တိုကျို၊ ဂျောန် ၂၀
တင်တုပ်စိုတ်အဆံၚ်ကၠာအိုတ် အကြာအမေရိကာန်-အဳရာန် ညံၚ်သ္ဂောံဖအိုတ်ကၠေံအာ ပရေၚ်ဂၠာဲသၞဗတိုက်မံၚ်ညးသ္ကံတုဲ ကာန်ပဏဳၜၚ် ကေုာံ ကာန်ပဏဳဇြဟတ်ဓါတ်နူဂျပါန်တံ ဒုၚ်တၠုၚ်ကီုလေဝ် ညံၚ်သ္ဂောံချိုတ်ပၠိုတ်အာ ဗီုအတိုၚ်လၟေၚ်ဓမ္မတာပၠန်ဂှ် သ္ၚောဲမံၚ်ဏီရောၚ် ကဵုလဝ်သတိရ။
သွက်သ္ဂောံဂွံ ပရေၚ်တင်တုပ်စိုတ်ဗွဲကြဴအိုတ်မ္ဂး နွံမံၚ်ပၟိက်ကဵု ဒးကၠောန်အာ ပရေၚ်ပ္ညဳပ္ညပ်တံရ။ တုဲတှ်ေ ပ္ဍဲပ္ၚံက်ၜဳဂှ်လေဝ် မါၚ်တံ ဆက်နွံမံၚ်ဖိုဟ်ရောၚ်။ သွက်ပရေၚ်တတ်ကၠောံအာကၠုၚ် အနာဂတ်မ္ဂး ညံၚ်ဂွံကံက်အာအကံက်သြန် အစဳဇန်နွံမံၚ်ရောၚ် နူအဳရာန် ဟီုဂးမံၚ်ရ။
ကောန်နိဂီုဂျပါန် ၃ တၠကီု သီုရဲၜၚ်ပွဳပွူ ၉၀၀ တံ ပါလုပ်မံၚ်ပ္ဍဲၜၚ် ၃၈ မ ဆက်စပ်မံၚ်ကဵုဂျပါန်တံဂှ် စဵုကဵုဂျောန် ၁၈ သဝ်တ္ၚဲ ၅ နာဍဳကဝက်ဂှ် ခက်ဂၚ်သှ်ေၜက်မံၚ်ဏီရ။
တင်တုပ်စိုတ် အမေရိကာန်-အဳရာန်ဏံဂှ် ဒှ်အရာလဂါံဇိုၚ်ဇၞော်ဇၞော် သွက်သ္ဂောံသောၚ်ကလးအာ အကာဲအရာရောၚ် ဂကောံတၠၜၚ်ဂျပါန်တံ ဟီုတုဲ ဒုၚ်တၠုၚ်လဝ်အိုတ်ရ။
ဆဂး သွက်အရၚ် ၆၀ တ္ၚဲ ၜၚ်တတ်အာပ္ဍဲပ္ၚံက်ၜဳတံဂှ် ဟွံကံက်အာသြန်ပုဟ်ဂှ် အပ္ဍဲတင်တုပ်စိုတ်ဏံ ပါလုပ်မံၚ် ဟွံသေၚ်ရောၚ် နူဂကောံဂျပါန်ဂှ် ဟီုရ။
ကြဴနူကာလဏံ အိုတ်တုဲအာမ္ဂး နူပ္ၚံက်ၜဳဟဝ်မုဇ်ဂှ် ညံၚ်သ္ဂောံကဵုအခေါၚ်တတ်ကၠောံအာဗွဲမဗၠးဘဲအန္တရာဲ ကေုာံ ဟၟဲကဵုၚုဟ်မးတံဂှ် တၠၜၚ်ဂျပါန်တံ အာတ်မိက်လဝ်ရ။
NYK Line ၜၚ်နွံမံၚ်ပွဳပွူ ၁၀ ပ္ဍဲဒေသဗၟံက်လဒေါဝ်တံဂှ် လၟေၚ်ဂၠံၚ်ဍာ်ဏံ ညံၚ်သ္ဂောံကလေၚ်ဒှ်အာ ဗီုလၟေၚ် ဓမ္မတာဗွဲမပြဟ်မာန်ဂှ် စၟဳမံၚ်မံၚ်ရောၚ် ဟီုရ။
အပ္ဍဲပ္ၚံက်ၜဳဏံ ညံၚ်သ္ဂောံဗၠးဘဲအန္တရာဲဂှ် စၟဳစၟတ်ချိုတ်ပၠိုတ်တုဲမှ ကဵုတတ်အာရောၚ် ကာန်ပဏဳ Kawasaki Kisen Kaisha Ltd ဟီုလဝ်ရ။
အဆံၚ်ကိုပ်ကၠာ ၜိုန်ရဂွံလဝ်တင်တုပ်စိုတ် အကြာအမေရိကာန်-အဳရာန်ကီုလေဝ် ဂၠံၚ်ဍာန်ဍာ် ဗၠးဘဲအန္တရာဲယျ ပွမတင်ဒုၚ်လျိုၚ်တံဂှ် ဂွံလဝ်ဟွံသေၚ်ပုဟ် က္ဍိုပ်သ္ကိုပ်သွာၚ်ပရေၚ်ကမၠောန်တံ ဟီုလဝ်ရ။
ကုဂကောံအလဵုအသဳနိဂီုဍုၚ်ဆေၚ်စပ်တံ ကေုာံ ကာပဏဳဒုၚ်လျိုၚ်တံဂှ် ဒးပံၚ်တောဲရေၚ်တၠုၚ်အာ ကြပ်ပ်ရောၚ် ကာန်ပဏဳ Mitsui O.S.K. Lines Ltd ဟီုရ။
အတိုင်အကာဲအရာ ကၠာပေါဲပၞာန်ဟွံဒှ်တေံဂှ် ကလေၚ်ဒှ်ကၠုၚ်ဗွဲမပြဟ်ရောၚ်ဂှ် ဟွံထေၚ်ပုဟ် ပ္ဍဲပေါဲသောၚ်ကလးပရိုၚ် ကၠောန်လဝ် ပ္ဍဲဂျောန် ၁၈ ဂှ် ဥက္ကဌကာန်ပဏဳဇြဟတ်ဓါတ်ဇၞော် Cosmo Energy Holdings Co., ယှဳဂဳရူ ယာမာဒါ ဟီုရ။
လိက်ပရေၚ်သ္ပစၟတ်သမ္တီပရေၚ်ဓဝ်ကၠိုဟ်ခၠၚ် အမေရိကာန်-အဳရာန်ဂှ် ညံၚ်သ္ဂောံဒေါအ်လဝ်ပရေၚ်ပေါဲဗတိုက်ပွိုၚ် ၆၀ တ္ၚဲကီု သွက်တင်တုပ်စိုတ်အာစိုပ်ဒတုဲဂှ် အကြာတ္ၚဲတံဏံ ဒးပ္ညဳပ္ညပ်အာရောၚ်။
Ref: THE ASAHI SHIMBUN