ကအ်ကြိက်၊ ဂျောန် ၂၀
တွဵုရးကရေၚ် ပွိုၚ်ဍုၚ်ကအ်ကြိက် အပ္ဍဲကွာန်ကအ်ဗိန် ဒၞာဲဒပ်ပၞာန်သီအဝဵုဖျေံလဝ်ဒပ် ဒးဒုၚ်လုပ်ဗတိုက်တုဲဂှ် ဟိုတ်နူ ပတိတ်အမိၚ်တိတ်မ္ၚးအခိၚ်ဗ္တံဟွံဂွံဂှ်ရ ဒှ်မံၚ်အခက်အခုဲရောၚ် ရဲကွာန်တံ ဟီုကဵု ဌာန်ပရိုၚ်သြၚ်လောန်တိုၚ်မ်ရ။
တုဲကၠုၚ်ဂိတုဂျောန် ၁၂ ၜိုတ်နူအခိၚ်ဂယး ၉ နာဍဳဂှ် နူကဵု ဂကောံပၠန်ဂတးဇြဟတ်မၞိဟ်ၜိုတ် ၁၀ တၠပြၚ် လုပ်ဗတိုက်လဝ် ဒၞာဲဒပ်ကဝ်မယှေန်ပၞာန် ဖျေံလဝ်ဗဒိုပ် ဗ္ဒာဲဘာတန်ဒေါဝ်ကွာန်ကအ်ဗိန်ရ။
အပ္ဍဲပေါဲဗတိုက်ဏံ လပါ်ဒပ်ပၞာန်သီအဝဵု ကောန်ပၞာန် ၂ တၠ ချိုတ်အာလဝ်တုဲဂှ်တှ်ေ နူလပါ်ဒပ်ပၞာန် ဗွဲမပြဟ် ပတိတ်ဏာအမိၚ်အခိၚ်ဗ္တံတိတ်မ္ၚးဟွံဂွံ စနူဗ္တံ ၈ နာဍဳ စဵုကဵုနူဂယး ၄ နာဍဳ မဒှ်ရ။
ဟိုတ်နူကဵု ကောန်ပၞာန် ၂ တၠ ချိုတ်အာလဝ်တုဲ နူကဵုသ္ကိုပ်ပရေၚ်အုပ်ဓုပ်မွဲအဆံၚ် ဒပ်ပၞာန်ဗမာ ပတိတ်အမိၚ်တာဒၞာ တိတ်မ္ၚးအခိၚ်ဗ္တံဟွံဂွံရောၚ်ဂှ် ရဲကွာန်တံဟီုလဴလဝ် မဒှ်ရ။
အမိၚ်တိတ်မ္ၚးအခိၚ်ဗ္တံဟွံဂွံ ပတိတ်လဝ်ဏံ ဟွံဒဂေတ်ဗက်တုဲ ယဝ်ရဒှ်ကၠုၚ် ပရေၚ်ပန်ပှော်မွဲမွဲသာ်မ္ဂး ဟွံကေတ်တာလျိုၚ်ပုဟ် နူကဵုဒပ်ပၞာန်သီအဝဵု ဘပဠလဝ်ရ။
ဒပ်ပၞာန်သီအဝဵု ဟိုတ်နူပတိတ်လဝ်အမိၚ် တိတ်မ္ၚးအခိၚ်ဗ္တံဟွံဂွံတုဲ သွက်ကေၚ်ကာပရေၚ်ထတ်ယုက်နာနာ ကာမံက်တိုန်အခိၚ်ဗ္တံမ္ဂး ဖေက်အာကၠုၚ်ဟွံဂွံဂှ် ညးဒေသတံဒှ်မံၚ်ဒဝိၚ်အိုတ်ရ။
အပ္ဍဲသၞာံ ၂၀၂၄ တေံ ဂကောံဒပ်ပၠန်ဂတးတံ ဗတိုက်သီကေတ်လဝ် ဗ္ဒိုပ်ဗၠာဲသၟိၚ်ကအ်ဗိန်တုဲဂှ်မှ ဒပ်ပၞာန်သီအဝဵုတံ ကၠုၚ်ဖျေံလဝ်ဒပ် ပ္ဍဲကဵုကွာန်ကအ်ဗိန် နကဵုဇြဟတ်ဗွဲမဂၠိုၚ်ရ။
ပြဟ်ဟ်ဏံမ္ဂး ဒပ်ပၞာန်သီအဝဵုတံ ကေတ်ဒၞာဲဖျေံလဝ်ဒပ် အပ္ဍဲကဵုဘာလကျာ်ကွာန်ကအ်ဗိန်၊ ဘာဗတောန်လိက်၊ ကျာ်ပါၚ်ကြုၚ်ကီု သီုဖအိုတ်နွံမံၚ် ၄ ဒၞာဲတံရ။
ပရိုၚ် – သြင်လောန်တိုၚ်မ်
Photo – CJ