တိုကျို၊ ဂျောန် ၁၂
လ္တူသိုဲယှေဝ်မဳဒဳယာတံဂှ် ကောန်ဂကောံ ၄၁ တၠတံ လလောၚ်တြးပတောအ်လဝ်တုဲ လီကေတ်လဝ်သြန်စရိတ်တန်ဗတောန်တံဂှ် ရပ်ကၠေၚ်လဝ်ရောၚ် ဒပ်ဗၠာဲသၟိၚ်ရးအိုဆာကာ ဍုၚ်ဂျပါန် ပ္ဍဲဂိတုဂျောန် ၁၀ ဂှ် ပတိတ်ပရိုၚ် လလောၚ်တြးလဝ်ရ။
အပ္ဍဲကဵု အကြာညးဒးဒုၚ်ရပ်လဝ်တံမ္ဂး ဥက္ကဌကာမ္မဏဳ ဖန်ဗဒှ်အက်ပလီခေဝ်ယှေန် Unity နူဍုၚ်အိုဆာကာ အာယုက် ၂၉ သၞာံ ယှေန်ဂို မက်သူမူရာ လေဝ် ပါလုပ်မံၚ်ကီုရောၚ်။
အတိုင်လဟီု ဒပ်ဗၠာဲသၟိၚ်တံမ္ဂး ဂကောံဏံဝွံ အကံက်သိုဲယှေဝ်မဳဒဳယာဆေၚ်စပ်ကဵုစၞစ ကေုာံ ပရေၚ်ကျေဝ်ဂေါဝ် Follower ဂၠိုၚ်ၚ်တံဂှ် ရာန်ကေတ်နူညးစအကြာမွဲအဆံၚ်တုဲ အဟိန်တၠအကံက်ပြံၚ်သၠာဲအာဂှ် Follower တံ ညံၚ်ဟွံဂွံတီ ပတောအ်လဝ်နဒဒှ်မၞိဟ်ယၟုဒယှ်အန်လာၚ်တုဲ ဆက်သုၚ်စောဲကၠုၚ်လဝ် မဒှ်ရ။
စနူဂိတုနဝ်ဝေမ်ဗါ ၂၀၂၅ စဵုကဵုဂိတုမာတ် ၂၀၂၆ ဂှ် “တိုန်တန်ဗတောန်ဏံတုဲ Follower လေဝ်ဂၠိုၚ်၊ သြန်လေဝ်လုပ်ဂၠိုၚ်ကၠုၚ်” ဂးတုဲ ပတိုန်လိက်ဟွံဍာံပြတုဲ နူညးဗြဴ ၃ တၠ ရးအိုဆာကာဂှ် သြန်ယာန် ၈၈၀,၀၀၀ (ဒဝ်လာအမေရိကာန်ၜိုတ် ၅,၅၀၀) ဂှ် နဒဒှ်သြန်စရိတ်တန်ဗတောန် လီကေတ်လဝ်ဂးတုဲ ဒးဒုၚ်စောဲလဝ်အမှုရ။
ပြဟ်ဟ်ဏံမ္ဂး ညးဒးဒုၚ်ဒှ်လဝ်သံသယတံဂှ် ပရေၚ်အမှုဏံ ဒုၚ်လဝ်ဝန်ကီုဟာ ဟွံဒုၚ်ဝန်ဟာဟီုဂှ် နူကဵုဒပ်ဗၠာဲသၟိၚ်တံ ဟွံပတိတ်လလောၚ်တြးဏီပုဟ်။
သ္ပသ္ဇိုၚ်ကဵုသၞောတ် ကေတ်ကဝ်မယှေန် လတူပရေၚ်သွံကပေါတ် Affiliate Marketing တုဲ တံၚ်ဂြဲဆဝ်မ္ၚုဟ်ကၠုၚ်လဝ် မၞိဟ်တံရောၚ် ခယျလဝ်ရ။ သွက်ရဲတိုန်တန်ဗတောန်တံ ညံၚ် Follower သ္ဂောံဂၠိုၚ်တိုန်ကၠုၚ်ဂှ် ဗီုလဵုဂွံကၠောန်အာရော ကဵုကၠုၚ်မံၚ်ပရေၚ်ခန်လ္ၚတ်ကီုလေဝ် ဇေတ်တ်ဂှ်မ္ဂး နူမၞိဟ်သီုအလုံမွဲဍုၚ်ပွဳပွူ ၂,၃၀၀ ဂှ် ဒဵုကဵုသြန်ယာန် ၆၅၀ ကိုတ် (ဒဝ်လာအမေရိကာန် ၄ ဗဳလဳယာန်ပြၚ်) လီကေတ်လဝ်မာန်ရောၚ် ညးစၟဳစၟတ်လဝ် ဂကောံဏံ တော်ခယျလဝ်ရ။
တုဲပၠန် ဂကောံဏံဝွံ ဒှ်မံၚ်ဗီုပြၚ်ဂကောံရာဇာဝတ် ထမံက်ယၟုဟွံမာန် ကောံဂကောံချိုတ်ချိုတ်ပၠိုတ်ပၠိုတ်ဟၟဲ ဗီုပြၚ်ဂကောံ “Tokuryu” တိုကူယူ ဆဵုညာတ်လေပ်မံၚ် ပ္ဍဲဂျပါန်တံဟာ ဟီုဂှ် နူဒပ်ဗၠာဲသၟိၚ်တံ ဆက်စၟဳစၟတ်မံၚ်ရောၚ်။
ပ္ဍဲဂိတုဂျောန် ၉ ဂှ် ဂကောံဒပ်ဗၠာဲသၟိၚ်တံ လုပ်စၟဳစၟတ်ဒၞာဲဆက်စပ်မံၚ်ကဵု ဂကောံတံဗွဲမဂၠိုၚ်တုဲ ကပေါတ်သက်သဳ သမာတ်ဖုန်၊ ကောန်ပျူတာတံ ၁,၀၀၀ ပြၚ် သီဂွံလဝ်ရ။
Ref:mainichi