နေပျဳဒဝ်၊ ဂျောန် ၁၆
နူကဵုပရေၚ်ကမၠောန်ကၠေၚ်ဍေၚ်ကေုာံ သၟုဟ်ဓါတ်သဘာဝတံ ဂွံဗပေၚ်ကဵုမံၚ်သြန်ဘဏ္ဍာ သွက်ဂွံကၠောန်အာ အမှုရာဇဝတ်ပၞာန် လတူညးဍုၚ်ကွာန်ဍုၚ်ဗၟာတံမာန်ဂှ် အလဵုအသဳပၞာန် ထပ်ဂၠာဲဆဵုဂွံလဝ် ထီုသၟုဟ်ဓါတ်သဘာဝတၟိ မွဲဒၞာဲတုဲ ထမံက်မံၚ်ရုပ်ရဴ သွက်သ္ဂောံၜံက်ခါဲပတိတ်အာ နကဵုပရေၚ်ပိုန်ဒြပ်ရောၚ်။
အပ္ဍဲကဵုဒၞာဲဍာ်ဇြိုဟ် သြၚ်ဗလးၜဳဍုၚ်ဗမာ နွံမံၚ်ဒေသမ္ၚးဗလးၜဳ ဨရာဝတဳ ကေုာံ ဒေသမ္ၚးဗလးၜဳတနၚ်သဳတံဂှ် ထီုသၟုဟ်ဓါတ်သဘာဝဇၞော်ဇၞော်မွဲဒၞာဲ ဒေပ်ကောံကလောအ်မံၚ်ဂှ် ဂွံဆဵုလဝ်ရောၚ် ပ္ဍဲဂိတုဂျောန် ၁၄ တေံဂှ် နူကဵုအလဵုအသဳပၞာန် လလောၚ်တြး ပတိတ်လဝ်ပရိုၚ်ရ။
အပ္ဍဲဇုက်ကတေၚ်ဗတဳ နွံမံၚ်သၟဝ်ဍာ်ၜဳတံဂှ် စမ်ၜတ်လဝ် နကဵု 3D Seismic တုဲ ဒုၚ်သ္ဇိုၚ်ကဵု တင်နၚ်ပကောံဂွံလဝ်တံကီု သွဟ်နူကဵုကတိုၚ်ကၠေၚ် ဂၠိုက်ဂၠာဲစမ်ၜတ်လဝ်တံကီုတုဲ တၠပညာဘူမိဗေဒတံ သ္ပလဝ်ဒတန်ရောၚ် သ္ဂးရ။ ပြဟ်ဟ်ဏံ ပ္ဍဲကဵုဍုၚ်ဗၟာ ထမံက်မံၚ်ရုပ်ရဴ ကိုန်အစဳဇန်ဗလးၜဳ ဇုက်ဍာ်မ္ၚး နွံမံၚ် ၄ ဒၞာဲတုဲ သွက်သ္ဂောံထပ်ထမံက်ရုပ်ရဴ ကိုန်အစဳဇန်တၟိ ၄ ဒၞာဲဏံ အဟိန်ကၠောန်မံၚ် ဒၞာဲကမၠောန်ဗလးၜဳ ဇုက်ဍာ်မ္ၚး ဨရာဝတဳ ကေုာံ ဒၞာဲကမၠောန်ဗလးၜဳဇုက်ဍာ်မ္ၚး တနၚ်သဳတံဂှ် ထပ်ဂၠာဲဆဵုလဝ် ထီုသၟဟ်ဓါတ်သဘာဝတၟိ ဇၞော်ဇၞော် မွဲဒၞာဲရောၚ်။
ကိုန်အစဳဇန် ဗလးၜဳမ္ၚး ဨရာဝတဳဂှ် ဒှ်ထီုသၟုဟ်ဓါတ် တၠုၚ်လအာ တိတ်မာန် စဵုကဵု ၁၄ ကုဗပေ ထရဳလဳယာန်နွံမာန်တုဲ၊ အခိၚ်လၟုဟ်မ္ဂး ၜံက်ခါဲမံၚ်ကတိုၚ်စမ်ၜတ်တံကီု ကတိုၚ်သ္ပလဝ်ဒတန်ကီုတုဲ သွက်သ္ဂောံပတိတ်အာ နကဵုဗီုပြၚ်ပရေၚ်ပိုန်ဒြပ်မာန်ဂှ် ကၠောန်မံၚ် အတိုၚ်လၟေၚ်ကမၠောန်တံ မဒှ်ရ။
