မတ်မလီု၊ ဂျောန် ၁၁
အပ္ဍဲကဵုသ္ကုတ်ဂၠံၚ်ကွဳပၟတ် မတ်မလီု – လ္ဂုၚ် အကြာသၞေဟ်ကွဳပၟတ် တိၚ်ဇြယာတ်ကဵု သၞေဟ်ကွဳပၟတ်မတ်မလီု တွဵုရးမန် ဍာန်တတ်ဂၠံၚ်ကွဳပၟတ် ၁၀၀ ဒၞာဲပြၚ် နွံမံၚ်တံဂှ် ဂကောံပံၚ်တောဲကဝ်မယှေန်ပၞာန်တံ ဗက်ကၟာတ်ထောံမံၚ်ရောၚ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်မ်ရ။
စနူဂိတုဂျောန် ၈ တုဲကၠုၚ်ဏံ အပ္ဍဲကဵုဒၞာဲဍာန်တတ်ဂၠံၚ်ကွဳပၟတ်တံဂှ် ညးယိုက်ဝန်ဌာနကွဳပၟတ်ဍုၚ်ဗမာ ကေုာံ ဂကောံပံၚ်တောဲအဝဵု ဆေၚ်စပ်တံစဵုဒပ်ဗက်ကၟာတ်ကဠက်ထောံ မံၚ်ရောၚ်။
ပွမဗက်ကၟာတ်ကဠက်ထောံ ဍာန်တတ်ဂၠံၚ်ကွဳပၟတ်တံဟီုဂှ်တှ်ေ အပ္ဍဲဂိတုဂျူလာၚ်ဏံ သွက်ဂွံဟရိပ် ကွဳပၟတ်အသိၚ်မြက် DEMU ပ္ဍဲသ္ကုတ်ဂၠံၚ်ကွဳပၟတ် မတ်မလီု – လ္ဂုၚ် ညံၚ်ဂွံဗၠးဘဲအန္တရာဲမာန်တုဲ ကၠောန်ဗဒှ်လဝ်ရောၚ် နူကဵုဌာနဇြဟတ်ဓါတ်လလဳ၊ ကွတ်စက် ကေုာံ ပရေၚ်ဆက်စၠောံအာကၠုၚ် တွဵုရးမန် ဝန်ဇၞော် ဥူမေန်ဇေယျာဥူ ပ္ဍဲဂိတုဂျောန် ၁၀ ဂှ် ကြဴနူကဵု ကောံဓရီုစၠတ်ထဝ်တွဵုရးမန်တုဲဂှ် သှ်ကဵုလဝ်ရ။
အကြာသၞေဟ်ကွဳပၟတ် တိၚ်ဇြယာတ်ကဵု သၞေဟ်ကွဳပၟတ်မတ်မလီုတံဂှ်တှ်ေ ဍာန်တတ်ဂၠံၚ်ကွဳပၟတ် နွံမံၚ် ၁၅၇ ဒၞာဲတုဲ အကြာဂှ် ၁၆ ဒၞာဲဟေၚ် ခုတ်စၟတ်သမ္တီကဵုလဝ် ဍာန်တတ်ဂၠံၚ်ကွဳပၟတ် လုပ်သၞောဝ်ရောၚ် သ္ဂးရ။
ဆဂး ဒၞာဲဍာန်တတ်ဂၠံၚ်ကွဳပၟတ် ဟွံလုပ်သၞောဝ်လ္ၚဵုတံဂှ်ဗီုလဵုဒှ်ဒှ် ယဝ်ရ ညးဍုၚ်ကွာန်တံ နွံပၟိက်ဒးသုၚ်စောဲတွဵုဟီုမ္ဂး ညံၚ်ဂွံပံက်အာကဵုဂိက်ပရေၚ်ဂီုကၠီုတံနွံရောၚ် ဝန်ဇၞော်ဥူမေန်ဇေယျာဥူ ဟီုဂးလဝ်ရ။
ဟိုတ်နူ ဍာန်တတ်ဂၠံၚ်ကွဳပၟတ်တံ ဒးဒုၚ်ကၟာတ်ကဠက်ထောံဂှ်ရ ပ္ဍဲအရာပရေၚ်အာကၠုၚ်ညးဒေသတံ ဒှ်မံၚ်အခက်အခုဲတုဲ သ္ကုတ်ဂၠံၚ်ညးဍုၚ်ကွာန်ဗွဲမဂၠိုၚ် ဒးအာကၠုၚ်မံၚ်တံဏံ ညံၚ်သ္ဂောံကလေၚ်ပံက်ကဵုဂှ် ပရေၚ်အာတ်မိက်တံ နွံမံၚ်ကီုရ။
အပ္ဍဲသ္ကုတ်ဂၠံၚ်ကွဳပၟတ် မတ်မလီု – လ္ဂုၚ်ဂှ် ဟိုတ်နူ ပရေၚ်တတ်ဂၠံၚ်ဍာန်တုဲ ဇၟာပ်ပ်သၞာံ ပရေၚ်ဒးဘဲအန္တရာဲနွံတုဲ မၞိဟ်ချိုတ်လဝ်ရ။
ပရိုၚ် – သြင်လောန်တိုၚ်မ်
Photo – Social Media