မတ်မလီု၊ ဂျောန် ၂၃
အပ္ဍဲတွဵုရးမန် ဇၟာပ်အရာပ်/ ကွာန်တံမ္ဂး ပရေၚ်ပံက်စက်သၠဲရမျှာၚ် ဟၟဲကဵုအခေါၚ်ဂှ်လ္ပကၠောန်အိုတ်ညိ နူကဵုသ္ကိုပ်အုပ်ဓုပ်အရာပ်၊ ကွာန် သၟဝ်တဲအလဵုအသဳပၞာန်တံ ဗက်ဆဝ်မ္ၚုဟ်မံၚ် နကဵုစက်သၠဲရမျှာၚ်ရဂှ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်မ်ရ။
စပ်ကဵုပရေၚ်ပံက် စက်သၠဲရမျှာၚ် ဂှ် ယြဴညးလဵုမွဲဟွံဟီု ယဝ်ရပံက် ဟၟဲကဵုအခေါၚ်မ္ဂး အတိုင်ဥပဒေပရေၚ်အုပ်ဓုပ်အရာပ်၊ ဂအုံကွာန် ၝောံပိုဒ် (၂၇) ဂှ် ဒးဖျေံအမိၚ်တပ်ဒဏ်သြန် ဟွံပဵုနူကဵု မွဲဠက်ဒကေဝ်ရောၚ် ဂကောံအုပ်ဓုပ်အရာပ်/ကွာန်တံ သ္ဂးရ။
တုဲပၠန် အတိုင်ဥပဒေပရေၚ်အုပ်ဓုပ်အရာပ်၊ ဂအုံကွာန် ၝောံပိုဒ် (၂၇) မ္ဂး နူရုၚ်သၞောဝ်ဓဝ် ဒးဖျေံအမိၚ် တပ်ဒဏ်သြန် ဟွံပဵုနူမွဲဠက်ဒကေဝ်တုဲ ယဝ်ရဟွံကဵုမ္ဂး ဒးဒုၚ်ဒုဟ်ထံၚ် ဟွံပဵုနူ (၇) တ္ၚဲရောၚ် ဟီုလဴလဝ်ရ။
ပြဟ်ဟ်ဏံ ယဝ်ရမိက်ဂွံပံက် စက်သၠဲရမျှာၚ်မ္ဂး အတိုင်နဲကဲဥပဒေ ပရေၚ်အုပ်ဓုပ်အရာပ်၊ ဂအုံကွာန် ပိုဒ် ၁၄ (ဂ) (၁) ဂှ် ညးဆေၚ်စပ် ဒှ်ဒှ်၊ ဂကောံ ဒှ်ဒှ်၊ တၠစက်သၠဲရမျှာၚ် လိၚ်လဝ်ဂှ်ဒှ်ဒှ် တ္ၚဲ၊အခိၚ် မိက်ဂွံပံက်တံဂှ် ဟိုတ်ဖဵုပရူပရာဍေံ ဒးပတိုန်လိက် အာတ်အခေါၚ်ရောၚ် သ္ဂးရ။
ပ္ဍဲအရာ ပတိုန်လိက်အာတ်အခေါၚ်ဂှ်လေဝ် ဒစးဒုၚ်အောန်အိုတ် ဒးပတိုန်လဝ် ၃ တ္ၚဲကၠာတုဲ၊ ယဝ်ရ သ္ကိုပ်ပရေၚ်အုပ်ဓုပ်အရာပ်/ကွာန် ဒုၚ်တဲမ္ဂး အတိုင်နဲကဲဥပဒေပိုဒ် ၁၄ (ဂ) (၂) ဂှ် စၟဳစၟတ်အာတုဲ အတိုၚ်လၟေၚ် ဓမ္မတာမ္ဂး အခိၚ်ပံက် စက်သၠဲရမျှာၚ်ဂှ် နူအခိၚ်နူဂယး ၆ နာဍဳ စဵုကဵုဗ္တံ ၉ နာဍဳရ ဒးကဵုအခေါၚ်ရောၚ် ဟီုလဴရ။
