သိုလ်၊ ဂျောန် ၁၈
ပြဟ်ဟ်ဏံ လတူပရေၚ်ကြံၚ်မ္ၚိုဟ်က္တဵုဒှ်မံၚ် ကုကိုဝ်ရဳယာသၟဝ်ကျာဂှ် နကဵုပရေၚ်ဓဝ်ၜိုဟ်လလမ် သွက်ဂွံသောင်ကလးအာညးသ္ကံမာန် သမ္မတအမေရိကာန် ဒဝ်နေဝ်ထရ ဂစာန်အာကဵုက္ဍိုပ်ညိဂှ် သမ္မတ လဳဂျေဝ်မျံၚ် အာတ်မိက်လဝ်ရောၚ် ညးတာလျိုၚ်ရုၚ်သမ္မတ ကိုဝ်ရဳယာသၠုၚ်ကျာတံ ဟီုရ။
အခိၚ်က္ဍိုပ်သ္ကိုပ်ညးၜါတၠတံ သဳကၠဳမံၚ် ပ္ဍဲကဵုသဘင်သဳကၠဳ G 7 ဂျောန် ၁၆ ဂှ် သမ္မတ လဳ အာတ်မိက်လဝ် အတိုၚ်ဏံရ။
အပ္ဍဲကဵုပရေၚ်သဳကၠဳ ဆၜိုတ်ညးတံၜါတၠဏံဟေၚ် သၟာန်သၟုက်လဝ်အကာဲအရာလၟုဟ် ကိုဝ်ရဳယာသၟဝ်ကျာကဵု ကိုဝ်ရဳယာသၠုၚ်ကျာတံရောၚ် ဂွံတီကေတ်ရ။
ဟိုတ်နူပရေၚ်ပေါဲပၞာန် ဒေသဗၟံက်လဒေါဝ်တေံ တုဲဒှ်အာတုဲ ညံၚ်သ္ဂောံသ္ပညးအာက္ဍိုပ် သောၚ်ကလးပြသၞာ ကိုဝ်ရဳယာသၟဝ်ကျာ ဗွဲမၜိုဟ်လလမ်မာန်ဂှ် သမ္မတ လဳ အာတ်မိက်လဝ် ဒဝ်နေဝ်ထရ မဒှ်ရ။
သွက်သ္ဂောံသောၚ်ကလးအာ ပရေၚ်ကေၚ်ကာ ကိုဝ်ရဳယာသၟဝ်ကျာဂှ် ဖန်ဖက်ရေၚ်တၠုၚ်အာရောၚ် ဒဝ်နေဝ်ထရ ဟီုလဝ်ကဵု သမ္မတ လဳဂှ် နူရုၚ်သမ္မတ ကိုဝ်ရဳယာသၠုၚ်ကျာ ဟီုရ။
စပ်ကဵု ပရေၚ်ကမၠတ်သြန်သိုက်ဖာ ကေုာံ အမှုရာဇဝတ်သိုက်ဖာ ကိုဝ်ရဳယာသၟဝ်ကျာတံဂှ် ဒးပံၚ်တောဲသောၚ်ကလးအာ မွဲစွံတုဲ၊ ကိစ္စကောန်ဍုၚ်ဂျပါန် နူပျုၚ်ယာန် ရပ်ဏာလဝ်တံဂှ်လေဝ် သွက်သ္ဂောံသောၚ်ကလးအာဂှ်လေဝ် က္ဍိုပ်သ္ကိုပ်ၜါတၠ သဳကၠဳလဝ်ကီုရ။
အပ္ဍဲကာလ ဒဝ်နေဝ်ထရ ကေတ်လဝ်တာလျိုၚ် သမ္မတအလန်ပထမဂှ် ညးကဵု က္ဍိုပ်သ္ကိုပ်ကိုဝ်ရဳယာသၟဝ်ကျာ ကေန်ဂျုၚ်အာန်တံ ကေၚ်ဆဵုဂဗလဝ် ၃ ဝါ မဒှ်ရ။
ပ္ဍဲသင်ကာပူ သၞာံ ၂၀၁၈ မွဲဝါ၊ သၞာံ ၂၀၁၉ ပ္ဍဲဍုၚ်ဟနွိုၚ် မွဲဝါ ကေၚ်ဆဵုဂဗလဝ်တုဲ ပ္ဍဲပယျဵုကိုဝ်ရဳယာသၠုၚ်ကျာ-သၟဝ်ကျာ ဆဵုဂဗလဝ်အလန်တတိယကီုလေဝ် ဟွံဂွံလဝ် တင်တုပ်စိုတ်ပုဟ်။
အကာဲအရာ ကိုဝ်ရဳယာသၟဝ်ကျာ ပိုၚ်ပြဳလဝ်လွဟ်နျူကလဳယျာဂှ် ဒှ်အကာဲအရာ ကလေၚ်ပြံၚ်သၠာဲအာဟွံမာန်ပုဟ် နူပျုၚ်ယာန် ဟီုလဝ်ရ။
နကဵုအမေရိကာန် တင်လစွံစိုတ် ပၟိက်မိက်ဂွံဇီုကပိုက်အာတဝ်တဝ်ဂှ် ယဝ်ရဗလးတဲမ္ဂး တရဴဂၠံၚ်သဳကၠဳဂှ် ဆက်ပံက်လဝ်ဏီရောၚ် နူကိုဝ်ရဳယာသၟဝ်ကျာ ဟီုလဝ်ရ။
ဒဝ်နေဝ်ထရ အဟိန်ယိုက်ဂၠေၚ်မံၚ်တာလျိုၚ် သမ္မတအမေရိကာန် လုပ်ဖျေံလဝ်ဇိုၚ်တိဍုၚ် ကိုဝ်ရဳယာသၟဝ်ကျာ အလန်ပထမကၠာအိုတ်ရောၚ် သ္ပလဝ်စၟတ်သမ္တီလေဝ် နွံရ။
Ref:Reuters