ကွာလာလမ်ပူ၊ ဂျောန် ၂၁
ဟိုတ်နူပဋိပက္ခကဵု ပရေၚ်ဍဵုဍိုက်တံတုဲ ညးဒဴဒဒိုက် ဂြိပ်ပါဲဒဴဘဲပၞာန်တံ သွက်သ္ဂောံဂွံ ပရေၚ်သ္ပစၟတ်သမ္တီ သွက်သ္ဂောံစဵုဒၞာမၚ်မွဲကဵုအာညးတံဂှ် ဒးရှ်ေသှ်ေဒဂေတ်ဗက်အာ အတိုၚ်သၞောဝ်ဥပဒေ မလေယှာတံရောၚ် ရုၚ်သ္ကိုပ်သၟိၚ်ဇၞော်ဆေၚ်စပ်ကဵု ရဲပါဲဘဲပၞာန်ကုလသမဂ္ဂ UNHCR ဟီုရ။
ညးဒဴဒဒိုက် ပါဲဘဲပၞာန်တံဂှ် ဟိုတ်နူမၞိဟ်ဂွံအခေါၚ်ဗၠးၜး နူကဵုသၞောဝ်ဥပဒေဍုၚ်နိဂီုမွဲမွဲဟွံသေၚ်တုဲ အကြာဍုၚ်တၠသ္ၚိ ကဵု ရဲပါဲဘဲပၞာန်တံဂှ် ဒးနွံကဵု ပရေၚ်ရှ်ေသှ်ေဂတးဂတန်ရောၚ် ညးစၞး UNHCR မလေယှာ လူသဳ အူဗၚ် ဟီုလဴရ။
“ရဲပါဲဘဲပၞာန်သီုဖအိုတ်တံဂှ် ဒးရှ်ေသှ်ေဒဂေတ်ဗက်အာ သၞောဝ်ဥပဒေတံရ။ ရဲပါဲဘဲပၞာန်တံဂှ် အခေါၚ်ဗၠးၜးနူသၞောဝ်ဥပဒေ ဍုၚ်နိဂီုမွဲမွဲ ဟၟဲပုဟ်။ ဟိုတ်ဂှ်ရ ဒးရှ်ေသှ်ေအာဂတးဂတန်ရောၚ်။ ဣဏံဂှ် ညံၚ်ရဴလိက်ကသုက် နိဂီုဍုၚ်တၠသ္ၚိကဵု ရဲပါဲဘဲပၞာန်တံရ။ ရဲပါဲဘဲပၞာန်တံ ဒးရှ်ေသှ်ေ ဒဂေတ်ဗက်သၞောဝ် အတိုၚ်ဥပဒေတံ” သာ်ဝွံ ညးစၞး မေတ်သေတ် လူသဳ အူဗၚ် ဟီုလဴရ။
ပ္ဍဲသဘၚ်သဳကၠဳ တ္ၚဲညးဂြိပ်ဒဴပၞာန်ဂၠးကဝ် ကၠောန်လဝ် ဍုၚ်ကွာလာလမ်ပူ ပ္ဍဲဂျောန် ၂၀ တေံဂှ် ညးဟီုလဴကဵု အစာလိက်ပရိုၚ်တံ ဗီုဏံရ။
ဆေၚ်စပ်ကဵု ရဲပါဲဘဲပၞာန်တံ ဗွဲတၟေၚ်ရိုဟေန်ဂျာတံတုဲ စပ်ကဵုပရေၚ်စံၚ်တူညးဍုၚ်ကွာန်တံမ္ဂး သွက်သ္ဂောံသ္ပစၟတ်သမ္တီ UNHCR နဒဒှ်ရဲပါဲဘဲပၞာန်မ္ဂး တင်နၚ်ပတေၚ်ဓရပ် ခုတ်စၟတ်လဝ်နွံတုဲ ဇၟာပ်ပ်မၞိဟ် ညးစိုပ်ကၠုၚ်မံၚ် မလေယှာတံဂှ် ဒးဒုၚ်စၟတ်သမ္တီနဒဒှ်ရဲပါဲဘဲပၞာန် ဟွံသေၚ်ပုဟ် ညးဟီုရ။
ကိုပ်ကၠာဟွံသ္ပစၟတ်သမ္တီ မၞိဟ်ပါဲဘဲပၞာန်မွဲမွဲတၠဏီမ္ဂး ကၠောန်မံၚ် ပရေၚ်ဆဵုဂဗသၟာန်သၟုက်လံလကီု ပရေၚ်စၟဳစၟတ်တင်နၚ်ပရိုၚ်ဗွဲမချိုတ်ပၠိုတ်တံ နွံမံၚ်ရောၚ် ညးသ္ဂးရ။
ညးတံဂှ် ဒှ်ညးလဵု၊ ဟိုတ်နူမုပရေၚ်တုဲ ဂြိပ်ပါဲဒဴကၠုၚ်နူဍုၚ်ညးတံရော ပရေၚ်ဟီုဂးတံ ဍာံဟွံဍာံဂှ် နူကဵုရုၚ်ပိုဲတံ နွံအလုံဂၠးကဝ်ဂှ် စၟဳစၟတ်မံၚ်ချိုတ်ပၠိုတ်ရောၚ် မေတ်သေတ် လူသဳ အူဗင် ဟီုရ။
ပဵုတုဲ ဗီုပြၚ်ဒက်ပတန်ခိုဟ်ကၠုၚ်တုဲ ကိုန်အစဳဇန်စဳရေၚ်ခါန်ကၞက် ရဲပါဲဘဲပၞာန် မလေယှာ စကၠောန်လဝ်ဂှ် ညးဒုၚ်တၠုၚ်လဝ်ရ။
ပရိုၚ် – သြင်လောန်တိုၚ်မ်