တယိတ်ချံၚ်၊ ဂျောန် ၁၆
အပ္ဍဲကဵုရးတနၚ်သဳ ပွိုၚ်ဍုၚ်တယိတ်ချံၚ် အကြာကွာန်မေန်ဒါတ် ကဵု ကွာန်တိၚ်ကုၚ်တံဂှ် ဟိုတ်နူပေါဲဗတိုက်ၜါလပါ် က္တဵုဒှ်လဝ်ဂှ်ရ ညးဒေသလၟိဟ်လ္ၚီပြၚ်တံ ဒးထောံဌာန်ဒၞာဲဝါဲတုဲ ဂြိပ်ပါဲဒဴမံၚ်ရောၚ် ရိုဟ်ကၞက်ပရိုၚ်ဒေသတံ ဟီုကဵု ဌာန်ပရိုၚ်သြၚ်လောန်တိုၚ်မ်ရ။
ပ္ဍဲဂိတုဂျောန် ၁၅ ၜိုတ်အခိၚ်ဂယး ၇ နာဍဳဂှ် ကရောၚ်ပၞာန် ဒပ်ကဝ်မယှေန်ပၞာန် ဇြဟတ်မၞိဟ် ၇၀ ပြၚ် ဖျေံလဝ်ဒပ် ပ္ဍဲဗဒိုပ်ဝေန်ဝတံဂှ် ထပက်ကရောၚ်ပၞာန် နူကွာန်မေန်ဒါတ်တုဲ လုပ်အာလပါ်ကွာန်တိၚ်ကုၚ်ဂှ် ပေါဲဗတိုက်အကြာၜါလပါ် ဒှ်ကၠုၚ်လဝ်ဇၞော်ကဵုဇြဟတ်ရောၚ်။
အကြာပေါဲဗတိုက်ၜါလပါ် လံအာကြပ်ပွိုၚ် ၂ နာဍဳဂှ် လပါ်ကောန်ပၞာန် ဒပ်ကဝ်မယှေန်ပၞာန်တံ ပရေၚ်ဒးဝပ်ချိုတ်လဝ် ဂၠိုၚ်မာန်ရောၚ် သ္ဂးရ။
ကရောၚ်ပၞာန်ဒပ်ကဝ်မယှေန်ပၞာန် ဒးဘဲဂိလဝ် ပေါဲဗတိုက်ဂှ်ရ ကလေၚ်ဆုတ်စဴအာ လပါ်ကွာန်မေန်ဒါတ်တုဲ နူဗဒိုပ်ဝေန်ဝဂှ်လေဝ် ပန်မံၚ်ကဵုလွဟ်ဇၞော်တံ အဆက်က်ကီုရောၚ်။
ဟိုတ်နူပေါဲဗတိုက် ၜါလပါ်ဒှ်လဝ်ကီု ဒပ်ကဝ်မယှေန်ပၞာန်တံ ပန်လဝ်လွဟ်ဇၞော်ကီုတုဲ ညးဒေသ နူကွာန်မေန်ဒါတ်၊ တေတ်တိုကုၚ်၊ တိၚ်ကုၚ်တံ ၄ ကွာန်ဂှ် လၟိဟ်မၞိဟ် ၁၀၀၀ ပြၚ် ဒးဂြိပ်ပါဲအောပ်မံၚ် ဒၞာဲဗၠးဘဲတံရ။
ပရိုၚ် – သြင်လောန်တိုၚ်မ်
Photo – CJ