မတ်မလီု၊ ဂျောန် ၂၀
အပ္ဍဲတွဵုရးမန် ပံက်ကၠုၚ်လဝ်ဝိုၚ်ဝေၚ် အခိၚ်လံလ ညံၚ်ရဴဂွံလဝ်အခေါၚ်လုပ်သၞောဝ်တံဂှ် သွက်သ္ဂောံတာဒၞာ ကၟာတ်ကဠက်အာဂှ် ဗ္တိုက်ဖ္အောဝ်ပၠုပ်ဏာဂလာန်ကု ဂကောံအလဵုအသဳပၞာန်တွဵုရးမန်တုဲ နူကဵုစၠတ်ထဝ်တွဵုရး ညးဒစဵုဒစးဟၟဲ သ္ပဏာလဝ်ဒတန်ရ။
ဂလာန်ဏံဝွံ ညးစၞးစၠတ်ထဝ်တွဵုရး ပွိုၚ်ဍုၚ်ကျာ်မြဟ် ဒေသဆန္ဒမာဲလၟိဟ် (၂) ဥူတဇြဝ် ပၠုပ်လဝ်ဂလာန် အပ္ဍဲကောံဓရီုစၠတ်ထဝ်တွဵုရးမန် ကၠောန်ဗဒှ်လဝ် ဂိတုဂျောန် ၁၆ ဏံရ။
အပ္ဍဲကောံဓရီုလၟေၚ်ဍာံ ဒုတိယဝါ စၠတ်ထဝ်တွဵုရးမန် အလန်တတိယ ကၠောန်ဗဒှ် ဂိတုဂျောန် ၁၉ ဂှ် ညးစၞးအမာတ် ၅ တၠတံ ထံက်ဂလာန်သဳကၠဳလဝ် လ္တူဂလာန်ဏံတုဲ လက်ကြဴအိုတ်ဏံ နူကဵုစၠတ်ထဝ် ညးဒစဵုဒစးဟၟဲ သ္ပဒတန် ဖျေံကဵုဏာသ္ဂုတ်သွာတ်ရ။
အတိုၚ်ညးပၠုပ်ဂလာန်ဟီုဏာလဝ်ဂှ်တှ်ေ အပ္ဍဲနိဂီုဍုၚ်ဗၟာ ဥပဒေတာဒၞာ ပရေၚ်ဝိုၚ်ဝေၚ် ၜိုန်ရနွံမံၚ်ကီုလေဝ် အကြာအရာပ်၊ ကွာန်၊ ပွိုၚ်ဍုၚ်ဂမၠိုၚ် အလုံတွဵုရးမန်မွဲဂှ် ပံက်လဝ်ဝိုၚ်ဝေၚ်ညံၚ်ရဴ သဘၚ်ပေါဲတံတုဲ ဒှ်မံၚ်တင်ကော်ဆောကဵု ပရေၚ်အုပ်လဒမ်သၞောဝ်ဓဝ်ဥပဒေကဵု ပရေၚ်ၜိုဟ်လလမ်ဒေသတံတုဲ၊ သီုကဵုဘပဠမံၚ် ပရေၚ်ဂီုကၠီုလမျီု ဘဝညးဍုၚ်ကွာန်တံဗွဲမဂၠိုၚ်ရောၚ် ထံက်ထ္ၜးလဝ်ရ။
တုဲပၠန် ဝိုၚ်ဝေၚ်အပ္ဍဲတွဵုရးတံဂှ် ဟွံတုပ်ကဵုအကာဲအရာ ပရေၚ်ဓမ္မတာတုဲ ညံၚ်ရဴကောန်ဍုၚ်သအာၚ်လ္ၚဵုတံကီု ဂကောံဂိုဏ်ဝိုၚ်ဝေၚ်ဟွံလုပ်သၞောဝ် ဗီုပြၚ်မာဖဳယာတံနွံတုဲ၊ ညးတေၚ်စိုပ်ပရေၚ်ဍေံတံ၊ ညးပလီုကမၠောန်ဍေံတံမ္ဂး ဍေံတံဝဳလဝ်မၞိဟ်ပရီုတုဲ ဘပဠမံၚ်၊ ကဵုဇြဟတ်ဟရိုဟ်၊ ဂၠာဲဟလာန် ကဵုမံၚ်ဘဲအန္တရာဲတံနွံရောၚ် သ္ဂးရ။
အပ္ဍဲကဵုစၠတ်ထဝ်တွဵုရးမန် လတူပရေၚ်သ္ပလဝ်ဒတန် ဂလာန်သွက်သ္ဂောံမာတ်ကဠက်ထောံ ဝိုၚ်ဝေၚ်ဂှ် ထံက်ဂလာန်ဒုၚ်တၠုၚ်တုဲ ညံၚ်သ္ဂောံကၟာတ်မာတ်ကဠက်ထောံ နတဲဍာံဍာံဂှ် နွံမံၚ်ပၟိက်ကွေံကွေံရောၚ် ညးဍုၚ်ကွာန်ဒေသမန်မွဲတၠ ဟီုကဵု ဌာန်ပရိုၚ်သြၚ်လောန်တိုၚ်မ်ရ။
“နတဲယဝ်ရကၟာတ်မာတ်ကဠက်ထောံဍာံဍာံမ္ဂး ဒုၚ်တၠုၚ်ရ။ ကၟာတ်ဟာ ဟွံကၟာတ်ဟာဂှ်တှ်ေ ဒးမၚ်ရံၚ်အာဏီ။ ယဝ်ရ ဝိုၚ်ဝေၚ်တံဏံ ကၟာတ်ကၠက်အာမ္ဂး ပရူကမၠတ်ဒမၠတံ အိုတ်အာမာန်ဏောၚ်။ သ္ၚိဌာန်ကၟိန်အိန်ထံၚ် ဆက်စပ်မံၚ်ကဵု ပရေၚ်ဝိုၚ်ဝေၚ်တံလေဝ် ပဵုတုဲပြေပြံၚ်အာမာန်ဏောၚ်” သာ်ဝွံ သ္ဂးရ။
