ကျာ်ထဝ်၊ ဂျောန် ၂၂
အပ္ဍဲကဵုတွဵုရးမန် ပွိုၚ်ဍုၚ်ကျာ်ထဝ် ဒၞာဲကောန်ညးဍုၚ်ကွာန်တံ မံၚ်စံၚ်တန်တဴမံၚ်တံဂှ် ၜၚ်ကျာဒပ်ပၞာန်သီအဝဵု ကြဳလဝ်ဗုၚ် ၜါတ္ၚဲအဆက်က်နွံရောၚ် နူရိုဟ်ကၞက်ပရိုၚ်အပ္ဍဲဒေသတံ ဟီုကဵု ဌာန်ပရိုၚ်သြၚ်လောန်တိုၚ်မ်ရ။
အပ္ဍဲဂိတုဂျောန် ၁၈ ၜိုတ်အခိၚ်ဒေါဝ်တ္ၚဲ ၁ နာဍဳဂှ် ပ္ဍဲကဵုကွာန် ချံၚ်သံက်ပွိုၚ်ဍုၚ်ကျာ်ထဝ် ၜၚ်ကျာ ဒပ်ပၞာန်သီအဝဵုတံ ကၠုၚ်ကြဳလဝ်ဗုမ် ၜါမ မဒှ်ရ။
တုဲပၠန် ဂိတုဂျောန် ၁၉ အခိၚ်နူဂယး ၁၀ နာဍဳဂှ်လေဝ် ပ္ဍဲကွာန်က္တိုၚ်စိၚ် ပွိုၚ်ဍုၚ်ကျာ်ထဝ် ၜၚ်ကျာဒပ်ပၞာန်ဗၟာ ထပ်ကၠုၚ်ကြဳလဝ်ဗုမ် ၜါမကီုရ။
ဟိုတ်နူ ပရေၚ်ဒပ်ပၞာန်သီအဝဵု ကြဳလဝ်ဗုမ်ၜၚ်ကျာဂှ်ရ သ္ဂံၚ်ပၠန်ဂတး ၄ တၠ ကေုာံ ညးဗြဴရဲကွာန် ၁ တၠ ချိုတ်အာလဝ်တုဲ သ္ဂံၚ်ပၠန်ဂတးတံကဵု ကောန်ကွာန် ၁၁ တၠတံ ဒးအာလဝ်ဝပ်နွံရ။
အကြာတ္ၚဲတံဏံ အပ္ဍဲပွိုၚ်ဍုၚ်ကျာ်ထဝ် ဟိုတ်နူဒပ်ပၞာန်သီအဝဵု ကြဳလဝ်ဗုမ်ကဵုၜၚ်ကျာဂှ်ကီု ပန်မံၚ်လွဟ်ဇၞော်တံနွံတုဲ ညးဍုၚ်ကွာန်ရဲဒေသတံ ဒးမံၚ်အာမံၚ်နကဵုဒဝိၚ်စိုတ် နာနာသာ် မဒှ်ရ။
ပ္ဍဲဂိတုဂျောန် ၁၈ တေံလေဝ် အပ္ဍဲဒေသကၞောတ်ၜဳရေဝ် တွဵုရးမန်ဂှ် ဒပ်ပၞာန်သီအဝဵု နကဵုၜၚ်ကျာကြဳဏာဗုမ် လ္တူဗ္ဒိုပ် ရဲပါဲဘဲပၞာန် ဗော်ဍုၚ်မန်တၟိကီုတုဲ စမြိုၚ်သ္ၚိဌာန်ဒၞာဲမံၚ် ၅ မပြၚ် လီုလာ်အာလဝ်နွံရ။
ပရိုၚ် – သြင်လောန်တိုၚ်မ်
Photo – CJ