ရေဝ်၊ ဂျောန် ၂၂
ဒေသကၞောတ်ၜဳရေဝ် နွံမံၚ်သၟဝ်တဲပရေၚ်ထိၚ်ချုက် ဗော်ဍုၚ်မန်တၟိဂှ် လ္တူဒပ်ပၞာန်သီအဝဵု ကြဳလဝ်ဗုမ် နူကဵုဗလးကျာ ဒှ်ကၠုၚ်လဝ်အဆက်က်တံဂှ် နူကဵုလပါ်ဗော် မွဲသာ်လေဝ် လလောၚ်တြး ပတိတ်လဝ်ပရိုၚ်ဟၟဲတုဲ သ္ၚိတ်ဇြမံၚ်ရောၚ်။
အပ္ဍဲကဵုဒေသကၞောတ်ၜဳရေဝ်မ္ဂး နူကဵုဒပ်ပၞာန်တံ ပ္ဍဲဂိတုမေ ၂၇ ဂှ် မွဲဝါ၊ ဂိတုဂျောန် ၃ ဂှ် မွဲဝါ၊ ၁၈ ဏံမွဲဝါ၊ သီုဖအိုတ် ဗတိုက်လဝ်ကဵုပၞာန်ကျာ ကၠောန်လဝ်ပွဗီုတံဏံ ၃ ဝါတုဲရ။
အကြာဏံ ပရေၚ်ကြဳလဝ်ဗုမ်ဗလးကျာ ပ္ဍဲဂိတုဂျောန် ၁၈ ဂှ်မ္ဂး နူကဵုဖံၚ်ဒေဝ်ယှေန်နိပေါန်- ဍုၚ်ဂျပါန် သိုၚ်ခၞံကဵုလဝ်ဒါန် ဒၞာဲသ္ၚိဌာန် ပရေၚ်ဓဝ်ၜိုဟ်လလမ် သွက်ဗော်ဍုၚ်မန်တၟိ ဒေသကၞောတ်ၜဳရေဝ်တံဂှ် ဒးဒုၚ်ကြဳဗုမ်ဗတိုက်လဝ်ရောၚ်။
အပ္ဍဲပရေၚ်ကြဳဗုမ် သ္ၚိဌာန်ပရေၚ်ၜိုဟ်လလမ်ဂှ် သ္ၚိဟွံအောန်နူကဵု ၅ မ ဒးလီုလာ်ကီုလေဝ် မၞိဟ်မွဲတၠမှ ဒးလဝ်ဘဲဝပ် ဟၟဲပုဟ်။
အပ္ဍဲကဵုဒၞာဲသ္ၚိဌာန် ပရေၚ်ဓဝ်ၜိုဟ်လလမ် ဒးဒုၚ်ကြဳဏာဗုမ်တံဏံမ္ဂး ရဲသ္ၚိဌာန်ကၟိန်အိန်ထံၚ် ကောန်ဇာတ် ကောန်ပၞာန်တြေံ ရဲဗော်ဍုၚ်မန်တၟိတံကီု ညးဒေသ ရဲပါဲဒဴလဝ်ဘဲပၞာန်တံလေဝ် မံၚ်စံၚ်တန်တဴဒၟံၚ်ကီုရောၚ်။
အခိၚ်ကၠာတေံ အပ္ဍဲကဵုဒေသ ဗော်ဍုၚ်မန်တၟိထိၚ်ချုက်ဏံမ္ဂး ပရေၚ်ဒပ်ပၞာန်ဗၟာ ဖံက်ပကဝ်လဝ် အခေါၚ်အရာမၞိဟ်တံကီု ပန်လဝ်ကဵုလွဟ်ဇၞော် ကၠောန်လဝ်ပွတံဂှ်တှ်ေ နူကဵုလပါ်ဗော်တံ ပလံၚ်လိက်တေၚ်စိုပ် အာလဝ်စဵုကဵုစိုပ် အဆံၚ်သ္ကိုပ်ပၞာန်ဌာန်ရး အဂၞဲကီု အဆံၚ်တွဵုရးကဵု အဆံၚ်ဗဟဵုတံနွံတုဲ နူလပါ်ဒပ်ပၞာန်ဗမာ လေဝ် ဒးကလေၚ်ဒုၚ်လဝ်ဂုဏ်တံ နွံကၠုၚ်လဝ်ရ။
