ပါန်သာန်၊ ဂျောန် ၂၀
ပရေၚ်ၜိုဟ်လလမ်လၟိုန်ထာဝရ ညံၚ်သ္ဂောံဂွံကၠောန်အာရောၚ် အလဵုအသဳပၞာန်ပြံၚ်လဝ်ဗီုပြၚ် ကြဴဇာမံၚ်တုဲ အပ္ဍဲကိုန်အစဳဇန်ပွိုၚ် ၁၀၀ တ္ၚဲဏံ လဂါံဇိုၚ်ပရေၚ်ၜိုဟ်လလမ်အာမံၚ်ဂှ်တှ်ေ ပတဝ်လဝ်က္ဍိုပ် ကုဂကောံရပ်လွဟ် ကောန်ဍုၚ်အရၚ် ဒေသသၟဝ်ကျာတံရ။
ဗွဲတၟေၚ် ဂကောံ NDAA ကေုာံ UWSA ဟွံကေၚ်ဒှ်လဝ်ပေါဲဗတိုက်ကဵု ဒပ်ပၞာန်ဗမာတံဂှ် နူကဵုကမ္မတဳပရေၚ်ညဳသၟဟ်ကောန်ဂကူ ကေုာံ ပ္ညဳပ္ညပ်ထမံက်ရုပ်ရဴပရေၚ်ၜိုဟ်လလမ် NSPNC ဥက္ကဌ ဒုတိယ သ္ကိုပ်ပၞာန်ဇၞော် ယာပျေအ်ကေုာံ ဂကောံညးစၞးတံ အာဆဵုဂဗလဝ် မဒှ်ရ။
အပ္ဍဲဂိတုဂျောန် ၁၇ ဂှ် ကမ္မတဳပ္ညဳပ္ညပ်ထမံက်ရုပ်ရဴ ပရေၚ်ၜိုဟ်လလမ် NSPNC အာဆဵုဂဗလဝ် က္ဍိုပ်သ္ကိုပ် NDAA ဒေသတၟေၚ် (၄) မိုၚ်ဠာတုဲ၊ ပ္ဍဲစၟတ်တ္ၚဲ ၁၈ ဂှ် အာစိုပ်ဆဵုဂဗလဝ်က္ဍိုပ်သ္ကိုပ် UWSA အပ္ဍဲဍုၚ်ပါန်သာန်ရ။
အပ္ဍဲအရာပရေၚ်အာဆဵုဂဗလဝ်တံဂှ်မ္ဂး စပ်ကဵုပရူပရေၚ်ၜိုဟ်လလမ်၊ ပရေၚ်စန်ပကောံညဳသၟဟ်၊ ဒေသပယျဵု သွက်ဂွံညိၚ်ဝပ်အာ၊ ပရေၚ်ညဳသၟဟ်ကောန်ဂကူ ကေုာံပရေၚ်ဖောအ်ဗြဳဒေသတံဂှ် ဆဵုဂဗသဳကၠဳလဝ်ဗွဲပလးရောၚ် သာ်ဝွံ နူ NDAAကဵု UWSA တံ လလောၚ်တြးပတိတ်လဝ်ပရိုၚ်ရ။ ဆဂး နူလပါ်အလဵုအသဳပၞာန်ဂှ် လလောၚ်တြးလဝ်ပရိုၚ် ဟၟဲဏီပုဟ်။
အတိုင်လိက်လလောၚ်တြး NDAA မ္ဂး နူကဵုအလဵုအသဳတၟိဂှ် စွံအဓိက ကဵုဖျုန်ကဵု လၟေၚ်ကမၠောန် ပရေၚ်ၜိုဟ်လလမ်တံတုဲ သီုကဵုဒေသ တၟေၚ် ၄ ကီု ဂကောံဆေၚ်စပ်တၞဟ်ဟ်တံဂှ်လေဝ် ညးတံကော်ဘိက် လဝ်တုဲ သွက်ဒေသဂွံညိၚ်ဝပ်ကေုာံ ပရေၚ်ဖောအ်ဗြဳတောတက်ဍာ်ဇမၠိၚ်တံဂှ် ညံၚ်သ္ဂောံပံၚ်တောဲရေၚ်အာဂှ် ဒုတိယသ္ကိုပ်ပၞာန်ဇၞော် ယာပျေအ် ဟီုလဴကဵုလဝ်ရ။
