ်ညဳကဵု အခိုက်ယေန်သၞာၚ်ဍုၚ်ဗၟာ၊ ပရေၚ်လှ်ေကွာဲဗီုပြၚ်လီုလီု လှ်ေထ္ၜးမံၚ်ကဵု ကဠာသၠဲရမျှာၚ်တံသၟးဟွံက ဒှ်အရာပလီုပလာ် ပရေၚ်ထတ်ယုက် ပယှုက်ပထုဲစိုတ်ညးဍုၚ်ကွာန်တံတုဲ ဒှ်ကမၠောန် ဒစဵုဒစးမံၚ် သၞောဝ်ဥပဒေမွဲကီုရောၚ် ညးပၠုပ်ဂလာန်ဏံ ထံက်ထ္ၜးလဝ်ရ။
လ္တူဂလာန်ဏံဂှ် ညးစၞးစၠတ်ထဝ်တွဵုရး ပွိုၚ်ဍုၚ်ကျာ်မြဟ် ဆန္ဒမာဲလၟိဟ် (၂) ဥူတဇြဝ် ထံက်ဂလာန်သဳကၠဳလဝ်တုဲ ပ္ဍဲကောံဓရီုစၠတ်ထဝ် ကၠောန်ဗဒှ် တ္ၚဲဂတးဏံမ္ဂး ဆက်သဳကၠဳအာရောၚ်။
ပ္ဍဲတ္ၚဲပထမ ကောံဓရီုဒုတိယဝါ စၠတ်ထဝ်တွဵုရးမန် အလန်တတိယဏံဂှ် သၟာန်လဝ်တၚ်သၟာန် ၅ တင်၊ ပတိုန်ထ္ၜးပၠုပ်လဝ်ဂလာန် ၂ တင် နွံတုဲ ကောန်ဂကောံကမ္မတဳပရေၚ်ကေၚ်ကာ စၠတ်ထဝ်လ္ၚဵုလေဝ်ပြံၚ်လှာဲ ဒက်ပ္တန်လဝ်ကီုရ။
ပရိုၚ် – သြင်လောန်တိုၚ်မ်
Photo – Social Media