တနၚ်သဳ၊ ဂျောန် ၂၃
အပ္ဍဲကဵုရးတနၚ်သဳ ပွိုၚ်ဍုၚ်တနၚ်သဳ ကွာန်ဖာနဳကဵု ကွာန်လေဝ်မိုၚ်တံဂှ် နူဒပ်ပၞာန်သီအဝဵု ကြဳလဝ်ဗုမ်ၜၚ်ကျာကီု ထပက်မံၚ်ကရောၚ်ပၞာန်ကီုတုဲ ညးဍုၚ်ကွာန်ဒေသၜိုတ် ၁၀၀၀ တၠပြၚ် ဒးဂြိပ်ပါဲမံၚ်ရောၚ် ညးတာလျိုၚ် ဂကောံစဵုဒၞာညးဍုၚ်ကွာန် ပွိုၚ်ဍုၚ်ဗိက်တံ ဟီုကဵုဌာန်ပရိုၚ်သြၚ်လောန်တိုၚ်မ်ရ။
တုဲကၠုၚ် ပ္ဍဲဂိတုဂျောန် ၂၂ ဏံ ၜိုတ်အခိၚ်နူဂယး ၈ နာဍဳဂှ် နူလပါ်ဒပ်ပၞာန်ဗမာ နကဵုဂျက်ဖိုက်တာ ၂ မ၊ ပါရာမဝ်တာ ၁ မတံ ကၠုၚ်ကြဳလဝ်ဗုမ် အပ္ဍဲဒၞာဲကမၠောန်ကၠအ်ရာဘာ အကြာကွာန် ၂ ကွာန်ဂှ်ရောၚ် သ္ဂးရ။
ဒဒှ်ရ ခယျကေတ်ဆဵုညာတ်လဝ် PDF တံ နွံမံၚ်ဂးတုဲ ကၠုၚ်ကြဳထောံ ဖျေံဗုမ် သီုပန်ကဵုလွဟ်ဇၞော်ကီုတုဲ နူဗလးတိလေဝ် ကရောၚ်ပၞာန် ထပက်လုပ်ကၠုၚ်မံၚ်တုဲ ညးဍုၚ်ကွာန်ဒေသ ပွဳဗွိုၚ်ဗ္ဒာဲဗ္ဒာဲတံ သီုဖအိုတ် ဒးဂြိပ်ပါဲမံၚ်ရောၚ် ညးတာလျိုၚ် ပကဖ ပွိုၚ်ဍုၚ်ဗိက် ဟီုရ။
ဟိုတ်နူ ကြဳလဝ်ဗုမ်နူဗလးကျာ ပန်လွဟ်ဇၞော်သာ်ဏံတုဲ ရဲဂကောံပၠန်ဂတးတံကီု သီုညးဒေသတံ ပရေၚ်ဒးဝပ်ချိုတ်လဝ် ဟၟဲပုဟ်သ္ဂးရ။
ကြဴနူကြဳဖျေံဗမ် ပန်လွဟ်ဇၞော်တုဲ နူကဵုတမ်ဒပ် ခမရ ၅၅၆ ဖျေံလဝ်ဒပ်ကွာန်ဇဝဲ ဇြဟတ်ကောန်ပၞာန်ၜိုတ် ၈၀ ပြၚ်တံ ထပက်ကရောၚ်ပၞာန်လုပ်ကၠုၚ် လပါ်ကွာန်တံရောၚ် ဂွံတီကေတ်ရ။
ဟိုတ်ဂှ်ရ ညးဍုၚ်ကွာန်ဒေသ နူကွာန်ဖာနဳ၊ လေဝ်မိုၚ်၊ ယေဖျာချံၚ် သ္ၚိဌာန် ၜိုတ် ၁၀၀ မ မၞိဟ်ၜိုတ် ၁၀၀၀ တၠတံနွံမံၚ်ဂှ် ဒးဂြိပ်ပါဲဒဴမံၚ်ဒၞာဲဗၠးဘဲတံရ။
တုဲကၠုၚ်ဂိတုအေဗရာ ၂၄ တေံလေဝ် ပ္ဍဲကဵုကွာန်ဖာနဳဂှ် ဟိုတ်နူ ကဝေက်မကမ်လွဟ်ဇၞော် နူကဵုတမ်ဒပ် ခမရ ၅၆၁ ပန်ကၠဟ်လဝ်ဂှ်ရ ကောန်င္ၚာ် ၂ တၠ ဒးလဝ်ဝပ်ဘဲဒဏ်နွံမံၚ်ရောၚ် ဂွံတီကေတ်ရ။
ပရိုၚ် – သြင်လောန်တိုၚ်မ်
Photo – CJ