မတ်မလီု၊ ဂျောန် ၁၇
အပ္ဍဲတွဵုရးမန် ၚုဟ်ကၠေၚ်စက်ညံၚ်သ္ဂောံယအ်စှ်ေဂှ် ဂၠာဲနဲကဲတုဲ ဒးဂစာန်ရေၚ်တၠုၚ်အာရောၚ် ဝန်ဇၞော်ဓါတ်လလဳ၊ ဓါတ်၊ ကွတ်စက် ကေုာံ ပရေၚ်ဆက်စၠောံအာကၠုၚ် တွဵုရးမန် ဥူမေန်ဇေယျာဥူ ဟီုရ။
အပ္ဍဲကောံဓရီုစၠတ်ထဝ်တွဵုရးမန် ကၠောန်ဗဒှ်လဝ် ဂိတုဂျောန် ၁၅ တေံဂှ် စပ်ကဵုပရေၚ်ၚုဟ်ကၠေၚ်စက် ညံၚ်သ္ဂောံစှ်ေအာဂှ်တုဲ အတိုင်ညးစၞးစၠတ်ထဝ် ပွိုၚ်ဍုၚ်ကျာ်မြဟ် ဒေသဆန္ဒမာဲလၟိဟ် (၂) ဥူတဇြဝ် သၟာန်လဝ်ဂှ် ဝန်ဇၞော် ကလေၚ်သှ်ဆာဲကဵုလဝ်ရောၚ်။
အပ္ဍဲတင်သၟာန်ဂှ်တှ်ေ တွဵုရးမန်ဝွံ ယဝ်ရပတုပ်ကဵု ရးဗဂေါ၊ တွဵုရးကရေၚ်၊ ရးတနၚ်သဳကဵု ရးကေုာံ တွဵုရးတၞဟ်တံမ္ဂး ဒးဒုၚ်မံၚ်ဒဏ် ၚုဟ်ကၠေၚ်စက် သၠုၚ်တိုန်မံၚ်ကွေံကွေံတုဲ ဒးဆောံလေၚ်မံၚ် အခေါၚ်အရာပရေၚ်တုပ်သၟဟ်တံရောၚ် သ္ဂးရ။
ဟိုတ်နူၚုဟ်ကၠေၚ်စက်သၠုၚ်တိုန်မံၚ် ရးကဵုတွဵုရး နူတၞဟ်ဟ်တံတုဲ ညးယိုက်ဝန်ဍုၚ်တံကီု သီုကဵုညးဍုၚ်ကွာန်တံ ဒးဇီုကပိုက်မံၚ်ကဵု ပရေၚ်ၚုဟ်မးကပေါတ်သၠုၚ်တိုန်မံၚ်အိုတ်တုဲ ပရေၚ်မံၚ်စံၚ်စသုၚ်တံ ခက်ခုဲဝါတ်ကျာတ်အာကွေံကွေံရောၚ် အပ္ဍဲကဵုတင်သၟာန် ညးထံက်ထ္ၜးလဝ်ရ။
အခိၚ်ကာလ ပေါဲပၞာန်က္တဵုဒှ်လဝ် အပ္ဍဲကဵုဒေသဗၟံက်လဒေါဝ်တေံဂှ် ညံၚ်ကၠေၚ်စက်ဟွံဂွံပိုတ်အာ အပ္ဍဲကဵုတွဵုရးမန်ဂှ် ရေၚ်တၠုၚ်မာန်ကၠုၚ်လဝ်တုဲ၊ တုပ်သာ်ဂှ်ကီု ၚုဟ်ကၠေၚ်စက်ညံၚ်သ္ဂောံစှ်ေဂှ် ဂစာန်ရေၚ်တၠုၚ်အာရောၚ် ဝန်ဇၞော် ဥူမေန်ဇေယျာဥူ ကလေၚ်သှ်ဆာဲကဵုလဝ်ရ။
ၚုဟ်ကၠေၚ်စက်တွဵုရးမန်ဂှ် ကၠေၚ်ဓါတ် 92 မွဲလေတ်မ္ဂး ၄၁၂၅ ဒကေဝ်၊ ကၠေၚ်ဓါတ် 95 မွဲလေတ်မ္ဂး ၄၂၀၀ ဒကေဝ်၊ ဒဳဇြေလ်ပရဳမဳယံ မွဲလေတ်မ္ဂး ၅၀၉၅ ဒကေဝ် ၚုဟ်မးနွံမံၚ်တုဲ၊ ယဝ်ရ ပတုပ်ကဵု ရးကေုာံတွဵုရးတၞဟ်ဟ် မွဲလေတ်မ္ဂး ပဵုဂၠိုၚ်မံၚ်နူ ၁၃၀ ဒကေဝ် စဵုကဵု ၃၀၀ ဒကေဝ်နွံမံၚ်ရောၚ်။
ဟိုတ်ၚုဟ်မးကၠေၚ်စက် ဂွံသၠုၚ်တိုန်မံၚ်ဗီုတံဏံဂှ်တှ်ေ ကာန်ပဏဳရာဇာမေန်ကေုာံ ကာန်ပဏဳ Myanmar Energy King ဂွံလဝ်အခေါၚ်ထပၠုပ်ခြိုၚ်စွံကၠေၚ် သွက်တွဵုရးမန်ဂှ် ဟွံကေတ်လဝ် ပရေၚ်အထံက်ပၚ် သၠာဲသြန်ဒဝ်ဠာကဵု သၠာဲသြန်ဍုၚ်ဗမာကီုတုဲ နကဵုအစဳအဇန်ကာန်ပဏဳတံဟေၚ် ဂၠာဲကေတ်သြန်ဍုၚ်သအာၚ် ရေၚ်တၠုၚ်လဝ်ရောၚ် ဟိုတ်နူဒုၚ်လဝ်ဝန်တုဲ ဒှ်ကၠုၚ်လဝ် ပရေၚ်ဗီုတံဏံရောၚ် သ္ဂးရ။
ၚုဟ်ကၠေၚ်စက် ဂွံစှ်ေအာမာန်မ္ဂး စၞးဒးရာန်ပၠုပ်ခြိုၚ်စွံလဝ်ကၠေၚ် ဒၞာဲသၞေဟ်ၜၚ်ဂဒုၚ်ပဝ် ပွိုၚ်ဍုၚ်မုဟ်ဍုၚ်ဂှ် ကလေၚ်ရာန် ကေတ် နူကဵုသၞေဟ်ၜၚ်တဳလဝါ ဍုၚ်လ္ဂုၚ်ဟွံဂွံပုဟ်ဟာ ဂှ် ညးတၠတင်သၟာန် ဆက်စပ်သၟာန်လဝ် ကီုရောၚ်။
ဆဂး ညံၚ်ကၠေၚ်စက်ဟွံဂွံပိုတ်အာဂှ် စွံမံၚ်အဓိကတုဲ၊ အစဳဇန် ဒးကလေၚ်ရာန် နူသၞေဟ်ၜၚ်တဳလဝါ လ္ဂုၚ်ဂှ် ဟၟဲဏီပုဟ် ဝန်ဇၞော်အလဵုအသဳပၞာန် ဥူမေန်ဇေယျာဥူ သှ်ဆာဲကဵုလဝ်ရ။
ပရိုၚ် – သြင်လောန်တိုၚ်မ်
Photo – Social Media