စပ်ကဵုပရေၚ်ၜိုဟ်လလမ်၊ ညဳသၟဟ်၊ ဖောအ်ဗြဳ အတိုင်ဂၠံၚ်တရဴ ဥက္ကဌတြေံ ဥူသိုၚ်လေန် အဓိကဖျေံကဵုလဝ်တံဂှ် ဇက်အာတုဲ၊ သွက်သ္ဂောံဂွံအခေါၚ်အဝဵု ပရေၚ်အုပ်ဓုပ်ဇကုဇကု အဆံၚ်ကောန်ဍုၚ်အရၚ်သၠုၚ်ၚ်ဂှ် နဒဒှ်တိုၚ်ပ္ကဴရန်တၟံ ပရေၚ်ဍုၚ်ကွာန် ကေမ်ရပ်ထိၚ်လဝ်ခိုၚ်ၚ်ကၠိုက်က်ရောၚ် ပ္ဍဲပေါဲသဳကၠဳဏံ ဥက္ကဌ NDAA ဥူထိၚ်လေန် ဟီုလဝ်ရ။
တုဲပၠန် ပရေၚ်ပိုၚ်ပြဳအဝဵုဍုၚ်နိဂီု သွက်ဂွံတန်ကြန်ခိုၚ်ကၠိုက်အာကီု၊ ပရေၚ်ညဳသၟဟ်ကောန်ဍုၚ်အရၚ်ကေုာံ ပရေၚ်တိဍာ် ဂွံတန်ကြန်ခိုၚ်ကၠိုက်ဗိုန်ဗတ်တံဂှ် ဆက်စဵုဒၞာမၚ်မွဲအာတုဲ အပ္ဍဲပရေၚ်ကမၠောန် အဆံၚ်နိဂီုဍုၚ်နာနာသာ်တံမ္ဂး ညံၚ်သ္ဂောံဆက်ပါလုပ်အာ နကဵုဗီုပြၚ် လပါ်ခိုဟ်ရောၚ် ဟီုလဝ်ကီုရ။
ဂကောံ NDAA ကေုာံ ဂကောံ “ဝ” UWSA တံဂှ် အပ္ဍဲကာလပရေၚ်သီအဝဵု လက်ထက်ကံၚ်သဳပၞာန် သၞာံ ၂၀၂၂-၂၃ တေံမ္ဂး အတိုၚ်ပေါဲသဳကၠဳပရေၚ်ၜိုဟ်လလမ် က္ဍိုပ်သ္ကိုပ်ပၞာန်ကော်ဘိက်လဝ်တံဂှ် တိုန်စိုပ်လဝ်အိုတ်တုဲ ကေၚ်ဆဵုဂဗလဝ်ကဵု ဥူမေန်အံၚ်လှိုၚ်လေဝ် နွံမံၚ်ရောၚ်။
အပ္ဍဲအရာဆဵုဂဗလဝ်တံမ္ဂး သွက်သ္ဂောံခုတ်စၟတ် သ္ပကဵုသမ္တီ တွဵုရးပရေၚ်အုပ်ဓုပ် အခေါၚ်ပိုင်ပြဳ “ဝ” ကေုာံ ဒေသပရေၚ်အုပ်ဓုပ် အခေါၚ်ပိုၚ်ပြဳကု မိုၚ်ဠာတံဂှ် အာတ်မိက်လဝ်တုဲ၊ လတူပရေၚ်ဏံဂှ် နူလပါ်ကံၚ်သဳပၞာန် တုပ်စိုတ်လဝ်နကဵုမူနွံတုဲ ဌာန်ဂတဏံ ယဝ်ရစၠတ်ထဝ်မံက်တိုန်မ္ဂး ဒတူလိုၚ်ထံက်အာ ဂလာန်ရောၚ်ဂှ် ဟီုပတိတ်လဝ်ရောၚ်။
