မတ်မလီု၊ ဂျောန် ၁၈
စပ်ကဵုပရေၚ်ပံၚ်တောဲ ထမံက်ရုပ်ရဴကၠောန်လဝ် ကိုန်အစဳဇန်ဍုၚ်တၟိ လှိုင်ယတနာမတ်မလီုဂှ်တုဲ ပ္ဍဲစၠတ်ထဝ်တွဵုရးမန် ဒးဒုၚ်သၟာန်လဝ်တင်သၟာန် လ္တူခရိုနဳ ဥူမိုဝ်ကျဝ်ကဵု ကံၚ်သဳပၞာန်တွဵုရးတြေံတံ နွံရ။
တင်သၟာန်ဏံဂှ် ညးစၞးစၠတ်ထဝ်တွဵုရး ပွိုၚ်ဍုၚ်ကျာ်မြဟ် ဒေသဆန္ဒမာဲလၟိဟ် (၂) ဥူတဇြေန် သၟာန်သၟုက်ဏာလဝ် အပ္ဍဲကောံဓရီုလၟေၚ်ဍာံ ဒုတိယဝါ စၠတ်ထဝ်တွဵုရးမန် အလန်တတိယ ကၠောန်ဗဒှ်လဝ် ပ္ဍဲဂျောန် ၁၆ တေံ မဒှ်ရ။
ညးတၠတင်သၟာန်ဏံ သၟာန်ဂလာန်ထံက်ထ္ၜးဏာလဝ်ဂှ်တှ်ေ ကိုန်အစဳဇန်သီကေတ်လဝ်တိ ညးလုပ်မံၚ် ၜက်ၜေတ်တံတုဲ သွက်ဂွံပါ်ပရအ်သွံအာကဵုဂအာၚ်သ္ၚိ ကုဂကောံသ္ၚိဌာန်ကၟိန်အိန်ထံၚ် ကောန်ပၞာန်ပြဟ်လလုဲ အာလဝ်တံကီု သၞာဲဒါညးယိုက်ဝန် အလဵုအသဳတံကီု ဟီုဂးလဝ်ဂှ်တှ်ေ ပရေၚ်သောၚ်ၚ်ကၠးကၠးဟၟဲကၠုၚ် ကၠောန်လဝ်ဏံဂှ် ညးဍုၚ်ကွာန်တံ ဒးဟီုဂးပါ်ပါဲမံၚ်ရောၚ် ထံက်ထ္ၜးလဝ်ရ။
ဝန်ဇၞော်ပရေၚ်ဗဂဵုလဟဵုသာယာ ဂကောံအလဵုအသဳပၞာန်တွဵုရးမန် ဒံက်တာ အံၚ်မျာတ်ကျဝ်သိၚ် ကလေၚ်သှ်ကဵုလဝ် တင်သၟာန်ဏံ ဂှ်တှ်ေ ကိုန်အစဳဇန်ဏံဂှ် အတိုၚ်ဂွံလဝ်အခေါၚ် နူကံၚ်သဳစဳရေၚ် ပရေၚ်အုပ်ဓုပ် ကၟိန်ဍုၚ်တြေံတေံတုဲ ရေၚ်တၠုၚ်ထမံက်လဝ်ရုပ်ရဴ ရောၚ် သ္ဂးရ။
တုဲပၠန် စပ်ကဵုကိုန်အစဳဇန်ဏံတုဲ ပရေၚ်ကမၠောန်ဖျေံလဝ်ဒၞာဲဝါဲ ဂအာၚ်တိတံဏံမ္ဂး သ္ကိုပ်ဝန်ဇၞော် တွဵုရးမန်တြေံ ဥူအံၚ်ကျဳတိၚ်ဂှ် ဒှ်ဥက္ကဌ၊ ဝန်ဇၞော်ပရေၚ်ဂီုကၠီု ကေုာံ ပရေၚ်ဒေသပယျဵုတွဵုရး-လၟုဟ် သ္ကိုပ်ဗိုလ်ဇၞော် ကျဝ်သွာမျေအ် ဒှ်လဝ်ဒုဥက္ကဌတုဲ ရေၚ်တၠုၚ်လဝ် ရောၚ်။