တုဲပၠန် ကိုန်အစဳဇန်ဗလးၜဳမ္ၚး တနၚ်သဳဂှ်လေဝ် သၟုဟ်ဓါတ်သဘာဝ ၜိုတ် ၉၅ ကုဗပေ ထရဳလဳယာန် တိတ်မာန်တုဲ၊ သွက်သ္ဂောံဆက်ၜံက်ခါဲကတိုၚ်စမ်ၜတ်တုဲ သၞောတ်ဗ္ၜတ်သၟုဟ်ဓါတ်ဒေပ် နွံမံၚ်ၜိုတ်ဂလိုၚ်လဵု ယဝ်ရ ဂွံတီချိုတ်တ်ပၠိုတ်တ်မ္ဂး နကဵုပရေၚ်ပိုန်ဒြပ် ညံၚ်သ္ဂောံၜံက်ခါဲပတိတ်ဂှ် ဒးဆက်ကၠောန်အာရောၚ် သ္ဂးရ။
နူကဵုပရေၚ်ကမၠောန် ရိုဟ်ကၞက်သၟုဟ်ဓါတ်သဘာဝတံဏံဂှ် သွက်သ္ဂောံသၠုၚ်ပတိုန်အာ သြန်လုပ်ကၟိန်ဍုၚ်ကဵု ပရေၚ်ဓလိုက်တမ်ရိုဟ်တံ မဒှ်တုဲ၊ ဒှ်ပရေၚ်ပိုၚ်ပြဳအရာကိစ္စဇၞော် သွက်ဂွံဗပေၚ်ကဵု ဇြဟတ်ဓါတ်အပ္ဍဲဍုၚ် အတိုၚ်နွံပၟိက်တံဂှ်ရောၚ် အလဵုအသဳပၞာန် တြးမံၚ်ဝါဒရ။
ပရဲပရၚ်ဂွံနၚ် နူကဵုသယံဇာတတံဂှ် သွက်ညးဍုၚ်ကွာန်တံ ဒှ်ပရေၚ်ဂုဏ်ဖဵုဟွံသေၚ်၊ ဒှ်ပရေၚ်အထံက်ပၚ် သွက်အလဵုအသဳပၞာန် ညံၚ်လမျီုဂွံဂၠိၚ်အာသၟးရရောၚ် နူကဵုကံၚ်သဳမဳဒဳယာပရိုၚ်ဗၠးၜးဗၟာ ညးအုပ်ကာ ဥူတိုဝ်ဇြဝ်လာတ် ဟီုကဵု ဌာန်ပရိုၚ်သြၚ်လောန်တိုၚ်မ် ရ။
“ဍုၚ်ဗၟာဂှ် ဒးလဝ်အဆဴသယံဇာတဏောၚ် ဒးဟီုရ။ လၟုဟ်ဗွဲကြဴဏံမ္ဂး တိမျေယှာတံလေဝ် ပဵုဂွံဂၠိုၚ်မံၚ်။ အဆဴသယံဇာတ ဒးဟီုဇေတ်တ်မ္ဂး နူကဵုသြန်လုပ်သယံဇာတတံဂှ် ဟွံသုၚ်စောဲအာ အရၚ်သွက်ပရေၚ်ပညာ၊ ပရေၚ်ထတ်ယုက် သွက်ညးဍုၚ်ကွာန်တံပုဟ်။ သုၚ်စောဲမံၚ် သွက်ဂွံဗဂပ်အာကဵု လွဟ်ဒပ်ပၞာန်တံကဵု သုၚ်စောဲအာ အပ္ဍဲယန္တရာ ပရေၚ်ဍဵုဍိုက်ညးဍုၚ်ကွာန်တံတုဲ အခိၚ်နွံမံၚ်သၟဝ်ပရေၚ် အုပ်ဓုပ်ပၞာန်ဏံမ္ဂး သယံဇာတတံဂှ် ဒှ်အထံက်ပၚ် သွက်အလဵုအသဳပၞာန် သ္ဂောံဆက်ဇမၠိၚ်အာလမျီုလံလံသၟးရ။ သွက်အရာပရေၚ်ဏံဂှ် ပိုဲတံ ဒှ်စံၚ်တူဒဝိၚ်ကွေံကွေံရ” သာ်ဝွံ သ္ဂး ရ။
စပ်ကဵုသြန်ဍုၚ်သ္အာၚ် လုပ်ကၠုၚ်လဝ် ဂွံနူကဏ္ဍကၠေၚ်ဍေၚ်ကဵု သၟုဟ်ဓါတ်သဘာဝတံဂှ် ဆက်စပ်မံၚ်ကဵု ပရေၚ်ရာဇဝတ်ပၞာန် ကြီုကြီုဓဇန်ဓဇန် က္တဵုဒှ်မံၚ် အပ္ဍဲကဵုဍုၚ်ဗၟာရောၚ် နူကဵုဂကောံ ချဳဒရာၚ် ကုတ်ထပိုတ် ကတေၚ်သြန်ဆီဍေက် BMC ဟီုလဝ်ရ။