တုဲပၠန် စက်သၠဲရမျှာၚ်ဂှ် ညးဍုၚ်ကွာန်တံ ညံၚ်ဟွံဂွံဒှ်ပရေၚ်ယှုက်ထုဲညာန်မံၚ်ဂှ်ကီု ဆၜိုတ်အပ္ဍဲဗွိုၚ်အပိုၚ်အခြာ ကဵုလဝ်အခေါၚ်ညးဍုၚ်ကွာန်တံ ဂွံမိၚ်ဂှ်ဟေၚ် ကဵုအခေါၚ်ပံက်အာ၊ သ္အာၚ်နူကိစ္စမ္ၚး ကဵုလဝ်အခေါၚ်တံတုဲ ညံၚ်ဟွံဂွံသုၚ်စောဲကီု၊ အတိုၚ်အခိၚ် ညးတာလျိုၚ်တံ ကဵုကၟာတ်ဗဒေါအ်ထောံဂှ် ညံၚ်သ္ဂောံဒဂေတ်ဗက်အာကီုတုဲ သ္ကိုပ်ပရေၚ်အုပ်ဓုပ်အရာပ်/ကွာန်တံ မၚ်ကောပ်ကာဲအာရောၚ် သ္ဂးရ။
အပ္ဍဲကဵုအရာပ် စနူကမၠောန်သ္ပပေါဲမ္ၚဵုထပ်တဲတံဂှ် ဟွံဂွံလဝ်အခေါင်မွဲသာ် ယဝ်ရပံက်စက်သၠဲရမျှာၚ်မ္ဂး ရပ်စပ်ကေတ် အရေဝ်ရောၚ် လလောၚ်တြး ကဵုသတိကီုလေဝ်၊ ၜိုန်ရ တပ်ဒဏ် သြန်မွဲဠက်ဒကေဝ်ဟီုဂှ် ဒှ်ပရေၚ်ရပ်စပ်ကေတ်အရေဝ်မာန် ဟွံသေၚ်ပုဟ် ညးဒေသမွဲတၠ ဟီုကဵု ဌာန်ပရိုၚ်သြၚ်လောန်တိုၚ်မ်ရ။
“အပ္ဍဲအကြာအရာပ် အပ္ဍဲဂၠံၚ်တံ ယဝ်ရကၠောန်မ္ၚဵုထပ်တဲတံ မုတံမွဲမွဲသာ်မ္ဂး အခေါၚ်ပံက် သံၚ်ဗံက်ကဠာသၠဲရမျှာၚ် တံဏံ ဟွံဂွံလဝ်တုဲပံက်မ္ဂး ရပ်စပ်ကေတ်အာအရေဝ်ရောၚ် ဗက်လလောၚ်တြးကဵုမံၚ် သတိရ၊ သြန်မွဲဠက်ဟီုဂှ် ပ္ဍဲခေတ်လၟုဟ် ၚုဟ်မးသြန်ဟၟဲဒှ်မံၚ်တုဲ ကဵုဒဏ်သြန်မွဲဠက်ဏံဂှ် ဒှ်ပရေၚ် ရပ်စပ်ကေတ်အရေဝ်စိုပ်သၞောတ် ဟွံသေၚ်ပုဟ်၊ သွက်ရဲပံက်တံ သြန်မွဲဠက်ဟီုဂှ် သာသာယာယာရ၊ ကဵုထောံသြန်ရ၊ မိက်ဂွံပံက်တှ်ေဗံက်ဏောၚ်၊ မိက်ဂွံညာန်ထုဲထုဲတှ်ေ ညာန်ဏောၚ်” သာ်ဝွံ သ္ဂးရ။
