လန်ဒန်၊ ဂျောန် ၁၆
သွက်သ္ဂောံတာဒၞာအာ အခေါၚ်သုၚ်စောဲသိုဲယှေဝ်မဳဒဳယာ သၟတ်သၟဝ်အာယုက်သၟဝ် ၁၆ သၞာံတံရောၚ် အတိုၚ်လိက်လလောၚ်တြး သ္ကိုပ်ဝန်ဇၞော်ဗြိတိန် ကဳယာ သတာမာ ချူလဝ်တင်အဓိကဂှ် ထမံက်ထ္ၜးလဝ်ရ။
သွက်သ္ဂောံ တာဒၞာအာ Snapchat၊ TikTok၊ YouTube၊ Instagram၊ Facebook ကေုာံ X တံတုဲ WhatsApp ကဵု Signal တံ ဟွံပါလုပ်ပုဟ် အလဵုအသဳဗြိတိၚ် ဟီုရ။
“ပရေၚ် တာဒၞာ ၁၀၀ က္ဍိုပ်ကၠမ်ဂှ် ဒှ်အရာရုဲစှ်ပရေၚ်ဍာံစၟတ်တုဲ သွက်ပရေၚ်ဂီုကၠီုကဵု ပရေၚ်မိပ်သၠောၚ်ကောန်င္ၚာ် တံ ဂွံဒှ်အာတင်ယုတ်ဒေက်ဂှ် အဲဒစးဒုၚ်ပလေဝ်စလဝ် ဟွံသေၚ်ပုဟ် ” သ္ကိုပ်ဝန်ဇၞော်သတာမာ သ္ဂးရ။
ပ္ဍဲအရာပြိုၚ်ပ္ကာန် ပရေၚ်ကော်ဆောအန်လာၚ်မွဲဂှ် ကောန်င္ၚာ်အာယုက် ၁၁ သၞာံ နိုအာ ဒးချိုတ်အာလဝ်တုဲ မိဍေံ လံက်သဳ ဂေတ်သ်သေန်ဂှ် ဒုၚ်တၠုၚ်အရာပရေၚ်တာဒၞာဏံတုဲ ဒှ်အခေါၚ်အရာကောန်င္ၚာ်တံရောၚ် ဟီုရ။
သီုကဵုတာဒၞာအာ အခေါၚ်သုၚ်စောဲသိုဲယှေဝ်မဳဒဳယာ သၟတ်အာယုက်သၟဝ် ၁၆ သၞာံတံတုဲ သီုကဵုတာဒၞာ အာ ပရေၚ်ပတိတ် Live နွံလေပ်ကဵုဘဲအန္တရာဲတံကီု သွက်ဂွံပိုၚ်ခြာတာဒၞာအာ အခိၚ်ဗ္တံရောၚ် အလဵုအသဳဗြိတိၚ် ဟီုရ။
အပ္ဍဲဂၠးကဝ်မ္ဂး ဍုၚ်အလန်ပထမကၠာအိုတ် အဝ်သတေလျ တာဒၞာလဝ် အခေါၚ်သုၚ်စောဲသိုဲယှေဝ်မဳဒဳယာသၟတ် တံတုဲ ဍုၚ်တၞဟ်ဟ်တံလေဝ် အဟိန်လ္ၚတ်မံၚ် သွက်သ္ဂောံစဳဇန်ချူခၞံအာ ဥပဒေဗီုတံဏံကီုရ။
ပရေၚ် တာဒၞာ အလဵုအသဳဗြိတိန်ဏံဂှ် ညးဍုၚ်ကွာန် ၈၉ က္ဍိုပ်ကၠမ် ထံက်မံၚ်ဂလာန်ရောၚ် ပရေၚ်ကံက်လဝ်တင်နၚ်လညာတ်တံ ထမံက်တ္ၜးလဝ်ရ။
အပ္ဍဲပရေၚ်ကံက်လဝ်တင်နၚ်လညာတ် အလဵုအသဳတံမ္ဂး မိမကောန်င္ၚာ်တံ ၇၇ က္ဍိုပ်ကၠမ်ဂှ် ဒုၚ်တဲပရေၚ်တာဒၞာ အလဵုအသဳ ချူလဝ်ရ။
ပရေၚ်တာဒၞာ အလုံသီုဖအိုတ်ဏံ ရေၚ်တၠုၚ်အာကမၠောန် ဒှ်မာန်ဟာဟီုဂှ် တၠပညာသိုဲယှေဝ်မဳဒဳယာ မွဲတၠမှ ဟီုလဝ် ဟၟဲပုဟ် ထေၚ်ကေတ်ရ ညးဒက်ပတန်လဝ် ပရေၚ်စဵုဒၞာအန်လာၚ် ပွမသုၚ်စောဲကောန်င္ၚာ် ဂျေန် ဂါန်ဘေဝ်လ် ဟီုရ။
ၜိုန်ရအလဵုအသဳ တာဒၞာလဝ် ပရေၚ်သိုဲယှေဝ်မဳဒဳယာကီုလေဝ် ပ္ဍဲအဝ်သတေလျဂှ် သုၚ်စောဲ VPN တုဲ ဆက်စကာအာမံၚ် သိုဲယှေဝ်မဳဒဳယာ နွံဗွဲမဂၠိုၚ်ဏီရောၚ် သ္ဂးရ။
ဟိုတ်နူ ပရေၚ်တာဒၞာလဝ် ဗီုဗီုတံဏံတုဲ လ္တူအန်လာၚ်မ္ဂး သွက်ကောန်င္ၚာ်တံ ဂွံလုပ်စိုပ်အာ ဒၞာဲဒမၠုဇြိုဟ်ဟ်တံ ပဵုတုဲဒှ်မာန်ရောၚ် တၠပညာတံ ဟီုဂးလဝ်ရောၚ်။
Ref:BBC