သိုလ်၊ ဂျောန် ၁၉
ပ္ဍဲဂိတုဂျောန် ၃ တေံ ကၠောန်ဗဒှ်လဝ် ပေါဲရုဲမာဲဒေသန္တရ စပ်ကဵုပရေၚ်ကိစ္စ တၞးမာဲတံဟွံရုံဂပ် ဒှ်ကၠုၚ်လဝ်တုဲ လတူကဝ်မယှေန်ပေါဲရုဲမာဲကောန်ဂကူဂှ် စၠတ်ထဝ်ကိုဝ်ရဳယာသၠုၚ်ကျာ စရေၚ်တၠုၚ်မံၚ် ကမၠောန်စၟဳစၟတ်ဂၠိုက်ဂၠာဲ ပွိုၚ် ၄၅ တ္ၚဲ စနူကဵုဂျောန် ၁၈ ဂှ်ရ။
ဟိုတ်နူတၞးမာဲဟွံရုံဂပ်ဂှ် ပရေၚ်ထ္ၜးဆန္ဒတံ က္တဵုဒှ်တုဲ သ္ကိုပ်ညးတာလျိုၚ်ကဝ်မယှေန်ပေါဲရုဲမာဲ ဒးနုက်တိတ်အာလဝ်ဂှ် ညံၚ်သ္ဂောံစၟဳစၟတ်ဂၠိုက်ဂၠာဲအာ ချိုတ်ချိုတ်ပၠိုတ်ပၠိုတ် သမ္မတ လဳဂျေဝ်မျံၚ် စၞောန်ပ္ညုၚ်လဝ် ရ။
ပရေၚ်ဏံဂှ် ဒှ်ပွမဖံက်ပကဝ်အခေါၚ် ပရေၚ်ကဵုမာဲကောန်ဍုၚ်တံတုဲ သၞောတ်ပေါဲရုဲမာဲအလုံမွဲနိဂီုဍုၚ်ဂှ် ဒးပြံၚ်သၠာဲပလေဝ်အာထေက်ရောၚ် အမတ်စၠတ်ထဝ်တံ ဟီုဂးတုဲ အဟိန်စၟဳစၟတ်မံၚ် ကဝ်မယှေန်ပေါဲရုဲမာဲကဵု ဂကောံပေါဲရုဲမာဲဒေသန္တရတံ မဒှ်ရ။
အပ္ဍဲဂကောံတၟေၚ် စၟဳစၟတ်ဂၠိုက်ဂၠာဲဂှ် အမတ်စၠတ်ထဝ် နူဗော်ဒဳမဝ်ကရက်တေတ် ဂွံလဝ်အဝဵုတံကဵု ဗော်ဒစဵုဒစးအဓိက ဗော်အဝဵုညးဍုၚ်ကွာန်တံ ပါလုပ်မံၚ်ရ။
အမတ်စၠတ်ထဝ် နူဗော်ဒစဵုဒစး ယံၚ်သာန်ဟန် ကေတ်အာတာလျိုၚ် နဒဒှ်က္ဍိုပ်သ္ကိုပ်ဂကောံဂှ် ရောၚ်။
ပရေၚ်စၟဳစၟတ်ဂၠိုက်ဂၠာဲတင်နၚ်ဍာံတံ ဟွံတုဲဒှ်ဏီတုဲ လၟုဟ်မှဒှ်ၜိုတ်အစဓဝ်ရ ဥက္ကဌစၠတ်ထဝ်ကောန်ဂကူ ချိုလ်ဂျောင်ဆစ် ဟီုရ။
ဂကောံစၟဳစၟတ်ဂၠိုက်ဂၠာဲပရေၚ်စၠတ်ထဝ်တံဂှ် ညံၚ်သ္ဂောံထမံက်ပတိတ်အာ ဟိုတ်ပရူပရာတၞးမာဲဟွံရုံဂပ်ဂှ်တုဲ ပတဝ်အာက္ဍိုပ် လပါ်ပရေၚ်ပလေဝ်ပြံၚ်သၠာဲဗီုပြၚ်စဳရေၚ်ခါန်ကၞက်ပေါဲရုဲမာဲ ညးဍုၚ်ကွာန်တံ နွံဂလာန်ပတေဟ်မာန်ရောၚ် ညးဟီုရ။
ဆေင်စပ်ကဵုပရေၚ်ယောၚ်ယာဒှ်ကၠုၚ်လဝ် ပ္ဍဲကဵုပေါဲရုဲမာဲ ဟိုတ်နူတၞးမာဲဟွံရုံဂပ်တုဲ ပ္ဍဲကိုဝ်ရဳယာသၠုၚ်ကျာ ကွးဘာတက္ကသိုလ်တံပါလုပ်တုဲ ပရေၚ်ထ္ၜးဆန္ဒတံ က္တဵုဒှ်မံၚ်ရ။
အလုံမွဲနိဂီုဍုၚ် ဒၞာဲရုၚ်မာဲ ၉၁ ဒၞာဲဂှ် ဟိုတ်နူတၞးမာဲဟွံရုံဂပ်တုဲ ဒးဒေါအ်လဝ် ပရေၚ်ကဵုမာဲ ဗွဲယာယဳရ။
တၞးစၟတ်သမ္တီအခေါၚ်မၚ်ကဵုမာဲတံ ပတိတ်ကဵုလဝ်တုဲ ညးတံ ဂွံအခေါၚ်စုတ်မာဲကီုလေဝ် ရဲဟွံဂွံလဝ် တၞးစၟတ်သမ္တီ ၜိုတ် ၁၂ တၠတံဂှ် ဟွံဂွံလဝ်အခေါၚ်စုတ်မာဲပုဟ် ဂွံတီကေတ်ရ။
Ref:Reuters