တုဲပၠန် စပ်ကဵုပံက်ပရေၚ်စက်သၠဲရမျှာၚ် ဟိုတ်နူကေတ်အရေဝ် ကဵုဒုဟ်တပ်ဒဏ်ဟွံစိုပ်သၞောတ်တုဲ ကၠောန်မံၚ်ပရေၚ်ကဵုပညာ ဟီုကီုလေဝ် နတဲဂွံအံၚ်ဇၞးအာဂှ် ဒှ်ဟွံမာန်တုဲ၊ ပရေၚ်ရပ်စပ်ကေတ်အရေဝ်တံ ညံၚ်ဂွံစိုပ်တရဴဂှ် ဒးပြံၚ်သၠာဲအာဒုဟ်ဒဏ်ကိတ်ညဳကဵု ခေတ်ကာလတံရောၚ် ညးဆက်ဟီုရ။
သွက်သ္ဂောံရပ်စပ်ကေတ်အရေဝ် ပရေၚ်ပံက်စက်သၠဲရမျှာၚ်တံဗီုဏံဂှ် ပ္ဍဲကောံဓရီုလၟေၚ်ဍာံ ဒုတိယဝါ စၠတ်ထဝ်တွဵုရးမန် အလန်တတိယ (တ္ၚဲပထမ) ကၠောန်လဝ်ဂိတုဂျောန် ၉ တုဲကၠုၚ်ဏံဂှ် ညးစၞးစၠတ်ထဝ်တွဵုရး ပွိုၚ်ဍုၚ်ၜဳကလေၚ် လၟိဟ် (၂) ဥူတေန်ယဳ ပတိုန်ထ္ၜး ပၠုပ်လဝ်ဂလာန်ရောၚ်။
ဟိုတ်နူ ပရေၚ်ပံက်သံၚ်ဗံက် ကဠာသၠဲရမျှာၚ်တောဲလဝ် ရမျှာၚ် ထုဲထုဲညာန်န်တံတုဲ ပွမယဲကတောဝ်နာနာသာ်၊ ယဲဆီၜေတ်၊ ယဲကောန်တၟအ်၊ ယဲထာၚ်စၞ၊ ယဲက္တဵုဒှ် အပ္ဍဲကြတ်ဗုၚ်အိက်တံဒှ်ဂၠိုၚ်ကၠုၚ်မံၚ်ဂှ် အတိုင်တင်နၚ် ပရေၚ်သုတေသနတံ ဂွံတီကေတ်တုဲ၊ သွက်သ္ဂောံရပ်စပ်တာဒၞာအာ ပရေၚ်ပံက်စက် သၠဲရမျှာၚ်တောဲလဝ် ကဵုမံၚ်ဒဒိုက်စိုတ်ညးဍုၚ်ကွာန် နနဲနာနာသာ်တံဂှ် သွက်ဂွံဒၞာတာကေတ်အာအရေဝ်ညိဂှ် ညးပတိုန်ထ္ၜးလဝ် အပ္ဍဲစၠတ်ထဝ် မဒှ်ရ။
ပ္ဍဲဂိတုဂျောန် ၁၂ အခိၚ်ကောံဓရီုလၟေၚ်ဍာံ ဒုတိယဝါ စၠတ်ထဝ်တွဵုရးမန် အလန်တတိယ (တ္ၚဲဒုတိယ)ဂှ် ညးစၞးစၠတ်ထဝ် ၄ တၠ ထံက်ဂလာန်သဳကၠဳလဝ်လ္တူဂလာန်ဏံတုဲ ဥက္ကဌစၠတ်ထဝ်တွဵုရး ဥူတိတ်ထွိုဲ လေဝ် လုပ်ကဵုကသပ်သဳကၠဳလဝ်ကီုတုဲ ပရေၚ်ဒစဵုဒစးဟၟဲမွဲသာ် သ္ပလဝ်ဒတန်ကိစ္စဏံရောၚ်။
အပ္ဍဲတွဵုရးမန်ဂှ် ပေါဲထပိုဲ၊ ပေါဲမ္ၚဵုထပ်တဲ၊ သဘၚ်ကထိုန်၊ သဘၚ်ကျာ်၊ သဘၚ်လံၚ်ဗဗေၚ်ဇၞော်တံကဵု သဘၚ်ပေါဲမိပ်လဟိၚ်နာနာတံမ္ဂး ပံက်မံၚ်စက်သၠဲရမျှာၚ်တံ မဒှ်ရ။
ပရိုၚ် – သြင်လောန်တိုၚ်မ်
Photo – CJ