ပရေၚ်ရီုဗၚ်ကဵုမံၚ် သွက်ဂကောံပၞာန် သြန်ဒဝ်လာပြကောတိကိုတ် ဗွဲမဂၠိုၚ်တံတုဲ ကဵုမံၚ်အထံက်ပၚ် သွက်ဍေံတံဂွံဆက်ကၠောန်ဗ္ဒျ်အာ ပရေၚ်ပကီုပရာတ်တံကဵု အမှုရာဇဝတ်ဂၠးကဝ်တံရောၚ် အပ္ဍဲလိက်ဗ္တိုက်ဖ္အောဝ် ပလံၚ်ဏာလဝ်ကု ဂကောံအလဵုအသဳ အခေါၚ်အရာမၞိဟ် အာသဳယာန် AICHR ဂိတုဂျောန် ၁၁ တေံဂှ် ချူထမံက်ထ္ၜးလဝ်ရောၚ်။
ဂကောံကဝ်ပဝ်ရိက် ဖျေံလဝ်သ္ဇိုၚ်အာသဳယာန်တံ ထံက်ပၚ်ကဵုမံၚ် သွက်ပရေၚ်လဝေၚ်ပၞာန်ဗလးကျာ ကေုာံ ပရေၚ်ဖံက်ပကဝ် အခေါၚ်အရာမၞိဟ်တံဂှ် ကောန်ဂကောံနိဂီုဍုၚ်ဂမၠိုၚ် ညံၚ်ဂွံရပ်စပ် သောၚ်ကလးကဵုညိဂှ် နူကဵု BMC ဗ္တိုက်ဖ္အောဝ်လဝ် မဒှ်ရ။
ကြဴနူပၞာန်သီအဝဵုတုဲ လ္တူပရေၚ်ကမၠောန်ကၠေၚ်ဍေၚ်ကေုာံ သၟုဟ်ဓါတ်သဘာဝဗၟာ MOGE ဂှ် နူကဵုအမေရိကာန်ကဵု သွိဇာလာန် ၂၇ ဍုၚ်တံ ပါလုပ်မံၚ် အပ္ဍဲဂကောံဖျာဘုံ သမဂ္ဂယူရောပ်တံ ဖျေံလဝ်ဒဏ် ပရေၚ်ကၟာတ်ဆိုအ်ရ။
ဟိုတ်နူပရေၚ်ဏံတုဲ ၜိုန်ရတၚ်ယုတ်ဒေက် အပ္ဍဲပရေၚ်ကူသာန်ဗၞိက်တံကဵု ပရေၚ်အာတရဴတံနွံကီုလေဝ်၊ သွက်ဂကောံပၞာန်ဗမာတံမ္ဂး ကၠေၚ်ၜၚ်ကျာကီု ကပေါတ်မကမ်လွဟ်ပၞာန်နာနာ၊ သီုကဵုနဲကဲပညာတံဂှ် ဆက်ဂွံမံၚ်အထံက်အပၚ် နူကဵုဍုၚ်မိတ်သဟာဲဍေံတံပၠန်ရ။
မွဲလပါ်ဂှ်လေဝ် ကြဴနူဒက်ပတန် အလဵုအသဳပြံၚ်လဝ်ဗီုပြၚ်တုဲ နူကဵုဌာန်တိရတ် မိုဝ်ဂုက် ၜံက်ခါဲဂွံလဝ် မတ်မၞိဟ် ကလောအ်ဇၞော် မွဲမကီု နဳလာအရိုၚ်ကေုာံ နဳလာကလောအ် ဂၠာဲဆဵုလဝ် နူကဵုသၞာံ ၂၀၂၀ ဂှ်လေဝ် အလဵုအသဳပၞာန် တြးမံၚ်ဝါဒ နကဵုဗီုရုပ်တံရ။
တၠအဝဵုပၞာန် ခေတ်အဆက်ဆက်တံဂှ် ဟိုတ်နူပရေၚ်အုပ်ဓုပ်ဍေံတံခိုဟ်တုဲ ဒဒှ်ရ ဂၠာဲဆဵုမံၚ် ကပေါတ်တိတ်နူဗလးတိတံရောၚ် ထ္ၜးမံၚ်ဗီုပြၚ်ကီုလေဝ်၊ သယံဇာတတံဂှ် ဂွံဆက်ဇမၠိၚ်အာကဵုလမျီု သွက်တၠအဝဵုပၞာန်တံဟေၚ်ရောၚ် ညးလ္ၚတ်တံ ထံက်ထ္ၜးမံၚ်ရ။
ပရိုၚ် – သြင်လောန်တိုၚ်မ်
Photo – Social Media