ရေဝ်၊ ဂျောန် ၁၉
အပ္ဍဲဒၞာဲသ္ၚိဌာန်ပရေၚ်ၜိုဟ်လလမ် နွံမံၚ်ဒေသကၞောတ်ၜဳရေဝ် သၟဝ်ပရေၚ်ထိၚ်ချုက် ဗော်ဍုၚ်မန်တၟိဂှ် ၜၚ်ကျာဒပ်ပၞာန်သီအဝဵုတံ ကြဳဗုၚ်ဗတိုက်လဝ်ရောၚ် နူရိုဟ်ကၞက်ပရိုၚ်ဒေသတံ ဟီုကဵု ဌာန်ပရိုၚ်သြၚ်လောန်တိုၚ်မ်ရ။
အပ္ဍဲဂိတုဂျောန် ၁၉ ၜိုတ်အခိၚ်နူဂယးပြဟ် ၁ နာဍဳဂှ်တှ်ေ အပ္ဍဲကဵုကွာန်ၜါသွာၚ်ဒေသကၞောတ်ၜဳရေဝ် ဒၞာဲသ္ၚိဌာန် ပရေၚ်ဓဝ်ၜိုဟ်လလမ်တံဂှ် နူကဵုၜၚ်ကျာဒပ်ပၞာန်သီအဝဵု ကၠုၚ်ကြဳဖျေံဏာဗုမ် ၂ မရ။
ဟိုတ်နူဒပ်ပၞာန်သီအဝဵု ကြဳဗုၚ်နူဗလးကျာဂှ်ရ သ္ၚိဌာန်ပရေၚ်ဓဝ်ၜိုဟ်လလမ် ၅ မပြၚ် လီုလာ်အာနွံတုဲ မၞိဟ်ဒးလဝ်ဝပ် ဟၟဲပုဟ် သ္ဂးရ။
ဒၞာဲသ္ၚိဌာန်ဒးလဝ်ဗုမ် ဒပ်ပၞာန်ဗၟာကြဳလဝ်ဗုၚ်ဏံဂှ်တှ်ေ ကြဴနူ ဗော်ဍုၚ်မန်တၟိ NMSP ထ္ပက်လဝ်စၟတ်တဲ NCA တုဲဂှ် နူကဵု ဖံၚ်ဒေဝ်ယှေန်နိပန် ဍုၚ်ဂျပါန် သိုၚ်ခၞံကဵုလဝ်ဒါန် သွက်သ္ၚိဌာန် ဒၞာဲဂွံမံၚ်စံၚ်တန်တဴအာ လၟေၚ်ကမၠောန် ပရေၚ်ဒက်ပတန် ဓဝ်ၜိုဟ်လလမ် မဒှ်ရ။
အပ္ဍဲဒၞာဲသ္ၚိဌာန်တံဏံဂှ် ရဲပါဲဘဲပၞာန်တံကီု ညးဒေသတံကီု ကၠုၚ်မံၚ်ဒၟံၚ် တုဲ ဟိုတ်နူဒပ်ပၞာန်သီအဝဵု ကြဳဗုၚ်ဂှ်ရ ရဲပါဲဘဲပၞာန်တံ ဒးထပ်ဂြိပ်ပါဲမံၚ် မွဲဒၞာဲပၠန်ရောၚ် သ္ဂးရ။
စပ်ကဵုပရူပရာ ဒပ်ပၞာန်သီအဝဵု ကြဳလဝ်ဗုၚ်ဏံတုဲ နူကဵုဗော်ဍုၚ်မန်တၟိ NMSP နာဲဟံသာ က္ဍိုက်ပ်ဂှ်တှ်ေ စဵုကဵုအခိၚ်လၟုဟ်ဏံ လလောၚ်ပတိတ်လဝ်ပရိုၚ် မွဲမွဲသာ်ဂှ် ဟွံဂွံဆဵုလဝ်ဏီပုဟ်။
ဗော်ဍုၚ်မန်တၟိ NMSP ဂှ် ကြဴနူဒပ်ပၞာန်သီအဝဵုတုဲ ပရေၚ်ပြသၞာ ပရေၚ်ဍုၚ်ကွာန်ဂှ် ညံၚ်သ္ဂောံသောၚ်ကလးအာ နကဵုနဲကဲ ပရေၚ်ဍုၚ်ကွာန်ရောၚ် စွံလဝ်လစွံစိုတ်တုဲ ပေါဲသဳကၠဳ ပရေၚ်ဓဝ်ၜိုဟ်လလမ်နေပျဳဒဝ် ဒပ်ပၞာန်ကော်ဘိက်လဝ်တံဂှ် အာတိုန်စိုပ်မံၚ်လၟိုန်န်ရောၚ်။
တုဲကၠုၚ် ဂိတုမေ ၂၇ တေံဂှ်လေဝ် ဒၞာဲကဵုဗ္ဒိုပ်ဂကောံလကိုတ်ရေဝ် ဒေသကၞောတ်ၜဳရေဝ်ဂှ် နူကဵုဒပ်ပၞာန် ဗတိုက်လဝ်ကဵုၜၚ်ကျာတုဲ ကောန်ဂကောံဒပ်လကိုတ်ရေဝ် ၁၀ တၠ ချိုတ်အာတုဲ ၂၀ တၠပြၚ် ဒးလဝ်ဘဲဒဏ်တံ နွံရ။
ဒပ်ပၞာန်သီအဝဵုတံဝွံ ပ္ဍဲဂိတုမေကဵု ဂိတုဂျောန်ဏံ အပ္ဍဲဒၞာဲတိဍာ် ဗော်ဍုၚ်မန်တၟိထိၚ်ချုက်လဝ် ဒေသကၞောတ်ၜဳရေဝ်ဂှ် ကၠုၚ်ဗတိုက်လဝ်ကဵု ၜၚ်ကျာ ၃ ဝါတုဲယျ။
ပရိုၚ် – သြင်လောန်တိုၚ်မ်
Photo – CJ