ရေဝ်၊ ဂျောန် ၁၁
အပ္ဍဲတွဵုရးမန် ပွိုၚ်ဍုၚ်ရေဝ် ဒေသကၞောတ်ၜဳရေဝ် ဟိုတ်နူ ဒှ်မံၚ်ဒဝိၚ်ကဵု ဒပ်ကဝ်မယှေန်ပၞာန် ကလေၚ်ထပ်ကြဳဗုၚ်ဗလးကျာတုဲ ညးဍုၚ်ကွာန်ရဲဒေသတံ ထောံဌာန်ဒၞာဲပြံၚ်ပဆုဲမံၚ်ရောၚ် နူကဵု ရိုဟ်ကၞက်ပရိုၚ်ဗလးတိတံ ဟီုကဵု ဌာန်ပရိုၚ်သြၚ်လောန်တိုၚ်မ်ရ။
အပ္ဍဲသတ္တဟလက်ကရဴအိုတ် ဂိတုမေကဵုဂိတုဂျောန်မံက်တေံ ပ္ဍဲဒေသကၞောတ်ၜဳရေဝ်ဂှ် နူကဵုဒပ်ပၞာန်ကျာ ကဝ်မယှေန်ပၞာန်တံ ကြဳကၠုၚ်လဝ်ဗုမ်နွံရ။
ဟိုတ်နူဒပ်ကဝ်မယှေန်ပၞာန် ကြဳဗုမ်ဗတိုက်လဝ်တုဲ ပ္ဍဲအကြာဂိတုဂျောန်ဏံ ညးဒေသကၞောတ်ၜဳရေဝ်လ္ၚဵုတံ ထောံဌာန်ဒၞာဲပြံၚ်ဆုဲစိုပ်ကၠုၚ် လ္တူဍုၚ်ရေဝ်ကဵု ကွာန်ဘာတံရောၚ် သ္ဂးရ။
မၞိဟ်ဟွံဂြိပ်ပါဲမွဲသာ် ရဲသှ်ေဇးမံၚ်အကြာကွာန်တံဂှ်လေဝ် အခိၚ်လဵု ဍေံကၠုၚ်ကြဳဗုမ်ရော နကဵုစိုတ်ဒဝိၚ် ဒးမံၚ်အာမံၚ်တုဲ အကြာဂှ်စိုပ်အခိၚ်ဗ္တံမ္ဂး ညးဒေသလ္ၚဵုတံဒးပြံၚ်ဒၞာဲတိက် ပ္ဍဲဥဒျာန်ကၠအ်သွဝ်တံနွံရောၚ် ဂွံတီကေတ်ရ။
အခိၚ်ကၠာဒပ်ပၞာန်ဗမာ ဟွံဂွံသီအဝဵုဏီတေံဂှ်တှ်ေ ကွာန် ၁၉ ကွာန် နွံမံၚ်ဒေသကၞောတ်ၜဳရေဝ်ဏံဂှ် ဒှ်မံၚ်ဒေသပရေၚ်အုပ်ဓုပ် ဗော်ဍုၚ်မန်တၟိ NMSP ကီုလေဝ် ကြဴနူပၞာန်သီအဝဵုတုဲဂှ် ဂကောံဒပ်ပၠန်ဂတးတံ ကၠုၚ်ဖျေံသ္ဇိုၚ်ချဳဒရာၚ်မံၚ် မဒှ်ရ။
အပ္ဍဲဂိတုမေ ၂၇ တေံ လတူဗ္ဒိုပ်လကိုတ်ရေဝ် ပ္ဍဲဒေသကၞောတ်ၜဳရေဝ်ဂှ် ဟိုတ်နူဒပ်ကဝ်မယှေန်ပၞာန် ကြဳလဝ်ဗုမ်ဗလးကျာဂှ်ရ ကောန်ပၞာန် ၁၀ တၠ ချိုတ်အာတုဲ ၂၀ တၠ ပြၚ် ဒးလဝ်ဘဲဝပ်တံနွံရ။
တုဲပၠန် ပ္ဍဲဂိတုဂျောန် ၃ ဂှ်လေဝ် ဒၞာဲဒေသကၞောတ်ၜဳရေဝ် ကွာန် ၂ ကွာန်ဂှ် ဒပ်ကဝ်မယှေန်ပၞာန် ကြဳဖျေံဗုမ်ဗလးကျာတုဲ ရဲကၠအ်ညးတြုံ အာယုက် ၄၀ ပြၚ်မွဲတၠ ဒးဗုမ်တုဲချိုတ်အာလဝ်ကီုရ။
ပရိုၚ် – သြင်လောန်တိုၚ်မ်
Photo – CJ