ဒါကာ၊ ဂျောန် ၂၃
သွက်သ္ဂောံဖျေံအာဒၞာဲဝါဲ ရဲပါဲဒဴပၞာန်ရိုဟေန်ဂျာတံ ညံၚ်သ္ဂောံထပ်ကဵုဒၞာဲဂအာၚ်တိ ပရေၚ်ကုလသမဂ္ဂ အာတ်မိက်လဝ်ဂှ် အလဵုအသဳဘင်္ဂလာဒေအ် တးပါဲထောံရ။
ရဲပါဲဘဲပၞာန်တံဏံ သွက်သ္ဂောံကလေၚ်ပလံၚ်ဏာ ကုနိဂီုဍုၚ်ဗၟာ ဗွဲမပြဟ်မာန် နကဵုဗၠးဘဲအန္တရာဲ ကေုာံ သ္ဂောံမံၚ်တန်တဴအာဍာ်ဇမၠိၚ်မာန်ဂှ် နူဘင်္ဂလာဒေအ် ထပ်အာတ်မိက်လဝ် ကုလသမဂ္ဂရ။
သွက်သ္ဂောံဖျေံအာဒၞာဲဝါဲ ရိုဟေန်ဂျာ ဂြိပ်ပါဲဒဴကၠုၚ်လဝ် နူဍုၚ်ဗၟာမာန်ဂှ် ထပ်ကဵုဒၞာဲဂအာၚ်တိညိ နူကုလသမဂ္ဂ ပြဟ်ဟ်ဏံ အာတ်မိက်လဝ်ရောၚ် သာ်ဝွံ ညးတာလျိုၚ်ဌာနဝန်ဇၞော်ပရေၚ်ဍုၚ်သအာၚ်တံ ဟီုရ။
ဆဂး အလဵုအသဳဘင်္ဂလာဒေအ် တးပါဲလဝ် ပရေၚ်တင်အာတ်မိက်ဏံဂှ်တုဲ စၞးနူကၠောန်သ္ပ သၠဲဒၞာဲဂအာၚ်တိသွက်ညးတံဂွံမံၚ် အပ္ဍဲဘင်္ဂလာဒေအ်ဂှ် နဲကဲသွက်ဂွံသောၚ်ကလးအာပြသၞာဍာ်ဇမၠိၚ်ဏံမ္ဂး နူဏံဂှ် ညံၚ်ဂွံကလေၚ်ဗလံၚ်စိုပ်အာ ဍုၚ်မိညးတံဂှ် တန်တဴလဝ်ဂှ်ရောၚ် ဟီုရ။
စပ်ကဵုပရေၚ်ကေၚ်ကာဏံတုဲ ပ္ဍဲဂျောန် ၁၉ တေံ ညးစၞးတၟေၚ် ညးအုပ်ကာနာနာကုလသမဂ္ဂ ဆေၚ်စပ်ကဵုနိဂီုဍုၚ်ဗၟာ သောၚ်ကလးပတိုန်ထ္ၜး ပ္ဍဲကုလသမဂ္ဂ ဟီုဂးစွံလဝ်အဓိကဂှ် ဆဵုကေတ်မာန်ရ။
ဟိုတ်ပရူပရာစတမ် ပြသၞာရိုဟေန်ဂျာ က္တဵုဒှ်ကၠုၚ်လဝ်တံ နွံမံၚ်အပ္ဍဲနိဂီုဍုၚ်ဗၟာတုဲ သွက်သ္ဂောံဂၠာဲသွဟ် ဂွံမံၚ်စံၚ်တန်တဴအာ ဍာ်ဇမၠိၚ်ဂှ် ဒးဂၠာဲအာအပ္ဍဲဍုၚ်ဗၟာဟေၚ်ရောၚ် ကလုတ်အမတ်ဇၞော်လၟိုန် ဘင်္ဂလာဒေအ် အပ္ဍဲကုလသမဂ္ဂ ဆဘာဟူဒင် နိုမန် ချောင်ဟူရဳ ဟီုရ။
နူကဵုဍုၚ်ဗၟာ ဘာတ်ဗက်ပ္တိတ်ထောံလဝ် ရိုဟေန်ဂျာတံဂှ် နကဵုပရေၚ်ဓရ်ဗ္စါရဏာမၞိဟ် ဘင်္ဂလာဒေအ် ဒုၚ်တဲမၚ်မွဲလဝ်ဂှ် ကြပ်ပေၚ်အာ မွဲဗွဝ်စှ်သၞာံယျရောၚ် ကလုတ်အမတ်ဇၞော် သ္ဂးရ။
ဆဂး ဟိုတ်နူပြသၞာတံဏံတုဲ သွက်နိဂီုဍုၚ်ညးတံမ္ဂး ပရေၚ်မၞိဟ်၊ ပရေၚ်ပိုန်ဒြပ်၊ ပွဳပွူသဘာဝ ကေုာံ ပရေၚ်ဂီုကၠီုတံဂှ် ဒှ်ကၠုၚ်မံၚ်ပရေၚ်ကော်ဆော ကၠးကၠးမးမးရောၚ် ညးဟီုဗပေၚ်လဝ်ရ။
ညံၚ်ရဴသာ်ဂှ်ကီု ဒုၚ်တဲမၚ်မွဲလဝ် ရဲပါဲဘဲပၞာန်ဗွဲမဂၠိုၚ်တံ အခိၚ်လံလတုဲ ဟိုတ်နူရဲဒေသပွဳဗွိုၚ်တံ ကေုာံ လ္တူရိုဟ်ကၞက်ဂၠးကဝ်တံ ဒှ်ကၠုၚ်ပရေၚ်ဇြဟတ်ဟရိုဟ်ဇၞော်ဇၞော်တံ နွံကၠုၚ်တုဲ၊ သွက်သ္ဂောံဂၠာဲအာသွဟ် ညံၚ်ဂွံတန်ကြန်အာဍာ်ဇမၠိၚ်မာန်ဂှ် ပၟိက်ဇၞော်ကွေံကွေံရောၚ် ကလုတ်အမတ်ဇၞော်ဘင်္ဂလာဒေအ် ဟီုရ။
သွက်ရဲပါဲဘဲပၞာန်တံ ညံၚ်သ္ဂောံကလေၚ်စဴဌာန်ဇာတိ ဗွဲမဗၠးဘဲအန္တရာဲ၊ ဂုဏ်သိက္ခာနွံနွံ နကဵုပၟိက်ဆန္ဒအလဵုဇကုညးတံမာန်ဂှ် ညံၚ်သ္ဂောံဖန်ဗဒှ်ကဵု အကာဲအရာဂှ်လေဝ် ညးဗ္တိုက်ဖ္အောဝ်လဝ် ပွဳဗွိုၚ်ဂၠးကဝ် ကေုာံ ညးဆေၚ်စပ်အဓိက အပ္ဍဲကဵုဒေသတံရ။
ဟိုတ်အဓိက ရိုဟေန်ဂျာတံ ဒးဂြိပ်ပါဲဒဴကၠုၚ်ဂှ် သွက်သ္ဂောံသောၚ်ကလး ကေုာံ သွက်သ္ဂောံကဵုညးတာလျိုၚ်တံ ဂွံဒုၚ်အာတာလျိုၚ်ဂှ် နကဵုဇြဟတ်ဂၠးကဝ် ညံၚ်သ္ဂောံဗိုၚ်ရီုဗၚ်ကဵုဂှ်လေဝ် ညးဗ္တိုက်ဖ္အောဝ်ဟီုလဝ်ရောၚ်။
Ref: DailyNewsNation