ၜါသွာၚ်၊ ဂျောန် ၁၆
အပ္ဍဲတွဵုရးမန် ပွိုၚ်ဍုၚ်ကျာ်မြဟ် ဟိုတ်နူပေါဲဗတိုက်ကွာန်ၜါသွာၚ် သ္ၚိဌာန်ဒးဒုၚ်လီုလာ်အာလဝ် ဗွဲမဂၠိုၚ်တံဂှ် လံအာလဝ် ပွိုၚ် ၂ သၞာံပြၚ် ကီုလေဝ် ကလေၚ်ပလေဝ်သိုၚ်ခၞံဟွံမာန်ဏီပုဟ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်မ်ရ။
ဟိုတ်နူၚုဟ်မးကပေါတ်သၠုၚ်တိုန်အာ ဟွံတန်ကဵုအဆကီု ဟွံဂွံလဝ် ပရေၚ်အရီုဗၚ် နူကဵုအလဵုအသဳပၞာန်ကီုတုဲ သွက်သ္ဂောံကလေၚ်သိုၚ်ခၞံတိုန် သ္ၚိဌာန်ညးတံမာန်ဂှ် ညးဒေသကွာန်ၜါသွာၚ်တံ ဒှ်မံၚ်အခက်အခုဲဖိုဟ်ရ။
အပ္ဍဲပေါဲဗတိုက် ကွာန်ၜါသွာၚ်ဂှ် သ္ၚိဌာန်ညးဍုၚ်ကွာန် ၇၀၀ ပြၚ် လီုလာ်အာတုဲ အကြာဂှ်ပၠန် သ္ၚိဌာန်ၜိုတ် ၂၀၀ မ ဂှ် ဒးဒုၚ်စံၚ်ပလီုလဝ် အကြာပေါဲဗတိုက်နွံကီုရောၚ် ညးဒေသတံ ဟီုလဝ်ရ။
မွဲလပါ်ဂှ်လေဝ် ပ္ဍဲအခိၚ်ညးဒေသတံ ထောံလဝ်သ္ၚိဌာန်ဒၞာဲဝါဲတုဲ ဂြိပ်ပါဲဒဴမံၚ်အိုတ်ဂှ်တှ်ေ ကပေါတ်ၚုဟ်မးနွံနွံ နူကဵုသ္ၚိညးတံဂှ် ရဲဒပ်ကဝ်မယှေန်ပၞာန်တံ လုပ်ဖံက်ပလှ်ကေတ် ယိုက်ဏာအိုတ်တုဲ သွံစလဝ်မဒှ်ရ။
အခိၚ်လၟုဟ် ညးဒေသကွာန်ၜါသွာၚ် ၜိုတ် ၃၀ က္ဍိုပ်ကၠမ်တံ ကလေၚ်စဴစိုပ်မံၚ်ကွာန်ကီုလေဝ် ဗွဲမဂၠိုၚ်ဂှ်တှ်ေ ဟိုတ်နူဒၞာဲမံၚ်တန်န်ကြန်န်ဟၟဲကီု ဒှ်မံၚ်ဒဝိၚ်ကဵုပရေၚ်ဂီုကၠီုတံကီုတုဲ ကလေၚ်စဴကွာန် ဟွံမာန်ဏီပုဟ်။
ပ္ဍဲဂိတုနဝ်ဝေမ်ဗါမံက် သၞာံ ၂၀၂၃ တုဲကၠုၚ်တေံ ဟိုတ်နူပေါဲဗတိုက် ဗ္ဒိုပ်ဗၠာဲသၟိၚ်ကွာန်ၜါသွာၚ်ဂှ် ညးဒေသလၟိဟ်ဠက်ပြၚ်ၚ်တံ ဒးဂြိပ်ပါဲလဝ်ဘဲပၞာန်တုဲ ညးဍုၚ်ကွာန် ၃၀ တၠပြၚ် ဒးဝပ်ချိုတ် အာလဝ် နွံရ။
ၜိုန်ရဒပ်ကဝ်မယှေန်ပၞာန် ထိၚ်ချုက်ဂွံလဝ် ကွာန်ၜါသွာၚ်ပေၚ်ၚ်ကီုလေဝ် ညးဒေသဗွဲမဂၠိုၚ်ဂှ်တှ်ေ ဟိုတ်နူမါၚ်တပ်တိသှ်ေဇးမံၚ် အကြာပေါဲဗတိုက်တံတုဲ သွက်သ္ဂောံ ကလေၚ်စဴစိုပ်ကွာန်မာန်ဂှ် ဒှ်မံၚ် ဒဝိၚ်စိုတ်နာနာသာ် မဒှ်ရ။
ပရိုၚ် – သြင်လောန်တိုၚ်မ်
Photo – CJ