နေပျဳဒဝ်၊ ဂျောန် ၁၁
အပ္ဍဲကာလသီအဝဵုဏံဂှ် ဒပ်ပၞာန်က္ဍိုက်ပ်တုဲ စပ်ကဵုအရာသဳကၠဳလဝ် ပရေၚ်ၜိုဟ်လလမ်တံဂှ် သွက်သ္ဂောံပလေဝ်အာ သ္ဇိုၚ်သၞောဝ်ဥပဒေတုပ်လဝ်စိုတ်နွံမံၚ် ၄၃ တင်တံဂှ် ပတိုန်ထ္ၜးအာ စၠတ်ထဝ်အလဵုအသဳပၞာန်ရောၚ် ဂွံတီလဝ် နူလိက်ပရိုၚ်တြးဝါဒအလဵုအသဳတံရ။
ကမ္မတဳပရေၚ်ညဳသၟဟ်ဂကူကေုာံ ပရေၚ်ပ္ညဳပ္ညပ်ထမံက်ရုပ်ရဴ ၜိုဟ်လလမ် NSPNC အလဵုအသဳပၞာန်ကေုာံ ဂကောံသဳကၠဳပ္ညဳပ္ညပ်မဟာမိတ်ကောန်ဍုၚ်အရၚ် ၇ ဂကောံထ္ပက်လဝ်စၟတ်တဲတံဝွံ ဂိတုဂျောန် ၉ ဂှ် ဆဵုဂဗသဳကၠဳလဝ် ပ္ဍဲဒၞာဲဟဝ်တေဝ် M Gallery နေပျဳဒဝ် ဗွဲပလးနွံမံၚ်ရောၚ်။ သွက်ဂွံဆက်ရေၚ်တၠုၚ်အာ ပရေၚ်ဆဵုဂဗသဳကၠဳဗွဲပလးကီု ပရေၚ်သဳကၠဳလုပ်သၞောဝ်တံ သွက်ဂွံပလေဝ်အာ သ္ဇိုၚ်သၞောဝ်ဥပဒေ ဇရေၚ်စၠတ်ထဝ် ညံၚ်ဂွံပတိုန်ထ္ၜးအာ ၄၃ တင်ဂှ် ဖန်ဖက်မံၚ်ရောၚ် ဥက္ကဌ NSPNC ဒုတိယသ္ကိုပ်ပၞာန်ဇၞော် ယာပျေအ် ဟီုလဴရ။
ပရေၚ်တၚ်တုပ်စိုတ် ၄၃ တင်တံဏံဂှ် NSPNC ကီု ဂကောံရပ်လွဟ် ကောန်ဍုၚ်အရၚ်ထ္ပက်လဝ်စၟတ်တဲ NCA တံကဵု ဟွံထ္ပက်လဝ်စၟတ်တဲကေုာံ ဗော်ပရေၚ်ဍုၚ်ကွာန်တံ နူကဵုဆဵုဂဗသဳကၠဳလဝ်တေံတုဲ ဂွံလဝ်တင်တုပ်စိုတ် သွက်ပလေဝ်အာသ္ဇိုၚ်သၞောဝ်မဒှ်ရ။
တင်နၚ်အပ္ဍဲသ္ဇိုၚ်သၞောဝ်ဥပဒေ ၄၃ တင်ဏံဂှ် သွက်ဂွံပကောံပတိုန် ထ္ၜးအာ ဇရေၚ်စၠတ်ထဝ်ကၟိန်ဍုၚ်တုဲ ညံၚ်ဂွံပလေဝ်အာရောၚ် နကဵုညးတာလျိုၚ် ဂဥုပ်ဒပ်ပၞာန် အလန်လက်ကရဴအိုတ် ပ္ဍဲကဵုသဘၚ်တ္ၚဲဒပ်ပၞာန်ဂှ် သမ္မတသီအဝဵု ဥူမေန်အံၚ်လှိုၚ် ကဵုသမ္တီ ဟီုလဴကဵုလဝ်ရောၚ်။
တင်နၚ် ပလေဝ်သ္ဇိုၚ်သၞောဝ်တံဂှ် ပ္ဍဲကဵုၝောံပိုဒ် ၂၆၁ သ္ကိုပ်ဝန်ဇၞော် ရးကေုာံ တွဵုရးတံဝွံ နူကဵုသမ္မတကၟိန်ဍုၚ် တိုက်ရိုက်ရုဲစှ်ခါန်ကၞက်မာန်ဂှ် ညံၚ်ဂွံပလေဝ်အာ NSPNC ကဵု ဗော်ပရေၚ်ဍုၚ်ကွာန်တံ သ္ပလဝ်ဒတန်ရောၚ်။
အပ္ဍဲကဵုစၠတ်ထဝ်အလဵုအသဳပၞာန် ယဝ်ရ ပလေဝ်ၝောံပိုဒ် ၂၆၁ မာန်မ္ဂး အခိၚ်ဂတးဏံ သ္ကိုပ်ဝန်ဇၞော်ရးကေုာံတွဵုရးတံဂှ် နူကဵုသမ္မတ ရုဲစှ်ခါန်ကၞက်ကဵုဟွံသေၚ်တုဲ၊ နူကဵုစၠတ်ထဝ်ရး၊ တွဵုရးဆေၚ်စပ် တံဟေၚ် တိုက်ရိုက်သွက်ဂွံရုဲစှ်ခါန်ကၞက်အာ မဒှ်ရ။
