မတ်မလီု၊ ဂျောန် ၁၂
ကြဴနူဒပ်ပၞာန်သီအဝဵုတုဲ ပေါဲဗတိုက်ကလေၚ်ဒှ်ကၠုၚ်လဝ် အပ္ဍဲလ္ပာ်ဒေသ ဒိုဟ်အဂၞဲဍုၚ်ဗၟာဏံ ဂကောံရပ်လွဟ်နာနာ သုၚ်စောဲစကာသှ်ေဇးကၠုၚ်မံၚ် မါၚ်တပ်တိကဵုမကမ်ဗုမ် ဟွံခတိုဟ်ဏီတံဂှ် သွက်ညးဒေသတံ ဒှ်မံၚ်ဘဲအန္တရာဲ ဇၞော်ဇၞော်မွဲရောၚ် ဂကောံအခေါၚ်အရာမၞိဟ် ကရေၚ် KHRG ဟီုရ။
နူကဵုဂကောံအခေါၚ်အရာမၞိဟ် ကရေၚ် KHRG ပတိတ်လဝ် လိက်လလောၚ်ပရိုၚ်အခေါၚ်အရာမၞိဟ် ပ္ဍဲအေဗရာ ၂၀၂၆ လၟေၚ် ၂၆ နကဵုက္ဍိုပ်လိက် ” ပရေၚ်ညးဒေသတံဒးဘဲဒဏ် ဟိုတ်နူမါၚ်တပ်တိ ကဵု မကမ်လွဟ်ဇၞော်သှ်ေဇးမံၚ်တံ ” ဂှ် ချူထမံက်ထ္ၜးလဝ်ရောၚ်။
အပ္ဍဲလ္ပာ်ဒေသဒိုဟ်အဂၞဲဍုၚ်ဗၟာ ပရေၚ်သုၚ်စောဲစကာမံၚ် မါၚ်တပ်တိတံညံၚ်ဂွံဒေါအ်အာဂှ် ဟွံဂွံဆဵုလဝ် အယောၚ်အလာဏီပုဟ် KHRG ဟီုလဝ်ရ။
ပရူပရာဂှ်တှ်ေ ညးဒေသတံ ဟွံထေင်ခယျလဝ်မွဲသာ် လိုန်ဒးမါၚ်တပ်တိကဵု မကမ်လွဟ်ဇၞော်သှ်ေမံၚ်ဂှ်တုဲ ဒးဘဲဒဏ်၊ ဇိုၚ်တဲဇကုဒးဆောံလေၚ်အာကီု သီုကဵုလမျီုဒးဆောံလေၚ်အာက္တဵုဒှ်မံၚ်ဂှ် ဟိုတ်နူပရေၚ်တံဏံရောၚ် KHRG သ္ဂးရ။
ဖဵုအဆက်လက္ကရဴဂှ်တှ်ေ ဟိုတ်နူမါၚ်တပ်တိတုဲ သ္ၚိဌာန်ညးဒးဒုၚ်ဘဲဝပ်တံ သ္ဂောံဆက်ဂမျိုၚ်လမျီု ဂွံတန်တဴအာ ပ္ဍဲအနာဂတ်ဂှ်လေဝ် ဒှ်ကၠုၚ်အခက်အခုဲကဵု ပရေၚ်ကော်ဆော နာနာသာ်တံနွံရောၚ် သ္ဂးရ။
အခိၚ်အကြာကာလပရေၚ်သီအဝဵုဏံ ဒပ်ပၞာန်ဗမာကီု သီုဂကောံဒပ်ပၠန်ဂတးတံ သုၚ်စောဲမံၚ်မါၚ်တပ်တိနာနာသာ်တုဲ အကြာဂှ် ညးဍုၚ်ကွာန်တံဒးဝပ်ချိုတ်ဂၠိုၚ်အိုတ်ဂှ် ဒၟာနူကဵုမါၚ် ဒပ်ပၞာန်ဗမာတံရောၚ် နူဂကောံသုတေသနမါၚ်တံ ဟီုဂးလဝ်ရ။
အတိုင်တင်နၚ်လိက်ဒုၚ်စဳရေၚ် Landmine Monitor ပတိုန်လဝ်စၟတ်သမ္တီ ပရူမါၚ်တပ်တိကဵု ကဝေက်မကမ်လွဟ်ပၞာန်သှ်ေဇးမံၚ် မွဲအလုံဂၠးကဝ်မ္ဂး ဍုၚ်ဗၟာဂှ် ကြဴနူဒပ်ပၞာန်သီအဝဵုတုဲ ပ္ဍဲဂၠးကဝ်ဏံ ဒှ်မံၚ် ဍုၚ်မၞိဟ်ချိုတ်ဂၠိုၚ်အိုတ်ဂှ် ဟိုတ်နူမါၚ်တပ်တိတံဏံ မဒှ်ရ။ ညံၚ်သ္ဂောံၚးတး ပသောင်သအးအာကဵု မါၚ်တပ်တိကဵု မကမ်လွဟ်ပၞာန် ဟွံခတိုဟ်ဏီတံကီု အပ္ဍဲကဵုဒၞာဲဘဲအန္တရာဲ က္တဵုဒှ်မာန်တံဂှ် ညံၚ်ဂွံချူဗာန်စွံလဝ် လိက်ကဵုသတိမါၚ်တပ်တိညိဂှ် ညးဒေသတံ အာတ်မိက်မံၚ်နွံရ။
ပရိုၚ် – သြင်လောန်တိုၚ်မ်
Photo – Social Media