ဝါယှေန်တန်ဒဳသဳ၊ ဂျောန် ၁၄
ယၟုသမ္မတအမေရိကာန် ဒဝ်နေဝ်ထရ နူမံၚ်လ္တူ ဌာန်စမြိုၚ်ဒၞာဲ သေန်တာကနေဒဳ ပ္ဍဲဝါယှေန်တန် ဒဳသဳဂှ် ပါဲပတိတ်ထောံလဝ် နူအခိၚ်ဂယးပြဟ် ဂျောန် ၁၃ တေံရ။
သွက်သ္ဂောံပါဲပတိတ်ထောံယၟု သမ္မတ ဒဝ်နေဝ်ထရဂှ် နူရုၚ်သၞောဝ်ဓဝ် ဖျေံလဝ်အမိၚ်တုဲ နူကဵုလပါ်အလဵုအသဳဟီု ဒဒှ်ရအခိၚ်စၟတ်ပိုၚ်ခြာလဝ် လက်ကရဴအိုတ်ဂှ် ဂတာပ်အခိၚ်ဟွံမာန်ကီုလေဝ်၊ ဗွဲကြဴ ကမၠောန်ပတိတ်ယၟုဂှ် သၟာကမၠောန်တံ စနူဂယး ၁ နာဍဳပြၚ် ရေၚ်တၠုၚ်ကၠောန်လဝ်တုဲယျ။
ယၟုသေန်တာအနုပညာဏံဂှ် သွက်သ္ဂောံပြံၚ်သၠာဲအာ “The Donald J. Trump and The John F. Kennedy Memorial Center for the Performing Arts” သမ္မတသမ္တီ ဒဝ်နေဝ်ထရ ကေုာံ ဂျောန်အက်ဖ်ကနေဒဳ ရောၚ် ပ္ဍဲဂိတုဒဳဇြေမ်ဗါ တုဲကၠုၚ်တေံ ဂကောံဗုက် သေန်တာကနေဒဳ တံ ကဵုလဝ်မာဲ ဖျေံလဝ်သ္ဂုတ်သွာတ်တုဲ ယၟု ဒဝ်နေဝ်ထရ ဂှ် တောဲစုတ်လဝ်လ္တူ ဌာန်စမြိုၚ်ဒၞာဲဂှ်ရောၚ်။
ဆဂး အဝဵုသွက်သ္ဂောံပြံၚ်ယၟု သေန်တာကနေဒဳ ဂှ် နွံအပ္ဍဲစၠတ်ထဝ်ကောန်ဂရက်ဟေၚ် ပ္ဍဲဂိတုမေ ၂၉ ဂှ် သ္ဂုတ်သွာတ်တုဲ၊ ယၟုဒဝ်နေဝ်ထရဂှ် နူ ဌာန်စမြိုၚ်ဒၞာဲ ၊ ဝက်ဘ်သိုက် ကေုာံ တၞးလိက်တၞဟ်တံဂှ် ဒးနုက်ပတိတ်ထောံရောၚ် နာဲဗ္စာကၟိန်ဍုၚ်အမေရိကာန် ခရစ်စတိုဖာ ကူပါ ဖျေံလဝ်အမိၚ်ရ။
ဟိုတ်နူလဗိုတ်ကျာဒဂဵုတးပန်နွံကီု ဂွိၚ်ကဵုပရေၚ်ဂီုကၠီုသၟာကမၠောန်တံကီုတုဲ ကၠာအခိၚ်စၟတ်ပိုၚ်ခြာလဝ်ဂှ် ညံၚ်ဂွံပတိတ်ထောံ ဒှ်ဟွံမာန်ပုဟ် ဟီုတုဲ ဌာနဝန်ဇၞော်သွာၚ်သၞောဝ်ဓဝ်အမေရိကာန် ထပ်အာတ်လဝ် ထပဵုကဵုအခိၚ် ၁၂ နာဍဳရ။
ဆဂး နူရုၚ်သၞောဝ်ဓဝ် တးပါဲလဝ်တင်အာတ်မိက်ဏံတုဲ နူလပါ်အလဵုအသဳ ၜိုန်ရပတိုန်ပရေၚ်ခၠေဝ်သှ်ကီုလေဝ် နူရုၚ်သၞောဝ်ပရေၚ်ခၠေဝ်သှ်ဂှ်လေဝ် တးပါဲလဝ်ရောၚ်။
သေန်တာကနေဒဳ ဂှ် သွက်သ္ဂောံပတိုန်စရာဲကု သမ္မတ ဂျောန်အက်ဖ်ကနေဒဳ ဒးဒုၚ်ဂစိုတ်လဝ် ပ္ဍဲသၞာံ ၁၉၇၁ တေံတုဲ ပံက်လဝ်ရ။ ဒဝ်နေဝ်ထရဂှ် ပ္ဍဲသၞာံ ၂၀၂၅ ကလေၚ်ယိုက်တာလျိုၚ်သမ္မတတုဲမှ အပ္ဍဲဂကောံဗုက် သေန်တာကနေဒဳ ဂှ် ခါန်ကၞက်စုတ်ကဵုလဝ်မဟာမိတ်ညးတံရောၚ်။
ပြဟ်ဟ်ဏံမ္ဂး ယၟု ဒဝ်နေဝ်ထရ နွံလ္တူ ဌာန်စမြိုၚ်ဒၞာဲ သေန်တာကနေဒဳ ဂှ် ပတိတ်ထောံတုဲဒှ်အာ မဒှ်ရ။
Ref:Reuters