တနၚ်သဳ၊ ဂျောန် ၂၃
အပ္ဍဲကဵုရးတနၚ်သဳ ပွိုၚ်ဍုၚ်တနၚ်သဳ ကွာန်လေဝ်တံၚ်ယျာ ဟိုတ်နူဒးလဝ်ဘဲ မါၚ်တပ်တိဂှ်ရ မိဂှ်ချိုတ်အာတုဲ ကောန်တြုံကဵု ကောန်ကၟိန်ညးဗြဴတံ လိုန်ဒးလဝ်ဝပ်ရောၚ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်မ်ရ။
ဂိတုဂျောန် ၁၉ တုဲကၠုၚ်ဏံ ကောန်ကွာန်လေဝ်တံၚ်ယျာ ညးမဒှ်မိ ဒဝ်ကျူကျူခိုၚ် အာယုက် ၃၆ သၞာံ၊ ကောန်တြုံညး အာယုက် ၁၅ သၞာံ မောၚ်ဟိၚ်ထက်အံၚ် ကေုာံ မနာန်မဝ်လေန် အာယုက် ၂၂ သၞာံ တံ အဟိန်အာၜဟ်ခၞေဝ်ကေဝ် ပ္ဍဲဇိုၚ်ဂြိုပ်ဗ္ဒာဲကွာန်ဂှ် လိုန်ဒးလဝ် မါၚ် မဒှ်ရ။
ဟိုတ်နူလိုန်ဒးမါၚ်တပ်တိတုဲ ဒဝ်ကျူကျူခိုၚ် မွဲလန်ဓဝ်ချိုတ်အာအပ္ဍဲဒၞာဲဂှ်တုဲ ကောန်တြုံကဵု ကောန်ကၟိန်ညးဗြဴတံဂှ် ဒးလဝ်ဝပ် မဒှ်ရ။
ကောန်တြုံကဵု ကောန်ကၟိန်ညးဗြဴ ၂ တၠ ဒးလဝ်ဝပ်မါၚ်တပ်တိတံဂှ် အခိၚ်လၟုဟ်ဝွံ အာဝဳမံၚ် ပ္ဍဲကဵုရုၚ်ဂဥုဲညးဍုၚ်ကွာန် ပွိုၚ်ဍုၚ် တနၚ်သဳရ။
ကွာန်လေဝ်တံၚ်ယျာ မါၚ်တပ်တိခတိုဟ်အာလဝ်ဏံဂှ် ဒှ်မံၚ်ဒၞာဲဒေသ ဒပ်ပၞာန်သီအဝဵုတံကဵု ဂကောံဒပ်ပၠန်ဂတးတံ ချဳဒရာၚ်မံၚ်ပရေၚ်ပၞာန် မွဲဒၞာဲကီုရ။
အပ္ဍဲဂိတုဖေဖဝ်ဝါရဳ ၂ တုဲကၠုၚ်တေံလေဝ် လပါ်သြၚ်ဗၟံက် ကွာန်ဇြေန်ထိုဝ်ကျဳ ပွိုၚ်ဍုၚ်ပလဝ်ဂှ် ဟိုတ်နူလိုန်ဒးမါၚ်တပ်တိ ခတိုဟ်အာတုဲ ကောန်င္ၚာ်ကဵုညးဇၞော် ၂ တၠတံ ဒးလဝ်ဝပ်ကီုရ။
ပရိုၚ် – သြင်လောန်တိုၚ်မ်
Photo – SBM