လတူအကာဲအရာ ပရေၚ်ပရူ NSPNC ကဵု ဂကောံ “ဝ” တံ ဆဵုဂဗလဝ်ဏံဂှ် နူကဵုဌာန်ပရိုၚ် သြင်လောန်တိုၚ်မ် ကေတ်လဝ်အဆက်ကဵု ညးအခေါၚ်ဟီုဂးနွံ UWSA ကီုလေဝ် ကလေၚ်ဟီုလဴကဵုလဝ် ဟၟဲပုဟ်။
ကၟိန်ဍုၚ်ဒုၚ်သ္ဇိုၚ်ကဵု သၞောတ်ဒဳမဝ်ကရေဇြဳ ကေုာံ ဖိတ်ဒရေဝ် ညံၚ်သ္ဂောံဂွံဂှ်ဒက်ပတန်အာရောၚ် ဥူမေန်အံၚ်လှိုၚ် ညးခါန်ကၞက်လဝ်ကေတ်တ် ဒှ်ကၠုၚ်သမ္မတဂှ် ဟီုပတိတ်လဝ်ရ။ ဆဂး ဖိတ်ဒရေဝ်ဒုၚ်သ္ဇိုၚ်ကဵု ကောန်ဂကူဟွံသေၚ်၊ ဒှ်ဖိတ်ဒရေဝ် ဒုၚ်သ္ဇိုၚ်ကဵုဒေသရောၚ် အပ္ဍဲကောံဓရီုဂကောံအလဵုအသဳကၟိန်ဍုၚ် ဂိတုမေ ၂၆ တေံဂှ် ဟီုလဝ်ရ။
ဂကောံညဳသၟဟ် ကောန်ဂကူသေံဍာဲ SNA ဆဵုဂဗလဝ်ကၠာအိုတ်ကဵု NSPNC ဂှ်လေဝ် ပ္ဍဲတွဵုရးကချေၚ်ကဵုရးသဂိုၚ် ဖျေံလဝ်နွံမံၚ် သွက်ဒေသတိဍာ်ကောန်ဍုၚ်အရၚ် သေံဍာဲ (တိုင်လျာန်၊ တိုင်လိုင်) တံဂှ် ညံၚ်သ္ဂောံဂွံအာ ဒေသပရေၚ်အုပ်ဓုပ်ဇကုဇကု အတိုင်ဥပဒေဂှ်လေဝ် သဳကၠဳလဝ်နွံကီုရ။
စပ်ကဵု ပရေၚ်သွက်ဂွံခုတ်စၟတ် သ္ပအာသမ္တီတွဵုရး ကေုာံ ဒေသပရေၚ်အုပ်ဓုပ်ပိုၚ်ပြဳ ဇကုဇကုမ္ဂး ဒးပလေဝ်အာ သ္ဇိုၚ်သၞောဝ်ဥပဒေ ၂၀၀၈ တုဲ တင်ပိုၚ်ခြာခုတ်စၟတ်တံလေဝ် ဗွဲမဂၠိုၚ်နွံအာမာန်ရောၚ် ညးလ္ၚတ်ခါတ်အကာဲပရေၚ်ဍုၚ်ကွာန်တံ ထံက်ထ္ၜးလဝ်အိုတ်ရ။
အပ္ဍဲအခိၚ်လၟုဟ်ဏံ စၠတ်ထဝ် ကလေၚ်စကောံဓရီုမံၚ်တုဲ နူလပါ်အလဵုအသဳပၞာန် သွက်သ္ဂောံပတိုန်ထ္ၜးအာ တင်တုပ်စိုတ် ၄၃ တင် သွက်ဂွံပလေဝ်သ္ဇိုၚ်သၞောဝ် ၂၀၀၈ အပ္ဍဲစၠတ်ထဝ်ကၟိန်ဍုၚ်မာန်ဂှ် ဖန်ဇန်မံၚ်ရောၚ် အပ္ဍဲသတ္တဟဒုတိယ ဂိတုဂျောန်ဂှ် ကဵုလဝ်သမ္တီကီုရ။
