ကျာ်ထဝ်၊ ဂျောန် ၁၃
အပ္ဍဲတွဵုရးမန် ပွိုၚ်ဍုၚ်ကျာ်ထဝ် မဒှ်ဒၞာဲ ဂကောံဒပ်ပၠန်ဂတးတံ ချဳဒရာၚ်ဍိုန်လျမံၚ်ဏံဂှ် ဒပ်ကဝ်မယှေန်ပၞာန် ဗက်ဂေတ်ဂေၚ် အကြာကွာန်ဂမၠိုၚ်တုဲ တံၚ်ရပ်မံၚ်ပဝ်တာသၟတ်တံ သွက်ယိုက်ဝန်ပၞာန်ရောၚ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်မ်ရ။
သွက်ဂွံဒးထပ်ဗပေၚ်ကဵုဇြဟတ်ကောန်ပၞာန် ပၟိက်ကိစ္စဆက်နွံမံၚ်ဂှ်ရ စနူဂိတုဏံမံက်ဂှ် အပ္ဍဲပွိုၚ်ဍုၚ်ကျာ်ထဝ် ဒပ်ကဝ်မယှေန်ပၞာန် ဂေတ်မွဲကွာန်တုဲမွဲကွာန် ရပ်ကော်ဏာလဝ်သၟတ်တံ သွက်ယိုက်ဝန်ပၞာန်ရောၚ်။
သွက်ဂွံယိုက်ဝန်ပၞာန် နကဵုကွဳစက်သ္ၚိ ဗက်ဂေတ်ဂေၚ်မံၚ် အကြာကွာန်တုဲ ဗက်ရပ်မံၚ်သၟတ်တံ ယဝ်ဆဵုညာတ်အာ ညးတြုံ ၂ တၠ ဍိုက်အာကွဳလိုန်ဓါတ်မွဲမ ဒှ်ဒှ်၊ သၟတ်ညးတြုံ လုပ်အဝေါၚ် အယုက်ယိုက်ဝန်ပၞာန်မွဲဒှ်ဒှ် ဒပ်ကဝ်မယှေန်ပၞာန်တံ ရပ်ကော်ဏာ မွဲအလန်ဓဝ်ရောၚ်။
အပ္ဍဲဒၞာဲသ္ကုတ်ဂၠံၚ်ဆက်စၠောံကွာန် ခလောန်၊ ဗိုယျာဂျဳ၊ မုက်ပလေၚ်၊ ကျာ်ကတာ၊ တုၚ်ခွ ကေုာံ ကမောန်ချံၚ်တံဂှ် ကောန်ဒပ်ကဝ်မယှေန်ပၞာန် ဇြဟတ်ၜိုတ် ၃၀ တံ ဗက်ရပ်မံၚ်ပဝ်တာ သွက်ယိုက်ဝန်ပၞာန်တုဲ အပ္ဍဲဂိတုဏံမ္ဂး အောန်အိုတ် သၟတ် ၁၀ တၠပြၚ် ဒးဒုၚ်တံၚ်ဏာပဝ်တာနွံမံၚ် ညးဒေသတံ သ္ဂးရ။
အပ္ဍဲပွိုၚ်ဍုၚ်ကျာ်ထဝ် ဒပ်ပၞာန်တံ ဂံၚ်ဂေတ်အကြာကွာန်တုဲ ဗက်ရပ်ကေတ်မံၚ် သွက်ယိုက်ဝန်ပၞာန်သာ်ဏံဂှ်တှ်ေ ဟိုတ်နူဂကောံဒပ်ပၠန်ဂတးတံ ပရေၚ်ချဳဒရာၚ်ပၞာန် ဍိုန်လျမံၚ်တံရောၚ် ညးဒေသတံ ဟီုဂးမံၚ်အိုတ်ရ။
လ္တူဍုၚ်ကျာ်ထဝ် အခိၚ်ကၠာတေံဂှ်တှ်ေ ကောန်ဒပ်ကဝ်မယှေန်ပၞာန်တံ ကျိုၚ်ကယျိုၚ်ယူနဳဖံၚ်တုဲ ဟွံဂံၚ်အာကၠုၚ်ကီုလေဝ် အခိၚ်လၟုဟ်ဏံ သွက်ယိုက်ဝန်ပၞာန် စှ်ေစိုပ်အကြာကွာန်တံတုဲ ဗက်ရပ်တံၚ်မံၚ်ပဝ်တာရောၚ်။
အတိုင်တင်နၚ် ဌာန်ပရိုၚ်သြင်လောန်တိုၚ်မ် ပကောံဂွံလဝ်တံမ္ဂး အပ္ဍဲတွဵုရးမန် ဒပ်ပၞာန်သီအဝဵု ပံက်ကၠုၚ်လဝ် တန်ဗတောန်ယိုက်ဝန်ပၞာန် ဇၟာပ်ဂိတု စနူလၟေၚ် ၁ စဵုကဵုလၟေၚ် ၂၅ မ္ဂး မၞိဟ်ဒးဒုၚ်ပကောံဏာ သွက်ယိုက်ဝန်ပၞာန် ဟွံအောန်နူ ၅၂၀၀ တၠ နွံမံၚ်ရောၚ်။
ပြဟ်ဟ်ဏံမ္ဂး သွက်သ္ဂောံထပ်ပံက်အာ တန်ဗတောန်ယိုက်ဝန်ပၞာန် ညးဍုၚ်ကွာန် လၟေၚ် ၂၆ အပ္ဍဲဂိတုဏံမာန်ဂှ် ဒပ်ကဝ်မယှေန်ပၞာန်တံ နကဵုနဲကဲနာနာ ပကောံကော်ကေတ်မံၚ်သၟတ် နူကဵုဒေသတံ သွက်ဂွံလုပ်သ္ပကောန်ပၞာန် သွက်ယိုက်ဝန်ပၞာန်ရောၚ်။
ပရိုၚ် – သြင်လောန်တိုၚ်မ်
Photo – CJ