မတ်မလီု၊ ဂျောန် ၁၈
အပ္ဍဲတွဵုရးမန် ပွိုၚ်ဍုၚ်ဗွဲမဂၠိုၚ်တံမ္ဂး သ္ကိုပ်ပရေၚ်အုပ်ဓုပ်အရာပ်/ ကွာန်ဆေၚ်စပ်တံဂှ် အတိုင်ဆန္ဒညးဍုၚ်ကွာန်တံနွံပၟိက်ဂှ် ဟွံကလေၚ်ရုဲစှ်ကဵုတုဲ ရဲညးတံကဵုညးတံ ထပက်လာဘ်ခါန်ကၞက်ကေတ်မံၚ် သ္ၚိတ်တ်ရောၚ် ညးကြပ်မံၚ်ကဵုဂကောံပရေၚ်အုပ်ဓုပ်တံ ဟီုကဵုဌာန်ပရိုၚ်သြင်လောန်တိုၚ်မ်ရ။
ပ္ဍဲအရာပရေၚ်ခါန်ကၞက်လဝ် သ္ကိုပ်ပရေၚ်အုပ်ဓုပ် အရာပ်/ကွာန် တံဂှ်ပၠန် သ္ကိုပ်အုပ်ဓုပ်တြေံတံကဵု ရဲထံက်ဂလာန်ဒုၚ်စကာမံၚ် ဂကောံပရေၚ်အုပ်ဓုပ်အလဵုအသဳပၞာန်တံဂှ်သၟးရ ခါန်ကၞက်ကဵုမံၚ်ရောၚ်။
အတိုင်ဥပဒေပရေၚ်အုပ်ဓုပ်အရာပ်၊ ဂအုံကွာန်ချူခၞံလဝ် အပ္ဍဲသၞာံ ၂၀၁၂ တေံဂှ် အပ္ဍဲကဵုလက်ထက် အလဵုအသဳတၟိလၟုဟ်ဏံမ္ဂး အတိုင်ဆန္ဒညးဍုၚ်ကွာန်တံနွံပၟိက် ဒးကလေၚ်ရုဲစှ်ပတိုန်အာကု သ္ကိုပ်အုပ်ဓုပ်အရာပ်/ကွာန်ဆေၚ်စပ်တံရောၚ်။
ဟွံကလေၚ်ရုဲစှ် သ္ကိုပ်ပရေၚ်အုပ်ဓုပ်တံမွဲသာ် ခါန်ကၞက် ကေတ်လဝ်သ္ၚိတ်တ်တံဂှ်တှ်ေ ဒှ်ပွမဖံက်ပကဝ် သၞောဝ်ဥပဒေ ထေၚ်ၚ်လဵုလဵုရောၚ် သၟာပရေၚ်ဍုၚ်ကွာန်ဝှ်ကြံၚ်မွဲတၠ ပါ်ပါဲလဝ်ရ။
စပ်ကဵုပရေၚ် ကလေၚ်ကလေၚ်ရုဲစှ် သ္ကိုပ်ပရေၚ်အုပ်ဓုပ်တံတုဲ အပ္ဍဲကဵုကောံဓရီုစၠတ်ထဝ်တွဵုရးမန် ကၠောန်ဗဒှ်လဝ် ဂိတုဂျောန် ၁၆ တေံ ဂှ် ညးစၞးစၠတ်ထဝ်တွဵုရး ပွိုၚ်ဍုၚ်ၜဳကလေၚ် ဥူတေန်ယဳ သၟာန်သၟုက်လဝ် တင်သၟာန်နွံမံၚ်ရောၚ်။
စပ်ကဵုတင်သၟာန်ဏံတုဲ ဝန်ဇၞော်ပရေၚ်ကေၚ်ကာမၞိဟ် ဂကောံအလဵုအသဳပၞာန်တွဵုရးမန် ဥူတေန်ဇြဝ်ထောန် သှ်ဆာဲ ကဵုလဝ်ဂှ်တှ်ေ သ္ကိုပ်ပရေၚ်အုပ်ဓုပ်တံဂှ် ဒးရုဲစှ်အာ အတိုင်သၞောဝ်ဥပဒေရောၚ် ဟီုလဝ်ကီုလေဝ် ပ္ဍဲအခိၚ်ကာလ လၟေၚ်ကမၠောန်ပရေၚ်ရုဲစှ်တံဂှ်တှ်ေ ဟီုစုတ်ကဵုလဝ်ဟၟဲပုဟ်။
အတိုင် ရဲကြပ်ကဵု ဂကောံအလဵုအသဳပၞာန်တွဵုရးတံဟီုလဝ်ဂှ်မ္ဂး အပ္ဍဲပွိုၚ်ဍုၚ်ဗွဲမဂၠိုၚ်တံဂှ် ကလေၚ်ခါန်ကၞက်စုတ်လဝ် သ္ကိုပ်ပရေၚ်အုပ်ဓုပ် အရာပ် /ကွာန်ဆေၚ်စပ်တံတုဲ သီုကဵု ပလေဝ်စလဝ် သွက်သ္ဂောံကဵုအာ တန်ဗတောန်မောမ်မာန် တံနွံရောၚ် ဂွံတီကေတ်ရ။
အတိုင်သၞောဝ်ဥပဒေ ပရေၚ်အုပ်ဓုပ်အရာပ်၊ ဂအုံကွာန် ကလေၚ်ပလေဝ်လဝ် အပ္ဍဲသၞာံ ၂၀၁၆ မ္ဂး အာယုက်တာလျိုၚ် သ္ကိုပ်ပရေၚ်အုပ်ဓုပ်အရာပ်/ကွာန်တံဂှ် ဒှ်အတိုင်အာယုက်တာလျိုၚ် သမ္မတဍုၚ်ရောၚ် ချူခၞံသ္ပလဝ်ဒတန်ရ။
အပ္ဍဲပွိုၚ်ကာလ အာယုက်တာလျိုၚ် သမ္မတတၟိ နွံမံၚ်ဂှ် ဒးရုဲစှ်ကဵုအာတာလျိုၚ် သ္ကိုပ်ပရေၚ်အုပ်ဓုပ်အရာပ်/ ဂအုံကွာန်တၟိ တံတုဲ တာလျိုၚ်ကမၠောန်တံ ဂွံယိုက်ဂၠေၚ်အာမာန်ဂှ် ဒးသၠောဲပအပ် ကဵု ဗီုပြၚ်သၞောတ်စှ်ေစှ်ေရောၚ် အပ္ဍဲဥပဒေချူထမံက်လဝ်ရ။
အပ္ဍဲတွဵုရးမန် နွံမၚ် ၁၀ ပွိုၚ်ဍုၚ်ဂှ် ဂအုံအရာပ် ၄၆၈ ဂအုံကွာန်နွံတုဲ ဒက်ပတန်လဝ်နကဵုကွာန် ၁၁၄၇ ကွာန်နွံမံၚ်ကီုလေဝ် နူကဵုဂကောံ အလဵုအသဳပၞာန်တွဵုရးဂှ်တှ်ေ အတိုင်ဆန္ဒညးဍုၚ်ကွာန်တံ သွက်ဂွံကလေၚ်ရုဲစှ်ပတိုန်အာ သ္ကိုပ်ပရေၚ်အုပ်ဓုပ်တံဂှ် ယောၚ်ယာမံၚ်ရောၚ်။
ပရိုၚ် – သြင်လောန်တိုၚ်မ်
Photo – MOI