မတ်မလီု ၊ ဂျောန် ၁၇
အပ္ဍဲတွဵုရးမန် ကၠောန်ဗဒှ်ကၠုၚ်လဝ်ဝိုၚ်ဝေၚ်တံ ဗွဲမလံလ ညံၚ်ရဴဂွံလဝ်အခေါၚ်လုပ်သၞောဝ်တံတုဲ ပြဟ်ဟ်ဏံ ညံၚ်ဂွံတာဒၞာမာတ်ကဠက်ထောံညိဂှ် ဗ္တိုက်ဖ္အောဝ်ဏာဂလာန် ကုဂကောံအလဵုအသဳပၞာန်တွဵုရး၊ ပၠုပ်ဏာဂလာန် ဇရေၚ်စၠတ်ထဝ်တွဵုရးမန်ရ။
ဂလာန်ဏံဂှ် အပ္ဍဲကောံဓရီုလၟေၚ်ဍာံ ဒုတိယဝါ စၠတ်ထဝ်တွဵုရးမန် အလန်တတိယ ကၠောန်ဗဒှ်လဝ် ဂိတုဂျောန် ၁၆ တေံဂှ် ညးစၞးစၠတ်ထဝ်တွဵုရး ပွိုၚ်ဍုၚ်ကျာ်မြဟ် ဒေသဆန္ဒမာဲလၟိဟ် (၂) ဥူတဇြဝ် ပၠုပ်ဏာလဝ်ဂလာန် မဒှ်ရ။
ၜိုန်ရသၞောဝ်ဥပဒေ ပရေၚ်တာဒၞာဝိုၚ်ဝေၚ်နွံမံၚ်ကီုလေဝ် အပ္ဍဲကဵုတွဵုရး ပွိုၚ်ဍုၚ် အရာပ်/ကွာန်နာနာတံမ္ဂး ပံက်လဝ်ဝိုၚ်ဝေၚ် ညံၚ်ရဴပေါဲသဘၚ် မိပ်လလိၚ်တံတုဲ စပ်ကဵုပရေၚ်အုပ်ဓလီု သၞောဝ်ဓဝ် ဥပဒေကေုာံ ပရေၚ်ၜိုဟ်သြိုဟ်သာယာဒေသတံမ္ဂး ဒှ်မံၚ်တင်ကော်ဆောဂှ်ကီု သီုဘပဠမံၚ် ပရေၚ်ဂီုကၠီုဘဝညးဍုၚ်ကွာန်တံ ဗွဲမဂၠိုၚ်ကီုရောၚ် ညးတၠဂလာန် သ္ဂးရ။
တုဲပၠန် ပရေၚ်ပံက်ဝိုၚ်ဝေၚ် တွဵုရးမန်ဂှ် ညးဍုၚ်ကွာန်အလုံမွဲဍုၚ်တံ တီမိၚ်မံၚ်အိုတ်တုဲ လ္တူသိုဲယှေဝ်မဳဒဳယာ ညးဍုၚ်ကွာန်တံဟီုဂးပါ်ပါဲ ချူမံၚ်ကီုလေဝ် ပရေၚ်ဝိုၚ်ဝေၚ်တံဏံ အောန်စှ်ေအိုတ်အာဟၟဲဏီတုဲ စဵုကဵုစိုပ် လက်ထက်အလဵုအသဳတၟိဏံ ဆက်ကၠောန်မံၚ်ဏီဟီုဂှ် ဒှ်မံၚ်ပရေၚ်တၚ်ကော်ဆောမွဲကီုရောၚ် ဟီုရ။
ဥပဒေဟီုဂှ် ကၠောန်ကီုဒှ် ဟွံကၠောန်ကီုဒှ် ဒှ်ပရေၚ်အမှုရာဇဝတ် ဍာံဍာံဂှ်တုဲ၊ ဟွံရပ်စပ် ဟွံကေတ်အရေဝ် ပရေၚ်ဝိုၚ်ဝေၚ်တံဏံမ္ဂး ဒှ်မံၚ် ပွမထံက်ပၚ်မံၚ်ကဵု ပရေၚ်ကမၠောန်ဗၠေတ်တ်တံတုဲ၊ လတူပရေၚ်ဂီုကၠီု ညးဍုၚ်ကွာန်တံကဵု ပရေၚ်အုပ်လဒမ်သၞောဝ်ဓဝ်ဥပဒေတံမ္ဂး ဒှ်မံၚ်တင်ယုတ်ဒေက်ဂှ်ရ ပရေၚ်ကိစ္စဏံ ဟွံထေက်ကဵု ဒးကဵုလဝ်အခေါၚ်ပုဟ် ညးပၠုပ်ဂလာန် ထံက်ထ္ၜးလဝ်ရ။