စပ်ကဵုဂလာန် သွက်သ္ဂောံမာတ်ကဠက်ထောံဝိုၚ်ဝေၚ်တံမ္ဂး ပ္ဍဲကဵုပေါဲသဘၚ်တံဂှ် ပရေၚ်ဝိုၚ်ဝေၚ် ညံၚ်ဟွံဂွံပါလုပ်အာ ပရေၚ်ရပ်စပ်ကေတ်အရေဝ်တံဂှ် သၠုၚ်ပတိုန်အာအသိၚ်ရောၚ် အပ္ဍဲကောံဓရီုဂကောံအလဵုအသဳ ဖျေံလဝ်သ္ဂုတ်သွာတ်တုဲတုဲရ သာ်ဝွံ ဝန်ဇၞော်ပရေၚ်မၞိဟ် ဂကောံအလဵုအသဳပၞာန်တွဵုရးမန် ဥူတေန်ဇြဝ်ထောန် ဟီုရ။
တုဲပၠန် ပရေၚ်ဝိုၚ်ဝေၚ်တံဂှ် နူကဵုညးနွံတာလျိုၚ်အဆံၚ်ဆံၚ်တံ ညံၚ်ဂွံထိၚ်ကြပ်ရေၚ်တၠုၚ်အာ၊ ဝိုၚ်ဝေၚ်တံ ညံၚ်သ္ဂောံအောန်စှ်ေအာတုဲ ရိုဟ်ကၞက်ဂွံပိုတ်အာ ညံၚ်ဟွံဂွံကလေၚ်ထပ်မံက်ကၠုၚ်ပၠန်ဂှ် ဂၠာဲနဲကဲတုဲ ဆက်ရေၚ်တၠုၚ်အာရောၚ် ကဵုလဝ်ဂတိဝတ် ပ္ဍဲစၠတ်ထဝ်ရ။
ယဝ်ရ ဝိုၚ်ဝေၚ်တံဟၟဲမ္ဂး ပဵုတုဲခိုဟ်အာတုဲ ဟိုတ်နူဝိုၚ်ဝေၚ်တံဏံ ပရေၚ်သ္ၚိဌာန်ဟွံပြေပြံၚ်မံၚ်တံဂှ် အိုတ်အးအာတုဲ ပရေၚ်ကမၠတ်ဒမၠ ရဲပၠံၚ်ၜးစတံလေဝ် ကၠေံအာမာန်ရောၚ် သၟတ်ဒေသမန်မွဲတၠဟီုကဵု ဌာန်ပရိုၚ်သြၚ်လောန်တိုၚ်မ်ရ။
“အတိုင်လညာတ်ပိုဲတံမ္ဂး ဝိုၚ်ဝေၚ်ဟၟဲဂှ် ပဵုတုဲခိုဟ်ရ။ ယဝ်ရဝိုၚ်ဝေၚ်တံနွံမ္ဂး အပ္ဍဲသ္ၚိဌာန်ကၟိန်အိန်ထံၚ်တံလေဝ် ဒှ်ပြသၞာရ။ လ္ၚဵုတံဂှ်တှ်ေ အကြာတြုံကဵုဗြဴ ဒှ်ညးသ္ကံ၊ လ္ၚဵုတှ်ေ အကြာမိကဵုကောန် ဟိုတ်နူပရေၚ်သြန်လှုဲလှိုက်တံတုဲ ဒှ်မံၚ်ပြသၞာတံ နွံရ။ ယဝ်ရအိုတ်အာကွေံကွေံမ္ဂး ပဵုတုဲပြေပြံၚ်ရ။ ရဲကမၠတ်ဒမၠ တံလေဝ် ယအ်စှ်ေအာဏောၚ်” သာ်ဝွံ သ္ဂးရ။
ပရေၚ်ဝိုၚ်ဝေၚ် ပ္ဍဲကဵုတွဵုရးမန်တံဂှ် ပ္ဍဲလက်ထက်အလဵုအသဳ သ္ကိုပ်ဝန်ဇၞော်တွဵုရးတြေံ ဥူအံၚ်ကျဳတိၚ် ကေၚ်ဒှ်လဝ် ဥက္ကဌကံၚ်သဳပၞာန်တွဵုရးတြေံဂှ် ကဵုလဝ်အခေါၚ်ပံက်ဝိုင်ဝေၚ် ညံၚ်ရဴလုပ်သၞောဝ်ရောၚ်။
အပ္ဍဲစၠတ်ထဝ်တွဵုရးမန် လတူပရေၚ်သ္ပဏာလဝ်ဒတန်ဂလာန် ညံၚ်ဂွံမာတ်ကဠက်ထောံဝိုၚ်ဝေၚ်တံဂှ် ပရေၚ်ဒုၚ်တၠုၚ်ထံက်ဂလာန် အကြာညးဍုၚ်ကွာန်ဒေသတံနွံမံၚ်တုဲ အရာထမံက်ရုပ်ရဴပရေၚ် ကမၠောန်အလဵုအသဳပၞာန်ဂှ် ဒးမၚ်ရံၚ်အာပၠန်ရောၚ်။
ပရိုၚ် – သြင်လောန်တိုၚ်မ်
Photo – MOI