လံၚ်လုၚ်၊ ဂျောန် ၁၇
အပ္ဍဲကဵုရးတနၚ်သဳ ပွိုၚ်ဍုၚ်လံၚ်လုၚ် ပေါဲဗတိုက်ဒှ်လဝ်ဒၞာဲကွာန်သာတ်ပြေဝ်ဂှ် လပါ်ဒပ်ပၞာန်သီအဝဵု ဒးလဝ်ဘဲဝပ် ချိုတ်ဂၠိုၚ်မံၚ်ရောၚ် ညးတာလျိုၚ် ဂကောံဒပ်ပၠန်ဂတးအပ္ဍဲဒေသတံ ဟီုကဵုဌာန်ပရိုၚ် သြၚ်လောန်တိုၚ်မ်ရ။
စနူအခိၚ်နူဂယး ဂိတုဂျောန် ၁၄ တေံဂှ် ဒပ်ပၞာန်သီအဝဵု ဇြဟတ်ၜိုတ် ၁၇၀ တံ ထပက်ကရောၚ်ပၞာန် လုပ်ကၠုၚ်ကွာန်သာတ်ပြေဝ်တုဲ အကြာၜါလပါ် ဒှ်လဝ်ပေါဲဗတိုက်ကု ဂကောံဒပ်ပံၚ်တောဲပၠန်ဂတးတံ ကြပ်ပေၚ်အာပွိုၚ် မွဲတ္ၚဲကီုရောၚ်။
အပ္ဍဲပေါဲဗတိုက်ဏံ နူဂကောံဒပ်ပံၚ်တောဲပၠန်ဂတးတံ သီဂွံဏာဇွကောန်ပၞာန်ဗမာ ၄ တၠနွံတုဲ သီုကဵုသေနာတ် ၁ ဇကိုအ်ကီု ကပေါတ်ဆက်စပ်တံဂှ်လေဝ် သီဂွံလဝ်ရ။
အကြာပေါဲဗတိုက်ဏံ ရဲဒးဝပ်ချိုတ်လဝ်ဗွဲမဂၠိုၚ်တံဂှ် နူလပါ် ဒပ်သီအဝဵုပၞာန်တံ ကပှ်ကေတ်ဖျဴဏာမာန်လဝ်ရောၚ် ညးတာလျိုၚ် ဒပ်ပၠန်ဂတးအပ္ဍဲဒေသ ပါလုပ်မံၚ်ဗလးတိမွဲတၠဂှ် ဟီုရ။
ဒပ်ပၞာန်သီအဝဵု ဒးလဝ်ဘဲဂိ အကြာပေါဲဗတိုက်ဂှ် လုပ်စံၚ်ထောံသ္ၚိ အပ္ဍဲကွာန်သာတ်ပြေဝ် ၂ မကီုတုဲ၊ အခိၚ်လၟုဟ်ဏံ ဖျေံလဝ်ဒပ်ကရပ်ပွဳဗွိုၚ်ဗ္ဒာဲကွာန်ဂှ် ဆက်နွံမံၚ်ဖအိုတ်ဖိုဟ်ရောၚ်။
ဟိုတ်နူပေါဲဗတိုက်ဒှ်လဝ်တုဲ ညးဒေသနူကွာန်သာတ်ပြေဝ်၊ ညှေန်မဝ်ကေုာံ လေဝ်တောန်ခါန် မၞိဟ်လၟိဟ်လ္ၚီပြၚ်ၚ်တံ ထောံဌာန်ဒၞာဲဝါဲ ဒးဂြိပ်ပါဲမံၚ်အိုတ်တုဲ စဵုကဵုအခိၚ်လၟုဟ် ကလေၚ်စိုပ်ကၠုၚ်ကွာန် ဟွံမာန်ဏီပုဟ်။
ကရောၚ်ပၞာန်ဇြဟတ်ၜိုတ် ၁၇၀ တံဂှ် စနူဂိတုဂျောန် ၂ တေံတုဲ ပ္ဍဲကွာန်သာတ်ပြေဝ်ကဵု ကွာန်ညှေန်မဝ်တံဂှ် ဂေတ်အာကၠုၚ်မံၚ် မွဲလတုန်တုဲမွဲလတုန် ချဳဒရာၚ်မံၚ်ပရေၚ်ပၞာန်ဖိုဟ်ရ။
ပရိုၚ် – သြင်လောန်တိုၚ်မ်
Photo – Social Media