ဒူဗိုၚ်၊ ဝါယှေန်တန်၊ ဂျောန် ၁၁
သွက်ဂွံ ကလေၚ်ပလန်တဲ ဟိုတ်နူအမေရိကာန် ဗတိုက်လဝ် ပွန်အဳရာန် မွဲဒမြိပ်ပ္ၚံက်ၜဳဟဝ်မုဇ်ဂှ်တုဲ ပ္ဍဲဂိတုဂျောန် ၁၀ ဂှ် ကဵုဒၞာဲဗ္ဒိုပ်ပၞာန်အမေရိကာန် ပ္ဍဲဂျဝ်ဒါန်၊ ကူဝိက် ကေုာံ ဗာရုၚ်တံဂှ် နကဵုကမ်သၠောဝ်၊ ဒရုၚ်တံ ဗတိုက်လဝ်ရောၚ် နူကဵုဒပ်မၚ်မွဲပၠန်ဂတးအဳရာန် ဟီုရ။
ပ္ဍဲဂိတုဂျောန် ၉ ဗ္ဒာဲပ္ၚံက်ၜဳဟဝ်မုဇ်ဂှ် နူကဵုအဳရာန် ပန်ဖျေံလဝ် ဟေဝ်လဳကဝ်ပတာအမေရိကာန် Apache ၁ မ သမ္မတအမေရိကာန် ဒဝ်နေဝ်ထရ ဟီုတုဲ ကြဴနူဂှ် ပရေၚ်ဗတိုက်ဗီုဏံ မံက်တိုန်ကၠုၚ် မဒှ်ရ။
ပ္ဍဲဂိတုအေဗရာတေံ ကြဴနူၜါဍုၚ် တုပ်လဝ်စိုတ်ဒေါအ်ပန်ပှော်တုဲ ပရေၚ်ဗတိုက်လၟုဟ်ဏံမ္ဂး ဒှ်အပရေၚ်ဗတိုက်အတန်အခၠန် ဇၞော်အိုတ်မွဲရောၚ်။
“အရာပရေၚ်ကလေၚ်ပလန်လဝ်ဏံဂှ် ဒးနွံကဵုဇြဟတ်ထတ်တ် ဒးကြံၚ်မ္ၚိုဟ်ဂၠိုၚ်ၚ်ထေက်ရောၚ် အဲပတေဟ်လဝ်ရ” သာ်ဝွံ ထရ ဟီုကဵု ABC News ပ္ဍဲဂိတုဂျောန် ၁၀ ရ။
ဟိုတ်နူအသိၚ်ပေါဲဗတိုက်တံ ဇြဟတ်သၠုၚ်တိုန်ကၠုၚ်တုဲ သွက်ဂွံဂွံ ပရေၚ်တင်တုပ်စိုတ် ညံၚ်ဂွံဖအိုတ်အာပေါဲပၞာန် အယောၚ်အလာတံဂှ် ဒှ်ကၠုၚ်သၠေဟ်ပၟာသံသယ ဂၠိုၚ်တိုန်မံၚ်ရ။
နူအမေရိကာန်ကဵု အေဿရေဝ်တံမွဲစွံ ဗတိုက်အဳရာန်တုဲ စဗဒှ်ကၠုၚ် ပေါဲပၞာန် ပ္ဍဲဂိတုဖေဖဝ်ဝါရဳ ၂၈ တေံ မဒှ်ရ။
ဍုၚ်ဇိုၚ်ဝုတ်ဒိုဟ်ပ္ၚံက်ၜဳ ဒုၚ်တၠုၚ်လဝ် ဗ္ဒိုပ်ပၞာန်အမေရိကာန်တံဂှ် နူအဳရာန် ကလေၚ်ပလန်တဲ ဗတိုက်လဝ်တုဲ ကၟာတ်ဆိုအ်လဝ် ပ္ဍဲပ္ၚံက်ၜဳ ဒၞာဲကၠေၚ် ကေုာံ ဓါတ်သဘာဝ မနွံကဵုၚုဟ်မးတံရ။
အပ္ဍဲပရေၚ်အမေရိကာန်ဗတိုက်လဝ်အလန်လက်ကရဴအိုတ်ဂှ် စွံပွန်ပတဝ်လဝ်က္ဍိုပ် ဗတိုက်လဝ် ဒၞာဲဌာန်ပရေၚ်စဵုဒၞာဗလးကျာအဳရာန်၊ ဗ္ဒိုပ်ပရေၚ်ထိၚ်ချုက်ဗလးတိကဵု ဒၞာဲရေဒါမၚ်ထံၚ်ပရိုၚ်ရံၚ်စံၚ်အာတံဂှ်ရောၚ် ဒပ်ပၞာန်အမေရိကာန် ဟီုရ။
ဒၞာဲပွန်အဳရာန် ကြပ် ၂၀ ဒၞာဲဂှ် ဗတိုက်လဝ်တုဲ လံအာၜိုတ်ပွိုၚ် ၄ နာရဳနွံရောၚ် ညးတာလျိုၚ်အမေရိကာန်မွဲတၠ ဟီုရ။
ကမ်သၠောဝ်နူအဳရာန် ပန်ဏာလဝ်တံဂှ် ကြတ်တာဒၞာလဝ်မာန်တုဲ ၜိုန်ရဒတုံခတိုဟ်အာ အပ္ဍဲဒေသညးတံကီုလေဝ် ပရေၚ်ဒးဝပ်လီုလာ်ဟၟဲရောၚ် ဒပ်ပၞာန်ဂျဝ်ဒါန် သ္ဂးရ။
ပရေၚ်နူအဳရာန်ဗတိုက်လဝ် ကူဝိက် ကေုာံ ဗာရုၚ်တံဂှ်လေဝ် တာဒၞာလဝ်မာန်ကီုရောၚ် ပ္ဍဲသိုဲယှေဝ်မဳဒဳယာတံ ချူလဝ်ရ။
ယဝ်ရအမေရိကာန် ထပ်ဗတိုက်ပၠန်မ္ဂး နူပိုဲတံလေဝ် ကလေၚ်ပလန်အာတဲပၠန်ရောၚ် နူအဳရာန် ကြဴဇာကြီုလဝ်ရ။
Ref:Reuters