ပ္ဍဲအရာဖျေံလဝ်တိဂအာၚ်ကဵု ညးယိုက်ဝန်ဍုၚ်တံမ္ဂး သွက်ရဲ အဟိန်ယိုက်ဂၠေၚ်မံၚ်တာလျိုၚ် အပ္ဍဲတွဵုရးမန် စဵုကဵုစိုပ်ဒဳဇြေမ်ဗါ ၃၁ သၞာံ ၂၀၂၅ ပေၚ်အာ ၁၀ သၞာံတံကီု၊ ရဲယိုက်ဂၠေၚ်တာလျိုၚ် အာယုက်စိုပ်မံၚ် ၅၉ သၞာံ ၁၀ ဂိတု စဵုကဵုပေၚ် ၆၂ သၞာံ၊ ရဲယိုက်ဂၠေၚ်လဝ် အာယုက်ကမၠောန်အောန်အိုတ်ပေၚ် ၂၅ သၞာံတံဂှ် ဖျေံကဵုလဝ် တိဂအာၚ်သ္ၚိတံရောၚ် သ္ဂးရ။
နူကဵုကိုန်အစဳဇန်ဍုၚ်တၟိ လှိုင်ယတနာမတ်မလီု ဖျေံကဵုလဝ် တိဂအာၚ်သ္ၚိ ကုညးယိုက်ဝန်ဍုၚ်တံ သီုဖအိုတ်နွံမံၚ် ၁၃၀၃ ဂအာၚ်ဂှ်ရ သွက်သ္ဂောံထပ်ဖျေံကဵု ညးယိုက်ဝန်တံဂှ် ဂအာၚ်တိဟၟဲရပုဟ် ဒံက်တာ အံၚ်မျာတ်ကျဝ်သိၚ် ဟီုရ။
သၞောတ်ဗ္ၜတ် ဖျေံကဵုလဝ်တိဂအာၚ်သ္ၚိ နူကိုန်အစဳဇန်ဍုၚ်တၟိ၊ တိဂအာၚ်ဖျေံကဵုတုဲဒှ်အာ ကေုာံ အကာဲအရာတိဂအာၚ်သ္ၚိ သှ်ေမံၚ်တံပၠန်တုဲ ညးပတိုန်ဂလာန် ထပ်သၟာန်ပၠန်ဂှ်တှ်ေ ဒံက်တာ အံၚ်မျာတ်ကျဝ်သိၚ် ဟီုလဝ် ကလေၚ်သှ်ဆာဲအာ နကဵုလိက်ရောၚ် သ္ဂးလဝ်ရ။
ကိုန်အစဳဇန်ဍုၚ်တၟိ လှိုင်ယတနာဂှ် ၜိုန်ရရန်လဝ် သွက်သ္ဂောံ ပါ်ပရအ်ကဵုတိဂအာၚ်သ္ၚိ သွက်သ္ၚိဌာန်ကၟိန်အိန်ထံၚ်ကောန်ပၞာန် ပြဟ်လလုဲလဝ်တံကီု ညးယိုက်ဝန်အလဵုအသဳကီုလေဝ်၊ လက္ကရဴဏံမ္ဂး ဂအာၚ်သ္ၚိဖျေံကဵုလဝ်တံဂှ် ခရိုနဳ မတ်မလီု ဥူမိုဝ်ကျဝ် ကဵု ညးတာလျိုၚ်ကံၚ်သဳပၞာန်တွဵုရးတြေံတံ ကလေၚ်သွံစလဝ်တုဲ ဂွံအာလဝ်သြန်ကိုတ်လ္ၚီပြၚ် နွံမံၚ်ရောၚ်။
ဂအာၚ်သ္ၚိလၟိဟ်လ္ၚီပြၚ် အတိုၚ်ဖျေံကဵုလဝ် နူကိုန်အစဳဇန်ဍုၚ်တၟိ လှိုင်ယတနာ မတ်မလီုတံမ္ဂး ပါ်လဝ် ဇြုၚ် A၊ B၊ C ၃ ဂကူတုဲ၊ အတိုၚ်ဇြုမ် ဂအာၚ်သ္ၚိ မွဲဂအာၚ်မ္ဂး နွံမံၚ်ၚုဟ်မးသြန်နူကဵု ၇၅၀ ကိုတ် စဵုကဵု ၄၀၀၀ ကိုတ်ပြၚ်နွံရောၚ် ဂွံတီကေတ်ရ။
ပရိုၚ် – သြင်လောန်တိုၚ်မ်
Photo – MOI