ပရေၚ်ဒပ်ပၞာန်ဗၟာ ကြဳဗုမ်ဗတိုက်ဏာ ဒၞာဲဒေသပရေၚ်ထိၚ်ချုက်ဗော်ဍုၚ်မန်တၟိဏံဂှ် ဟိုတ်နူ ဒပ်ဂကောံပၠန်ဂတးတံလုပ်ချဳဒရာၚ်မံၚ် ဒေသထိၚ်ချုက်ညးတံတုဲ နူဒပ်ပၞာန်ကဵုဏာသတိ ကုလပါ် ဗော်လေဝ် ဒှ်မာန်ရောၚ် ပရေၚ်သ္ၚဳဂၠိပ်တံနွံမံၚ်ရ။
ဒၞာဲဗ္ဒိုပ်ဂကောံလကိုတ်ရေဝ် နွံမံၚ်ဒေသကၞောတ်ၜဳရေဝ်ဂှ်လေဝ် ဂိတုမေ ၂၇ တုဲကၠုၚ်တေံ ၜၚ်ကျာဒပ်ပၞာန်ဗၟာ ကၠုၚ်ကြဳဗုမ်တုဲ ကောန်ဂကောံဒပ်လကိုတ်ရေဝ် ၁၀ တၠ ချိုတ်တုဲ ၂၀ တၠပြၚ် ဒးအာဝပ်နွံရ။
တုဲပၠန် ဂိတုဂျောန် ၃ တေံဂှ်လေဝ် ဒပ်ပၞာန်ဗၟာ ကြဳလဝ်ဗုမ် အပ္ဍဲဒေသကၞောတ်ၜဳရေဝ်မွဲဝါပၠန်ဂှ် ရဲကၠအ်မွဲတၠ ဒးဗုမ်တုဲ ချိုတ်အာလဝ်နွံရ။
ဗော်ဍုၚ်မန်တၟိ NMSP ဥက္ကဌ နာဲဟံသာ က္ဍိုက်လဝ်က္ဍိုပ်ဂှ် ကြဴနူကဵု ဒပ်ပၞာန်သီဏာအဝဵုဂှ် ပြသၞာပရေၚ်ဍုၚ်ကွာန်ဂှ် ဒးသောၚ်ကလးအာ နကဵုနဲကဲပရေၚ်ဍုၚ်ကွာန်ရောၚ် ဒတူလိုၚ်လဝ်တုဲ ပေါဲသဳကၠဳ ပရေၚ်ၜိုဟ်လလမ် နေပျဳဒဝ် ဒပ်ပၞာန်ကော်ဘိက်လဝ်တံဂှ် အာတိုန်စိုပ်မံၚ်လၟိုန်ရောၚ်။
လတူဗော်ဍုၚ်မန်တၟိ ဆက်သဳကၠဳအာမံၚ် ပရေၚ်ၜိုဟ်လလမ် ကဵုဒပ်ပၞာန်ဗမာဂှ် ဒုၚ်တဲဟွံမာန်တုဲ ပ္ဍဲကဵုသၞာံ ၂၀၂၄ ဂိတုဖေဖဝ်ဝါရဳ ၁၄ တေံဂှ် က္ဍိုပ်သ္ကိုပ်ဗော် အဆံၚ်သၠုၚ်လ္ၚဵုတံပါ်တိတ်တုဲ ဒက်ပတန် လဝ် ဗော်ဍုၚ်မန်တၟိ ဗ္တိုက်သရိုဟ်တၠအဝဵုပၞာန် NMSP- AD မဒှ်ရ။
ပရိုၚ် – သြင်လောန်တိုၚ်မ်
Photo – NMSP