မတ်မလီု၊ ဂျောန် ၁၆
အပ္ဍဲတွဵုရးမန် သွက်ကိုန်အစဳဇန်ဌာနနာနာ သၞာံဘဏ္ဍာ ၂၀၂၆-၂၀၂၇ ပ္ဍဲအရာကော်လဝ်တေန်ဒါတံဂှ် သောၚ်ၚ်ကၠးကၠးဟၟဲပုဟ် ညးစၞးစၠတ်ထဝ်တွဵုရး ပွိုၚ်ဍုၚ်ကျာ်မြဟ် ဒေသဆန္ဒမာဲလၟိဟ် (၂) ဥူတဇြဝ် ဟီုဂးပါ်ပါဲလဝ်ရ။
အပ္ဍဲကဵုကောံဓရီုလၟေၚ်ဍာံ ဒုတိယဝါ စၠတ်ထဝ်တွဵုရးမန် အလန်တတိယ ကၠောန်ဗဒှ်လဝ် ဂိတုဂျောန် ၁၅ ဂှ် ဆေင်စပ်ကဵု အရာပတိတ်လဝ် တင်နၚ်စေဝ်ပၞောန်တေန်ဒါ ညံၚ်သ္ဂောံဖန်ဖက် ရေၚ်တၠုၚ်အာ ဗွဲမဍာံပြမာန်တုဲ စပ်ကဵုသၟာန်လဝ် တင်သၟာန်တံဂှ် ညးဟီုစုတ်လဝ်ရောၚ်။
နကဵုသြန်ဂအုံကၟိန်ဍုၚ် သွက်ဂွံသိုၚ်ခၞံအာ ဂၠံၚ်-ဒဒန်၊ စမြိုၚ်ဒၞာဲတံတုဲ ဆေင်စပ်ကဵု ပရေၚ်ကော်လဝ်တေန်ဒါတံဂှ်မ္ဂး စေဝ်ပၞောန်ကီု တင်နၚ်ပိုၚ်ခြာစၟတ်လဝ်တံကီု မွဲဒၞာဲကဵုမွဲဒၞာဲ တၞဟ်ခြာဟွံတုပ်မံၚ်ပုဟ် ဥူတဇြဝ် သ္ဂးရ။
အတိုၚ်တင်နၚ်စေဝ်ပၞောန် တေန်ဒါလ္ၚဵုတံမ္ဂး သွက်ရဲတၠကမၠောန် ဇၞော်ဇၞော်တံသၟးရ ကဵုလဝ်အခေါၚ်အရာနွံတုဲ သွက်ရဲတၠကမၠောန် အဇာဍောတ် အပ္ဍဲဒေသတံဂှ် ညံၚ်လုပ်ပြိုၚ်ပ္ကာန်ဟွံမာန် ပိုၚ်ခြာ စွံလဝ်ဂှ်ကီု ညးလ္ၚဵုတံ ဍိုက်ကဵုဇြဟတ်သြန် အုပ်ဂတာတဲတုဲ ကေတ်လဝ်ဇၞးဂှ် ဂွံဆဵုညာတ်မံၚ်ရောၚ် ဟီုရ။
ပြဟ်ဟ်ဏံ တေန်ဒါ စပ်ကဵုဌာနဆေၚ်စပ်လ္ၚဵုတံဂှ် တင်စၞောန်ကီု တင်စၟတ်ပိုၚ်ခြာလဝ် ချိုတ်တ်ပၠိုတ်တ်ဟၟဲ၊ နွံပၟိက်မ္ဂးမွဲဗီု ဟၟဲပၟိက်မ္ဂးမွဲနဲ ဟိုတ်နူပြံၚ်သၠာဲမံၚ်စေဝ်ပၞောန်တံတုဲ ပ္ဍဲအရာပြိုၚ်ပ္ကာန် တေန်ဒါတံမ္ဂး ပရေၚ်ညဳသၟဟ်ဟွံမွဲပုဟ် ဥူတဇြဝ် သ္ဂးရ။
ဟိုတ်နူ တင်နၚ်စေဝ်ပၞောန် ဟွံချိုတ်ပၠိတ်တုဲ ကုကာန်ပဏဳ ပြေပြံၚ်မံၚ်ကဵုဇကုတံမ္ဂး သွက်ဂုဏ်ဖဵုပိုန်ဒြပ်ဇကုဂှ် ကဵုဏာလဝ် အခေါၚ်အရာသာသာတုဲ၊ ကုကာန်ပဏဳ ပရေၚ်ဂုဏ်ဖဵုပိုန်ဒြပ် ဟွံပြေပြံၚ်ကဵုဇကုတံမ္ဂး ဟွံမိက်ကဵုအခေါၚ် ဒှ်မံၚ်တံဂှ်တှ်ေ ညံၚ်ဂွံဒှ်အခက်အခုဲ ပရေၚ်ဆောံလေၚ်ကမၠောန်တံရောၚ် ဟီုရ။