ဣဏံဝွံ ဒှ်တင်နၚ် ဂွံနၚ်လဝ် နူအကြာပရေၚ်ပ္ညဳပ္ညပ် ကမ္မတဳပ္ညဳပ္ညပ် ပရေၚ်ဓဝ်ၜိုဟ်လလမ်၊ ဗော်ပရေၚ်ဍုၚ်ကွာန်ကေုာံ ဂကောံရပ်လွဟ်ကောန်ဍုၚ်အရၚ်တံကီုလေဝ်၊ ပရူပရာသာ်လဵုပါလုပ်မံၚ်ရော ဟီုဂှ်တှ်ေ ညးလပါ်မဆေၚ်စပ်တံ လလောၚ်တြးကဵုလဝ်သမ္တီ ဟၟဲဏီပုဟ်။
ပြဟ်ဟ်ဏံ အပ္ဍဲကဵုကိုန်အစဳဇန် အလဵုအသဳပၞာန် ပွိုၚ် ၁၀၀ တ္ၚဲဏံဂှ် ကမ္မတဳပ္ညဳပ္ညပ်ပရေၚ်ဓဝ်ၜိုဟ်လလမ် ဆဵုဂဗသဳကၠဳလဝ်ဗွဲပလးကဵု ဂကောံရပ်လွဟ်ကောန်ဍုၚ်အရၚ် SNA၊ SSPP၊ 7 EAO Alliance၊ UWSA ကေုာံ NDAA တံ တုဲဒှ်မံၚ်ရ။
ဆဂး စနူအခိၚ်သီအဝဵု စဵုကဵုလၟုဟ် လ္တူဂကောံရပ်လွဟ်ကောန်ဍုၚ်အရၚ် ပါလုပ်မံၚ် ပ္ဍဲပၠန်ဂတးတမ်က္ညၚ် ဒှ်မံၚ်ပေါဲဗတိုက်ကဵု ဒပ်ပၞာန်တံဂှ်တှ်ေ ပရေၚ်သ္ဂောံဆဵုဂဗသဳကၠဳအာဂှ် ဟၟဲဏီပုဟ်။
မွဲလပါ်ဂှ်လေဝ် တရဴဍုၚ်ကြုက် ဥူမေန်အံၚ်လှိုၚ်အာလဝ်ဂှ်တှ်ေ စပ်ကဵုလၟေၚ်ကမၠောန် ပရေၚ်ဓဝ်ၜိုဟ်လလမ် အပ္ဍဲဍုၚ်ကီု နူကဵုပရေၚ်ညဳသၟဟ်ကောန်ဂကူသဳကၠဳပ္ညဳပ္ညပ်လဝ် ပရေၚ်ဍုၚ်ကွာန်တံဂှ် နူဍုၚ်ကြုက် ကဵုအာအရီုဗၚ်ရောၚ် အပ္ဍဲပရေၚ်လလောၚ် တြးပံၚ်တောဲဂှ် ချူလဝ်ရ။
ဟိုတ်ဂှ်ရ အလဵုအသဳကြုက်လုပ်ပြံက်ပါမံၚ် အပ္ဍဲကဵုပရေၚ်ကေၚ်ကာဍုၚ်ဗၟာဏံမ္ဂး လတူဂကောံရပ်လွဟ်ကောန်ဍုၚ်အရၚ် ဖျေံသ္ဇိုၚ်ချဳဒရာၚ်မံၚ် ဇိုၚ်ဒေသပယျဵုတံဂှ် စပ်ကဵုပရေၚ်ဆဵုဂဗသဳကၠဳတံတုဲ ကဵုကၠုၚ်ဇြဟတ်ဟရိုဟ်မာန်ရောၚ် ပရေၚ်သ္ၚဳဂၠိပ်တံလေဝ်နွံမံၚ်ရ။
ပရိုၚ် – သြင်လောန်တိုၚ်မ်
Photo – MOI