မတ်မလီု၊ ဂျောန် ၁၃
ဟိုတ်နူ ပရေၚ်စက်သၠဲရမျှာၚ် (Sound Box) တောဲလဝ်တံ ရမျှာၚ်ထတ်ညာန်လောန်အာဂှ်ရ ပရေၚ်ထတ်ယုက် ကောန်ဍုၚ်ကွာန်တံ ယောၚ်ယာဟုတ်စှ်ေအာမံၚ်တုဲ လတူပရေၚ်ဏံ ညံၚ်ဂွံဒၞာတာရပ်စပ်ကေတ်အရေဝ် ချိုတ်တ်ပၠိုတ်တ်မာန်ဂှ် အပ္ဍဲစၠတ်ထဝ်တွဵုရးမန် ညးဒစဵုဒစးဟၟဲ သ္ပဒတန် ဖျေံဏာလဝ်သ္ဂုတ်သွာတ်တုဲယျ။
အပ္ဍဲကဵုကောံဓရီုလၟေၚ်ဍာံ ဒုတိယဝါ စၠတ်ထဝ်တွဵုရးမန် အလန်တတိယ ကၠောန်ဗဒှ်လဝ် ဂိတုဂျောန် ၉ ဏံဂှ် ညးစၞးစၠတ်ထဝ်တွဵုရး နူပွိုၚ်ဍုၚ်ၜဳကလေၚ် ဒေသဆန္ဒမာဲလၟိဟ် ၂ ဥူတေန်ယဳ ပၠုပ်ဂလာန် ပတိုန်ထ္ၜးလဝ်ရောၚ်။
ဂလာန်ဏံဝွံ အပ္ဍဲကောံဓရီုစၠတ်ထဝ်တွဵုရးမန် ကၠောန်ဗဒှ် ဂိတုဂျောန် ၁၂ ဏံဂှ် ညးစၞးစၠတ်ထဝ် ၄ တၠ ထံက်ဂလာန်သဳကၠဳလဝ်ဂှ်ကီု သီုကဵုဥက္ကဌစၠတ်ထဝ်တွဵုရး ဥူတိတ်ထွိုဲ လုပ်ကဵုကသပ် ဘိုၚ်သဳကၠဳလဝ်ကီုတုဲ ကြဴနူဂှ် ညးဒစဵုဒစးဟၟဲ သ္ပလဝ်ဒတန် မဒှ်ရ။
ညးပတိုန်ဂလာန်ဟီုလဝ်ဂှ်တှ်ေ ဟိုတ်နူရမျှာၚ်ထတ်ညာန်မံၚ် နူကဵုစက်သၠဲရမျှာၚ် (Sound Box) တောဲလဝ်တံဂှ်တုဲ ယဲကတောဝ် ဂကူနာနာသာ်၊ ယဲဆီၜေတ်၊ ယဲကောန်တၟအ်၊ ယဲထာၚ်စၞ၊ ယဲဗုၚ်အိက်တံ က္တဵုဒှ်ဂၠိုၚ်တိုန်တုဲ ကဵုမံၚ်ဒဒိုက်စိုတ် သွက်မၞိဟ်ဂမၠိုၚ် နကဵုနဲကဲနာနာ အန္တရာဲသၠဲလးကၠုၚ်မံၚ်ရောၚ်ဂှ် ထံက်ထ္ၜးလဝ်ရ။
ဂလာန်ပတိုန်ထ္ၜး ညံၚ်ဂွံဗဒေါအ်တာဒၞာ ပရေၚ်ပံက်စက်သၠဲ ရမျှာၚ်(Sound Box) တောဲလဝ်တံဂှ် အပ္ဍဲစၠတ်ထဝ်တွဵုရးမန် ညးဒစဵုဒစးဟၟဲ သ္ပလဝ်ဒတန်တုဲဒှ်အာတုဲ နူကဵုဂကောံအလဵုအသဳ တွဵုရးမန် အလဵုအသဳပၞာန်တံဂှ် ဒးထမံက်အာရုပ်ရဴ မဒှ်ရ။
ပရေၚ်ပံက်စက်သၠဲရမျှာၚ်(Sound Box) တောဲလဝ်တံဂှ် အတိုင်ဥပဒေ ပရေၚ်အုပ်ဓုပ်အရာပ်/ ဂအုံကွာန် ချူခၞံလဝ် ပ္ဍဲသၞာံ ၂၀၁၂ တေံဂှ် ဒးရပ်စပ်ကေတ်အာအရေဝ်ရောၚ် ဝန်ဇၞော်ပရေၚ်မၞိဟ် ဂကောံအလဵုအသဳတွဵုရးမန် ဥူတေန်ဇြဝ်ထောန် ဟီုရ။
အတိုင်ဥပဒေပရေၚ်အုပ်ဓုပ်အရာပ်/ ဂအုံကွာန် အခန် (၇) ၝောံပိုဒ်ပါ် (ဇျှ) မ္ဂး သွက်ဂွံပံက်စက်သၠဲရမျှာၚ် (Sound Box) မာန်ဂှ် ဒးအာတ်အခေါၚ် ဇရေၚ်သ္ကိုပ်ပရေၚ်အုပ်ဓုပ် အရာပ်ကွာန်ဆေၚ်စပ် တံရောၚ်။
အခေါၚ်ဟၟဲမွဲသာ် ယဝ်ရပံက်စက်သၠဲရမျှာၚ် (Sound Box) ကီု၊ ပြသၞာပရေၚ်ထတ်ယုက်တံ မံက်တိုန်ကၠုၚ်မ္ဂး အတိုင်ဥပဒေ ပရေၚ်အုပ်ဓုပ် အရာပ်/ ဂအုံကွာန် ၝောံပိုဒ် ၂၅၊ ၂၆၊၂၇ တံမ္ဂး ဒုဟ်ဒဏ်ထံၚ် ၆ ဂိတု သၟးဟွံက ဒဏ်သြန်လေဝ် ဖျေံမာန်ရောၚ် ချူခၞံလဝ်ရ။
ပရိုၚ် – သြင်လောန်တိုၚ်မ်
Photo – MOI