ဘာအၚ်၊ ဂျောန် ၂၃
အပ္ဍဲတွဵုရးကရေၚ် ပွိုၚ်ဍုၚ်လှာဒကှ် သွက်သ္ဂောံကလေၚ်ဂွံ ဍုၚ်ကျာ်ပိမာန်ဂှ် ဒပ်ပၞာန်သီအဝဵုတံအာတ်မိက်လဝ်တုဲ ဗွဲကြဴဏံ အပ္ဍဲဂၠံၚ် လှာဒကှ်-ကျာ်ပိဂှ် ပရေၚ်ချဳဒရာၚ်ပၞာန် နူကဵုလပါ်ဒပ်ပၞာန်ဗမာတံ ပြေၚ်ဇန်လဝ်နွံကၠုၚ်မံၚ်ရောၚ် ဂွံတီလဝ် နူကဵုရိုဟ်ကၞက်ပရိုၚ်ဒေသတံရ။
ဍုၚ်ကျာ်ပိ ပယျဵုသေံ-ဗၟာဂှ် ဒှ်ဒေသဒပ်ပၞာန်ကရေၚ်ပတုဲဖဵု ဒဳမဝ်ကရေဇြဳ DKBA သ္ကိုပ်ကောပ်ကာဲလၟိဟ်(၂) ဒုသ္ကိုပ်ပၞာန် သဝ်အေဝါန် ပြဟ်ဟ်ဏံထိၚ်ချုက်လဝ်တုဲ ညံၚ်သ္ဂောံကလေၚ်ပအပ်ကဵုဂှ် နူလပါ်ဒပ်ပၞာန်တံ အာတ်မိက်မံၚ် ကု DKBA ဟွံအောန်နူကဵု ၂ ဝါ နွံရောၚ်။
အပ္ဍဲတွဵုရးမန် သ္ကိုပ်ဌာန်ပၞာန်ရးအဂၞဲ ဖျေံသ္ဇိုၚ်ဍုၚ်မတ်မလီု ဒုသ္ကိုပ်ပၞာန် သူရဇြဝ်လွေန်သဵုဂှ် အပ္ဍဲဂိတုဂျောန်ဏံ အာတ်မိက်ကၠုၚ် ကု ဒုသ္ကိုပ်ပၞာန်သဝ်အေဝါန် သွက်သ္ဂောံကလေၚ်ကဵုဍုၚ်ကျာ်ပိတုဲ၊ ယဝ်ရဟွံကလေၚ်ကဵုမ္ဂး ဗတိုက်ကြဳဗုမ်ဗလးကျာကီု ဗလးဏာ ကရောၚ်ပၞာန်ဗလးတိတံတုဲ အာသီကေတ်ရောၚ် ကဵုလဝ်သတိနွံရ။
အပ္ဍဲဍုၚ်ကျာ်ပိ ဖေက်ပေါဲဗတိုက်ကလေၚ်ဒှ်ကၠုၚ်ဂှ် ညးဒေသလ္ၚဵုတံဒှ်မံၚ်ဒဝိၚ်တုဲ သၟာပရေၚ်ပိုန်ဒြပ် လ္တူဍုၚ်လ္ၚဵုတံဂှ်တှ်ေ ဒစးဒုၚ်ပြံၚ်ဆုဲအာစိုပ်လဝ် လပါ်တိသေံနွံမံၚ်ရောၚ် ဂွံတီကေတ် နူကဵုရဲလ္တူဍုၚ်တံရ။