ပြဟ်ဟ်ဏံ အပ္ဍဲတွဵုရးမန် ပံက်လဝ်ဝိုၚ်ဝေၚ်တံဂှ် ဒှ်မံၚ်ဗီုပြၚ်ညံၚ်ရဴ ဂကောံဂိုဏ်ဝိုၚ်ဝေၚ်တံ ကၠောန်မံၚ် ဂံၚ်သ္ကာလောန်အာကွေံတုဲ သြန်ဍာ်ဓတ်ပဠက် ညးဍုၚ်ကွာန်တံ ဒးဇတ်အိုတ်အာ အပ္ဍဲဝိုၚ်ဝေၚ်တံဏံဂှ် ပရေၚ်ယဵုလ္ဂူဟွံသေၚ်ပုဟ် ဥူတဇြဝ် ဟီုရ။
အပ္ဍဲဒေသမ္ဂး ဟိုတ်နူဝိုၚ်ဝေၚ်တံဏံဂှ် သြန်ညးဍုၚ်ကွာန်တံ ဒးဆောံလေၚ်မံၚ်ဂှ်ကီု၊ ကမၠောပရေၚ်န်ပိုန်ဒြပ်တံ ဆောံလေၚ်၊ ပရေၚ်အိန်ထံၚ်လေဝ် ဟွံပြေပြံၚ်၊ ပြသၞာပရေၚ်မၞိဟ်နာနာသာ်တံကီု သီုကဵုကမၠတ်ဒမၠ ပရေၚ်ပၠံၚ်ၜးတံ က္တဵုဒှ်မံၚ်ရောၚ် သ္ဂးရ။
တုဲပၠန် သြန်အကံက် နူကမၠောန်ဝိုၚ်ဝေၚ်တံဏံ ဂွံမံၚ်ကိုတ်လ္ၚီပြၚ် ဇၟာပ်ပ်တ္ၚဲ၊ ဇၟာပ်ပ်ဂိတု ဂွံမံၚ်ကိုတ်ဠက်ပြၚ်မံၚ်ဂှ်တှ်ေ သြန်ညးဍုၚ်ကွာန်တံ ဇၟာပ်ပ်ဂိတု ဒးဆောံလေၚ်မံၚ် နကဵုကိုတ် (ဗဳလဳယာန်) တုဲ၊ သ္ၚိဌာန် ရဲဘဝဒးလီုလာ်အာလဝ် ဟိုတ်နူ ဝိုၚ်ဝေၚ်တံဏံ ၜိုတ်ဂလိုၚ်လဵုဆောံလေၚ်အာလဝ်နွံမာန်ရောဂှ် ဗ္စာရဏာရံၚ်မ္ဂး တီမာန်ရောၚ် ဟီုရ။
ကိစ္စဝိုၚ်ဝေၚ်ဒှ်မံၚ် အပ္ဍဲတွဵုရးမန်ဏံဂှ် ဒှ်မံၚ်ဗီုပြၚ်အကာဲအရာဓမ္မတာဟွံသေၚ်တုဲ ညံၚ်ရဴဂကောံဝိုၚ်ဝေၚ် ဍုၚ်သအာၚ်လ္ၚဵုတံကီု ဒှ်မံၚ်ညံၚ်ရဴဂကောံဝိုၚ်ဝေၚ်ဟွံလုပ်သၞောဝ် မာဖဳယာတံတုဲ၊ လ္တူရဲတေၚ်စိုပ်တံမ္ဂး ဘပဠ၊ ကဵုဇြဟတ်ဟရိုဟ်၊ ကဵုဘဲအန္တရာဲတံကီု ဝဳလဝ်မၞိဟ်ပရမ်တံလေဝ် နွံမံၚ်ကီုရောၚ် ဥူတဇြဝ် ဟီုရ။
ဂလာန်သွက်ဂွံတာဒၞာ မာတ်ကဠက်ထောံ ဝိုၚ်ဝေၚ်တံဂှ် ညးစၞးစၠတ်ထဝ်တွဵုရး ပွိုၚ်ဍုၚ်ၜဳကလေၚ် ဒေသဆန္ဒမာဲလၟိဟ် (၂) ဥူတေန်ယဳ ထံက်ဂလာန်သဳကၠဳလဝ်တုဲ ပ္ဍဲကောံဓရီုစၠတ်ထဝ် တ္ၚဲဂတဏံမ္ဂး ဆက်သဳကၠဳအာ မဒှ်ရ။
ဝိုၚ်ဝေၚ် ပ္ဍဲတွဵုရးမန်ဂှ် လက်ထက်အလဵုအသဳအဆက်ဆက်တေံဂှ် ကၠောန်ဗီုပြၚ်လုပ်ဗွဲသၞောဝ် ဗီုဏံဟၟဲကီုလေဝ်၊ ကြဴနူဒပ်ပၞာန်သီအဝဵုတုဲ ဝိုၚ်ဝေၚ်တံဂှ် ကဵုကၠုၚ်လဝ်အခေါၚ် ကၠောန်ဗဒှ်ပေါဲတ္ၚဲဟလိၚ် ညံၚ်ရဴ လုပ်သၞောဝ်ကီုရောၚ်။
ပရိုၚ် – သြင်လောန်တိုၚ်မ်
Photo – CJ