စပ်ကဵုအရာ ပရေၚ်ကော်လဝ်တေန်ဒါတံမ္ဂး အတိုင်လိက်စၞောန်ပ္ညုၚ် ရုၚ်သမ္မတ စၟတ် ၁/၂၀၁၇၊ ကေုာံ လိက်စၞောန်ပ္ညုၚ် ကမ္မတဳစဳရေၚ် ပရေၚ်အုပ်ဓုပ် စၟတ် ၁/၂၀၂၂ ဂှ် ဒက်ပတန်လဝ်ကမ္မတဳ တေန်ဒါ ၄ ဂကောံနွံတုဲ ဖန်ဖက်ရေၚ်တၠုၚ်မံၚ် အတိုင်တင်နၚ်စေဝ်ပၞောန်တံဂှ်ရောၚ် ဝန်ဇၞော်ကိုန်အစဳဇန်၊ ပရေၚ်ပိုန်ဒြပ်ကေုာံ ပရေၚ်ဘဏ္ဍာ ဂကောံအလဵုအသဳတွဵုရးမန် နာဲလျးတၟး ဟီုရ။
တုဲပၠန် ပ္ဍဲအရာပရေၚ်ရုဲစှ်တေန်ဒါတံမ္ဂး သွက်သ္ဂောံကောပ်ကာဲ ထိၚ်ကြာပ်အာ သီုအလုံမွဲပရေၚ်ကမၠောန် တန်ဒါတံမာန်ဂှ် ဒက်ပတန်လဝ်ကမ္မတဳ တေန်ဒါ ၄ ဂကောံနွံတုဲ အကြာဂှ် ဒၞာဲကမ္မတဳ တေန်ဒါ အဓိကဂှ် အလဵုဇကုဝန်ဇၞော်ဆေၚ်စပ်တံဟေၚ် က္ဍိုက်ပ် စၟဳစၟတ်မံၚ်တုဲ ညးဒးဒုၚ်ရုဲစှ်တံ အတိုၚ်ကဵုလဝ်ဖျုၚ်ဂှ် နူကဵုအလဵုအသဳတွဵုရး ထပ်စၟဳစၟတ်တုဲ ရုဲစှ်လဝ်ရောၚ် သ္ဂးရ။
တင်နၚ်ကာန်ပဏဳ ဇၞးလဝ်တေန်ဒါတံကီု အကာဲအရာ ပရေၚ်ကမၠောန်တုဲဒှ်လဝ်တံဂှ်ကီု ညးဍုၚ်ကွာန်တံ ညံၚ်သ္ဂောံ တီကၠိုဟ်အာ လောဲလောဲသွာသွာမာန်ဂှ် အစဳဇန်ပတိုန်ထ္ၜးနွံ/ဟၟဲ ဥူတဇြဝ် ကလေၚ်ထပ်သၟာန်ဏာတုဲ ဝန်ဇၞော် ကလေၚ်သှ်ဆာဲလဝ် ဂှ်တှ်ေ အပ္ဍဲဇၟာပ်ပွိုၚ်ဍုၚ်တံဂှ် ညးစၞးစၠတ်ထဝ်တံနွံမံၚ်တုဲ အလဵုဇကု အမာတ်ညးစၞးတံ ဗက်စၟဳစၟတ်ကေတ်မာန်မံၚ်ရောၚ် ဟီုလဝ်ကီုလေဝ် သွက်သ္ဂောံလးဖျေံသောၚ်ထ္ၜးကဵုအာ ညးဍုၚ်ကွာန်တံဂှ်တှ်ေ ကလေၚ်ဟီုကဵုလဝ် ဟၟဲပုဟ်။
အပ္ဍဲပရေၚ်ကမၠောန်တေန်ဒါ လၟုဟ်ဏံဂှ် ဟိုတ်နူပရေၚ် သောၚ်ၚ်ကၠးကၠးဟၟဲတုဲ ဍာ်ဒကေဝ်သၞောတ်ဗ္ၜတ် ကိုန်အစဳဇန်တံမ္ဂး အစောန်စရာဲကီု ဇြဟတ်ကီု ဍိုန်လျစှ်ေအာမာန်တုဲ တင်နၚ် စေဝ်ပၞောန်တေန်ဒါတံဏံဂှ် ညးတာလျိုၚ်ဆေၚ်စပ်တံသီုဖအိုတ် ထေက်ကဵုဒးကလေၚ်စၟဳစၟတ်အာရောၚ် ဥူတဇြဝ် သ္ဂးရ။
အပ္ဍဲကဵုတွဵုရးမန် လက်ထက်အလဵုအသဳ NLD တုဲကၠုၚ်တေံမ္ဂး ကိုန်အစဳဇန်ဌာန အတိုၚ်လၟေၚ်ၚ်သၞာံတံဂှ် သွက်ညးဍုၚ်ကွာန်တံ ဂွံတီသောၚ်သောၚ်ကၠးကၠးမာန် လလောၚ်တြးကဵုလဝ်ကီုလေဝ် ကြဴနူပၞာန်သီအဝဵုတုဲ သွက်ညးဍုၚ်ကွာန်တံမ္ဂး လဴထ္ၜးဖျေံကဵုလဝ် သောၚ်ၚ်ကၠးကၠးဟၟဲကီုရ။
ပရိုၚ် – သြင်လောန်တိုၚ်မ်
Photo – MOI