မတ်မလီု၊ ဂျောန် ၂၀
အပ္ဍဲကဵုတွဵုရးမန် နူအလဵုအသဳပၞာန်သီအဝဵု ကၠောန်မံၚ်ကိုန်အစဳဇန် “သၟိၚ်ဂိတု” ပွိုၚ် ၁၀၀ တ္ၚဲ သွက်သ္ဂောံပတိတ်ကဵု ကာတ်စၟတ်သမ္တီကောန်ဍုၚ်ကဵု ဂၞန် Unique ID တံဂှ် သၞာဲဒါလဝကတံ အာတ်မံၚ်သြန်နွံရဂှ် ညးဆဵုဂဗလဝ်နမတ်တံ ဟီုကဵုဌာန်ပရိုၚ်သြၚ်လောန်တိုၚ်မ်ရ။
အပ္ဍဲကာလပွိုၚ် ၁၀၀ တ္ၚဲ အလဵုအသဳပၞာန်သီအဝဵုတံ စနူဂိတုအေဗရာ ၂၀ စဵုကဵုကၞောတ်ဂိတုဂျူလာၚ်တေံ နကဵုကိုန်အစဳဇန်သၟိၚ်ဂိတု သွက်ဂွံကၠောန်ပတိတ်ကဵု ကာတ်စၟတ်သမ္တီကောန်ဍုၚ်ကဵု Unique ID တံဂှ် ဖန်ဖက်ရေၚ်တၠုၚ်ကဵုမံၚ်ရ။
နူလပါ်အလဵုအသဳပၞာန် အပ္ဍဲကိုန်အစဳဇန်ပွိုၚ် ၁၀၀ တ္ၚဲဏံ ညးဍုၚ်ကွာန်တံ ညံၚ်သ္ဂောံဂွံဗွဲမလောဲသွာ ဖန်ဖက်ရေၚ်တၠုၚ်ကဵုတုဲ ရုၚ်ဆေၚ်စပ်တံဂှ်လေဝ် ဒးပလေဝ်စလဝ် ဗီုပြၚ်သၞောတ်စှ်ေစှ်ေဂှ်ကီု ပရေၚ်အာတ်ကေတ်သြန်တံ ညံၚ်ဟွံဂွံကၠောန်ဂှ်လေဝ် စၞောန်ပ္ညုၚ်လဝ်ကီုရောၚ်။
ဆဂး အပ္ဍဲကဵုဗလးတိမ္ဂး သၞာဲဒါလဝက နူဌာနဝန်ဇၞော်လဝကကေုာံ ဇြဟတ်မၞိဟ်တံဂှ် ထ္ၜးဟိုတ်နာနာသာ်တုဲ အာတ်မံၚ်သြန်နူကဵု ညးဍုၚ်ကွာန်ရောၚ် ဂွံတီကေတ်ရ။
အခိၚ်အာကၠောန်လဝ် ကာတ်စၟတ်သမ္တီကဵု Unique ID တံဂှ်တှ်ေ သၞာဲဒါလဝကတံ ထ္ၜးဟိုတ်ကဵု တၞးလိက်စရၚ်သ္ၚိနာနာတံ ဟွံဍိုက်ပေၚ်ဂးတုဲ ကဵုဗက်စဴကေတ်မံၚ်မွဲဏှမွဲဏှ၊ ကညာၚ်ကရေဲ ဟီုဗျိဒေါန်မံၚ်ဂှ်ကီု၊ ကဵုမၚ်မံၚ်မ္ၚးရုၚ် ပွိုၚ်မွဲတ္ၚဲပေၚ်ၚ်တုဲ နူညးကၠောန်စအကြာတံမွဲအဆံၚ် ကဵုသြန်တုဲမှလေဝ်ဍေံတံ ကၠောန်ကဵုဏာပြဟ်ဟ်ရောၚ် ညးဒေသဆဵုနမတ် ၂ တၠ ဟီုလဝ်ရ။
အပ္ဍဲကိုန်အစဳဇန်သၟိၚ်ဂိတုပွိုၚ် ၁၀၀ တ္ၚဲဏံ ပ္ဍဲအရာကၠောန်ကဵုမံၚ်ကာတ်စၟတ်သမ္တီကဵု Unique ID တံ မွဲတၠမ္ဂး အောန်အိုတ် သြန်နူ ၃ ဠက် စဵုကဵုကိုတ်ပြၚ် ဒးထပက်ကဵုမံၚ်သြန်တုဲ ယဝ်ရဒှ်ဂကူသအာၚ် တၞဟ်တံမ္ဂး ပဵုတုဲဒးကဵုမံၚ်သြန်ရောၚ် သ္ဂးရ။
အပ္ဍဲကာလကိုန်အစဳဇန် သၟိၚ်ဂိတုပွိုၚ် ၁၀၀ တ္ၚဲဏံဂှ် သွက်ဂွံပယေဝ်ပလေဝ်လဝ် ရုၚ်ပွိုၚ်ဍုၚ်တံကီု၊ စွံလဝ်ဒၞာဲဒုၚ်တၠုၚ် တၟုဲ သွက်ညးဍုၚ်ကွာန်တံကီု၊ ဖန်ဇန်လဝ်ခဒမ်ဒၞာဲဇူဒီု သွက်ညးဍုၚ်ကွာန်တံကီု၊ အပ္ဍဲအရာပရေၚ်ကမၠောန် ရေၚ်တၠုၚ်ကဵုမံၚ်တံဂှ်လေဝ် ညံၚ်သ္ဂောံဍာံစၟတ်ပြဟ်ပြေဟ်အာမာန်ဂှ် နူအလဵုအသဳပၞာန် ကဵုလဝ်စၞောန်ပ္ညုၚ်ရောၚ်။
ယဝ်ရ သၞာဲဒါလဝက အပ္ဍဲတွဵုရးတံအာတ်သြန်မ္ဂး တေၚ်စိုပ်မာန်ရောၚ် ရုၚ်သ္ကိုပ်ညးတာလျိုၚ် လဝက တွဵုရးမန် လလောၚ်တြးလဝ်ကီုလေဝ် သၞာဲဒါဲရုၚ်လဝကတံ အာတ်ကေတ်မံၚ်သြန်ဗီုတံဏံဂှ် ပရေၚ်ရပ်စပ်ကေတ်အရေဝ်ဂှ် စဵုကဵုလၟုဟ် ဟွံကေၚ်ဆဵုလဝ်ဏီပုဟ်။
ပရိုၚ် – သြင်လောန်တိုၚ်မ်
Photo – MOI