သွက်သ္ဂောံကလေၚ်ကဵုဍုၚ်ကျာ်ပိဂှ် ပ္ဍဲအလန်တုဲကၠုၚ်တေံ သ္ကိုပ်ဌာန်ပၞာန်ရးအဂၞဲ ဒုသ္ကိုပ်ပၞာန် သူရဇြဝ်လွေန်သဵု ကေၚ်အာတ်မိက်လဝ် ဒုသ္ကိုပ်ပၞာန် သဝ်အေဝါန်ကီုလေဝ်၊ ဒုသ္ကိုပ်ပၞာန် သဝ်အေဝါန် ဟွံကလေၚ်ကဵုဍုၚ်ကီုလေဝ် ကဵုဏာသြန်ဗွဝ်ကု ဒုသ္ကိုပ်ပၞာန် သူရဇြဝ်လွေန်သဵုတုဲ သောၚ်ကလးလဝ်ကိစ္စဏံရောၚ် ဂွံတီကေတ် နူကဵုရိုဟ်ကၞက်ပရိုၚ် ဍုၚ်ကျာ်ပိမွဲတၠရ။
ပ္ဍဲအခိၚ်ပြဟ်ဟ်ဏံ ဗ္ဒာဲဍုၚ်လှာဒကှ် အတိုၚ်လၟေၚ်ဂၠံၚ်ကွဳစက် လှာဒကှ်-ကျာ်ပိဂှ် ကရောၚ်ပၞာန်ဒပ်ကဝ်မယှေန် ပလေဝ်စလဝ်ပရေၚ်ပၞာန်တုဲ နူမတ်မလီု၊ ကျာ်မြဟ်၊ မုဟ်ဍုၚ်တံမွဲအဆံၚ် ဗပေၚ်မံၚ်ဇြဟတ်ကု ဇရေၚ်ဍုၚ်လှာဒကှ် အဆက်က်ရောၚ်။
ပရေၚ်ဗပေၚ်ဇြဟတ် နူလပါ်ဒပ်ပၞာန်ဗီုဏံဂှ်တှ်ေ သွက်သ္ဂောံကလေၚ်သီဍုၚ်ကျာ်ပိ ပလေဝ်စပရေၚ်ပၞာန်လေဝ် ဒှ်မာန်ဂှ်ကီု ဟွံသေၚ်မ္ဂး သွက်သ္ဂောံကလေၚ်သီကေတ် ဍုၚ်ကျာ်ဍုၚ် ဒၞာဲ KNU သီဂွံလဝ်ဂှ်လေဝ် ဒှ်မာန်ရောၚ် ပရေၚ်သ္ၚဳဂၠိပ်တံ နွံမံၚ်ရ။
ဂကောံရပ်လွဟ်ကရေၚ် DKBA ထ္ပက်လဝ်လိက်ကသုက် NCA ဂှ် ကေတ်မံၚ်တာလျိုၚ် ပရေၚ်ဂီုကၠီု ပ္ဍဲဂိက်သၞေဟ်ကၚ် လုပ်တိတ်ဍုၚ်ကျာ်ပိ ကေုာံ ဂိက်ပယျဵုတံတုဲ သွာၚ်ပရေၚ်အုပ်ဓုပ်ဂှ်တှ်ေ နူဗော်သွးကောန်ဂကူကရေၚ် KNU မဟာဒပ် ၆ ကေတ်လဝ်တာလျိုၚ် ဂွံတီရ။
ဂကောံ DKBA ကေတ်တာလျိုၚ်ပရေၚ်ဂီုကၠီုတုဲ KNU မဟာဒပ် ၆ အုပ်ဓုပ်လဝ်ဍုၚ်ကျာ်ပိ ပ္ဍဲကဵုဒဵုနာ်ဂှ်တှ်ေ ဗ္ဒိုပ်ဒပ်ပၞာန်ဗၟာ နွံမံၚ်မွဲတုဲ၊ ပ္ဍဲဗ္ဒိုပ်ဂှ်မ္ဂး နကဵုၜၚ်ကျာ ကၠုၚ်ဗပေၚ်ကဵုမံၚ်ဇြဟတ် မွဲဏှမွဲဏှနွံတုဲ ဇြဟတ်ပၞာန်ဗွဲမဂၠိုၚ် စိုပ်မံၚ်ဒတုဲရောၚ် အတိုင်ညးရဲဍုၚ်ကျာ်ပိတံဟီုလဴဂှ် ဂွံတီကေတ်ရ။
ပရိုၚ် – သြင်လောန်တိုၚ်မ်
Photo – DKBA