သ္ကိုပ်ဝန်ဇၞော်ရးကဵု တွဵုရးတံဂှ် နူကဵုညးစၞးအမာတ် ကောန်ညးဍုၚ်ကွာန်ရဲဒေသညးတံ ရုဲစှ်ကဵုလဝ်ဂှ်ဟေၚ် မၞိဟ်ထေက်ကြိုက်မွဲ ရုဲစှ်ပတိုန်အာဂှ် ဒှ်ပရေၚ်ကိတ်ညဳအိုတ်ရောၚ် ညးဒေသတွဵုရးမန်မွဲတၠ ဟီုရ။
“ပိုဲတံဂှ် အာမံၚ်ဍုၚ်ဒဳမဝ်ကရေဇြဳရ ဟီုမံၚ်ဗီုဏံဂှ် ဒှ်အလဵုအသဳ ညးဍုၚ်ကွာန်ရုဲစှ်ကဵုလဝ် ညံၚ်ရဴသၞောတ်ပဒေသရာဇ်တေံကီု ပရေၚ်ဏံလေဝ် ညးခါန်ကၞက်အာကေတ်တ်၊ ပရေၚ်တေံလေဝ် ညးခါန်ကၞက်အာကေတ်တ်၊ အရာရာဇၟာပ်ဒၞာဲအိုဿီု ညးတေံဟေၚ်စဳရေၚ်ဖန်ဖက်အာကေတ်တ်ဂှ်တှ်ေ ဟွံစှ်ေသဘာဝကွေံကွေံပုဟ်။ သ္ကိုပ်ဝန်ဇၞော်ရး တွဵုရးတံဂှ် ရုဲစှ်အာမၞိဟ်ထေက်တန်အိုတ် အပ္ဍဲကဵုညးစၞးနွံမံၚ် ရးကဵုတွဵုရးညးတံ ရုဲစှ်လဝ်ဂှ်ဂပ်ဂဝ်အိုတ်ရ၊ မၞိဟ်ဒးဒုၚ်ရုဲစှ်ဂှ်လေဝ် ယဝ်ရဍေံဂၠာဲသွက်ဂုဏ်ဖဵုဍေံသၟးတှ်ေလေဝ် ဖန်ဟွံမာန်ပုဟ်။ ကွေံကွေံဂှ်တှ်ေ မၞိဟ်ကိတ်ညဳကဵုတွဵုရးညး၊ မၞိဟ်ဒှ်ဖဵုသွက်တွဵုရးညး၊ မၞိဟ်နွံကဵုစိုတ်ဆာန်တွဵုရးညးတံ ရုဲစှ်ဂှ်တှ်ေ ပဵုတုဲထေက်ကြိုက်ရောၚ်” သာ်ဝွံ သ္ဂးရ။
ပြဟ်ဟ်ဏံမ္ဂး ပရေၚ်ပလေဝ်သ္ဇိုၚ်သၞောဝ်ဥပဒေကီု သွက်လၟေၚ်ကမၠောန် ပရေၚ်ၜိုဟ်လလမ်ကီု နူကဵုကမ္မတဳဗဟဵု ထမံက်ရုပ်ရဴပရေၚ်ၜိုဟ်လလမ်ကေုာံ ညဳသၟဟ်ကောန်ဂကူ ကော်ဘိက်သဳကၠဳမံၚ်ကဵု ဂကောံရပ်လွဟ် ကောန်ဍုၚ်အရၚ်တံတုဲ ဆဵုဂဗသဳကၠဳလဝ်ဗွဲပလးရောၚ်။
အပ္ဍဲပေါဲသဳကၠဳဏံဂှ် ဥက္ကဌ NSPNC ဒုတိယသ္ကိုပ်ပၞာန်ဇၞော် ယာပျေအ်၊ ညးအုပ်ကာ ဒုတိယသ္ကိုပ်ပၞာန်ဇၞော် မေန်နိုင်ကေုာံ ကောန်ဂကောံ ကမ္မတဳပ္ညဳပ္ညပ်တံတိုန်စိုပ်လဝ်တုဲ လပါ်ဂကောံမဟာမိတ်ကောန်ဍုၚ်အရၚ် ရပ်လွဟ် ၇ ဂကောံတံဂှ် ကောန်ဂကောံပရေၚ်သဳကၠဳပ္ညဳပ္ညပ်တံ တိုန်စိုပ်လဝ်အိုတ်ရ။
အပ္ဍဲဏံ နူကံၚ်သဳကလေၚ်ဒက်ပတန်တွဵုရးသေံ (RCSS) ညးအုပ်ကာ (၁) သာဒ်သိုၚ်င္ၚေန်၊ ကံၚ်သဳပရေၚ်ၜိုဟ်လလမ် KNU/KNLA ညးအုပ်ကာ (၁) သဝ်ကျဝ်ညောအ်၊ နူဗော်ဍုၚ်မန်တၟိ (NMSP) ကမ္မတဳကေၚ်ကာဗဟဵု နာဲအံၚ်မ္ၚဵုတံ တိုန်စိုပ်ရ။
တုဲပၠန် ညးအုပ်ကာနာနာ ဂကောံဒဳမဝ်ကရက်တေတ်ဠာဟူ (LDU) ကျာယာကုက်၊ သ္ကိုပ်ကာပၞာန် ဒပ်ပၞာန်ကရေၚ်ဒဳမဝ်ကရေဇြဳ (DKBA) သဝ်သိၚ်ဝေန်၊ ညးအုပ်ကာနာနာ ဗော်ဗၠးၜးတွဵုရးရခေၚ် (ALP) သဝ်မြသန္တာကဵု ညးစၞးတၞဟ်ဟ်တံလေဝ် တိုန်စိုပ်လဝ်ကီုရ။
ပရိုၚ် – သြင်လောန်တိုၚ်မ်
Photo – Social Media